गु
साननैनि उनाव आं बरफेटाखौ नागारनानै गौहाटी नोगोराव फैनायसै। बे खौरांखौ आं अनजुलिनो मिथि होआखै। रादाब बिलाइ साजायनायनि खामानिखौ आं मोजाङैनो जुरिनायसै। गौहाटी नोगोरनि फानबाजारआव थानाय रादाब बिलाइ बिगोमा आरो मावख'नि गासैबो सोद्रोमायानो आंखौ जोबोद अननायसै। आंनो बयनिख्रुइबो उनदैसिन, बेनि थाखायनो आंखौ फंबाय होननानै बयबो गाबज्रिनो हमनायसै।
रादाब बिलाइ आरो दानारि लाइसि साजायनाय, मथर गारियाव दिखांना हरनाय बेफोर खामानिखौ फोजोबनानै आं उफेरा समखौ खमफुटार सोलोंनाय खामानियाव बाहायनायसै। मावख'नि आदामोनहाबो आंखौ सम सम फोरोंबाय। गावसोर बानाय मोनोबा एखमबा आंखौनो हांखो बुखांहोबाय।
गावनि लिरबिदांआ हांखो बुखांनायाव गोरोन्थि जानायनि थाखाय सानसेखालि सासे असमिया लिरगिरिया जोंनि मावख'आव फैनानै रागा जोंदाव फैनायसै। बिथांआ रागाजों बुंनायसै।
-माबादि हांखो बुखांनाय जाखो? गासैखौबो गोरोन्थि खालामजोबबाय। मोनसेबो जायाखै।
रादाब बिलाइनि सुजुगिरि आदा बिराद सर्माया सिं जानानै बुंबाय।
-सम सम बिदिनो जाफ्लाङो। नायफामफिननायाव गोरोन्थि थालांबाय। गाहाइ सुजुगिरि हिसाबै बेयो आंनि गेदेर दायथ'मोन।
-नोंथांआ आंखौ जोबोद लासिंसिं खालामबाय। मुंदांखा लिरगिरि होननानै आं असमिया थुनलाइ मुलुगाव गोबां मुं दं। नोंथांआ दिनै गोरोन्थि साफायनानै आंनि मान सनमानखौ बोख्लायनानै होबाय।
-एबार बेबादि गोरोन्थि खालामलिया नोंथां।
-आं सासे साहित्य अकादेमी बानथा मोननाय लिरगिरि। बेल' नङा गोबां बानथा मोननाय मानसि आं। आंनि लिरबिदांखौ जानला मोनला हांखो बुखांला बायनानै फोसावबानो जागोन नामा। सासे गाहाइ सुजुगिरिखौथ' दोन, सुजुगिरि जानोनो समाया नोङो।
आदा बिराद सर्मानि सिगांआव आं सिमान जादोंमोन।
-आदा ! बेयो आंनि गोरोन्थि। बिथांनि लिरबिदांखौ आंनो हांखो बुखांदोंमोन।
-हांखो बुखांनायाव हमनो हास्लाबा, नाथाय नायफामनि खामानिया सुजुगिरिफोरनिमोन।
नलबारि जिल्लानि सासे एम एल एखौ लोगो मोननानै जोबोद गोजोननाय मोननायसै। बिथांनि मुङा मथुराम दास। बिथांनि रासिया जादों सिंह रासि। बिथांआ गौहाटी नोगोरनि फानबाजारनि खाथि खालायावनो थायो। नआ बबेजों बेखौ आं रोखायै मिथिया। बिथांआ सानफ्रोमबो फुंआवनो हाल्पेन गाननानै गंसे मथरनिफ्राइ ओंखारना जोंनि मावख'सिम फैयो। गोदान गांसे रादाब बिलाइ खनखांना लानानै बियो गिबियावनो गावनि रासिखौसो नायग्रोयो।
सानफ्रोमबो बेबादिनो गावनि रासिनि सायाव मा लिरदों बेखौ नायनानै बियो खुसि जायो। एखमबा मोखां सोम जानानै थाङो।
दिनैबो बियो गांसे रादाब खनखांना लानानै गावनि सिंह रासिखौ नायबाय। जोबोद खुसि जाबाय। बिथांनि खुसिखौ नुनानै आं बुंबाय।
-सार! दिनै खौरांआ मोजांना?
-हाबाब! आरो दाबुंथारसै। दिनै जोबोद मोजांथार।
-मा लिरदों?
-बेवहाय लिरदों, बयनिबो अननाय आरो सिबिनाय मोनगोन। मावख' एबा फार्टिनि लोगोफोरजों जोबोद बाखोनाय जागोन।
अखानायैबो बिथांनि रासिनि सायाव लिरनाया मोजांआनो, गाहाइ सुजुगिरिनि खावलायनायाव आंनो लिरदोंमोन। बिथांआ फुंआवनो फैनानै फरायबाय, गोसोथोनाय सिख्ला एबा बिसिनो माबा मोनसे बानथा होयोब्ला बिनि गोबां सिबिनाय मोनगोन। खामानियाव नांथाबोब्ला गोबां रां आरजिनो हागोन।
मथुराम एम एल एनि सिनायथिया आंजों गाहामैनो जानानै फैनायसै। बिथांआ आंनो रां होनानै सानफ्रोमबो रादाब बिलाइखौ गावनि नआवनो हैनो होनायसै। सानफ्रोमबो आं फेलें खालामाजासेनो साइकेल सालायनानै रादाब बिलाइखौ हैनायसै।
सानफाथारला आं मावख'नि रादाब बिलाइ साजानाय, हांखो बुखांनाय खामानियावनो नांथाबना थायो। गोबां जायगानि मानसिफोरा सानफ्रोमबो बिजाब आरो लाइसि बिसम्बिफोर साफायनो थाखाय हांखो बुखांनो होफैयो। बेबादिनो सानफ्रोमबो गांसे नङा गांसे बिजाब साफायनानै हरनांगौ।
मानसिफोर लिरनाय खन्थाइ, रायथाइ आरो सल'फोर फरायनानै आंहा लिरनाय हुदाया बांलांनायसै। हुरा हुरा आंबो खन्थाइ लिरनो हमनायसै। आंनि खन्थाइफोराबो गोबां खुगा लाइसि, बिसम्बि आरो रादाब बिलाइफोराव लाखोमानाय मुंजों नुजाथिनायसै। आंनि लिरनाय खन्थाइनि सायाव गोबां लिरगिरिफोरखौनो सावरायनाय नुनो मोननायसै। आंनि खन्थाइनि सायाव सावरायनाय रायथाइ आंनो हांखो बुखांनो मोननानै जोबोद गोजोननाय नोननायसै।
आंहा मोनसे हुदा जालांबाय, बेनो जादों आं दानिया मथुराम एम एल एखौ एदावो। बिथांनि रासिनि सायाव आं गोसोबादि लिरनानै होयो। एखमबा लिरनानै होयो आं, दिनै सोरबा आइजोजों लामा गेजेरावनो लाजि फोनांजानो हागौ। एखमबा लिरो, गानदुआव दोननाय रांआ एनजर अरसि जानो हागौ नङाबा ननि सोरबा सासेजों लाखोजानो हागौ। एखमबा लिरो, गोसो हमथानो हायाब्ला रेलगारियाव बारसोमनानै गावखौ बुथारना लाफ्लांनो हागौ बायदिसिना।
बेबादिनो बियो दिनै रादाब बिलाइखौनो लानानै जोंनि मावख'सिम फैनानै गाहाइ सुजुगिरिखौ बुंफैबाय।
-मा लिरनाय जाखो बियो? मा लिरनाय जाखो? सिंह रासिलै आं, सिंह!
गाहाइ सुजुगिरिया बुंबाय।
-हाबाब नोंथां मा जाखो?
-सिंहआ माब्लाबा सेसाजों जेनफेरबाय नामा? मा लिरनाय जाखो बियो?
-मा लिरदों?
-बेवहाय लिरदों। मोनसे दाय मावनायनि थाखाय सोरबा नेहाद सासे मानसिजों बुजानो हागौ।
-बेलाय रासिसो नोंथां। जायाबो जानो हागौ, जायोबो जानो हागौ। मुलुगाव गोबां मानसि दं, नोंनिबादि सानथ्रहायै सिंह रासि मानसि दं। जानो हागौ बे बाथ्राया नों बेलायाव गोरोबा नाथाय मुलुगनि सोरबा सासे मानसिनाव बेयो गोरोबनोबो हागौ।
रागाजोंनो एम एल एआ गाहाइ सुजुगिरिखौ होगदावनानै बुंदोंमोन।
-मानो बेबादि लिरनांगौ? दिनैनिफ्राइ जुदि बेबादि लिरबावोबा रादाब बिलाइखौनो सावगोन आं मिथिखा। मा नांगौ नोंनोलाय?
-जेबो नाङा नोंथां।
-बेसे नांगौ? नै जि रोजा ला। आरो सानफ्रोमबो आंनि रासिनि सायाव मोजां मोजां लिर।
गाहाइ सुजुगिरिनो जि रोजा रोजा रां होलांनायसै। गाहाइ सुजुगिरिया जि रोजा रांखौ आंनो होनानै बुंबाय।
-नै फंबाय, बे खामानिया नोंनिसो। बे जि रोजा रांखौ ला, आरो सानफ्रोमबो सिंह रासिनि बागै मोजां मोजां लिर।
जि रोजा रांखौ लानायसै आं। बेबादिनो आं सानफ्रोमबो सिंह रासिनि बागै जोबोद मोजां मोजां बाथ्रा लिरबाय थानायसै। सम सम मावख'आव आं हारसिं जायो, बे समफोराव सोरबा गुबुन गुबुन खामानि लानानै फैयोब्ला, हांखो बुखांनो होफैयोब्ला मोननाय रांखौ आं बांसिनखौनो लाखोमादों। बेबादिनो बोसोरसे थांनायनि उनाव आंनि आखायाव दरमाहाजों उफेरा रांजों दाजाबनानै गासै थाम लाख थामजि रोजा रां जमा जाबाय। आं आंनि इयुनखौ सानो, मानसि मोजां जानो जोबोद लुबैयो। बेखायनो आं आदा बिरादजों रायज्लायनानै फान्दु कलेजाव मुं थिसनफिननायसै। सानफ्रोमबो आं फुंआवनो सिखारनानै मावनांगौ खामानिखौ मावो , कलेजाव थाङो आरो फिन खामानियाव नांफिनो।
----------
जिबा/15
माब्लाबानो नबेम्बर दानआ सफैबाय। गोजां बोथोरा जागायजेनबाय होननानै जोंनि देहा-मोदोमा दा मोजाङैनो मिथिगौसै। नोगोरनि बारहावा, सानाव जोबोद गुदुं जायोब्लाबो मोनाबिलिनिफ्राइनो लासै लासै सुग्लायफिनो। जेसेनो हरथौओ एसेबांनो सुहाबलांनो हमो। गामियावब्ला निहिर गोग्लैनायनि सोदोबखौ खोनानो मोनो बिफांनि बिलाइनिफ्राइ गोग्लैनाय आरो थोंजों थिं उखुमाव गोग्लै फैनायनि सोदोबाव। नाथाय दासानदि आं बिल्दीं सिङाव थायो, निहिर गोग्लैनायनि जेबो उदिसखौ मोना।
बिजाब फरायनो नागिरनायनि सिगांनो आंहा गोसोआव माखासे सोदोब जाखांफैदों। बेलासि समाव लोगोफोरजों बुरलुंथुर दौमा सेराव गिदिंना फैनानै बुरलुंबुथुरनि दोहौखौ गले गले गोसोआव फैदों। गंसे रेबगन आखायाव दैखांना लानानै लिरनो नाजादों आं।
माब्लाबा आं उनदुलांनाय समाव आंनि मोदोम साजोंनो दैमा मोनसे बोहैबाय थादोंमोन, अब्ला आं बे दैमानि बिखायावनो अन्थाइ थरसे जानानै दंमोन। माब्लाबा समाव बावहाबनानै थायोब्लाबो, गासै जिउनाङै बिनि अननाय आरो मोजां मोननायखौ बावनो हानायनि जेबो राहायानो गैया। गोदोनिबादि नंलिया दा गोदोनि समा। बोहैलांबाय बे दैमाया गाथोन सोलायनानै।
नांजानांगौ जेबो गैया होननानै सानो आं, नाथाय नांजायालासेनोबो थानोबो हाया। मानोना बियो आंनि बेसेबांबा आंगो जालांथारबायमोन।
अनजुलिखौ गोसोखांनानै आं दोंसे खन्थाइ लिरनायसै। खेबसे फरायफामनायसै आं। गोजोननाय मोननायसै आं।आखायाव दैखांना लानानै आं साननायसै, बेखौ आं गाबोन रादाब बिलाइयाव सेबखांनो होगोन। नाथाय आं गावनोगाव एसे दुखु मोनखांनायसै, गोसोखांनानै जेबो मुलाम्फा गैया। गोसोखांबानो जोबोद दुखु मोनखाङो। खन्थाइखौ आं बिसिनानै खोरखिजों फिउ गारहरफिननायसै।
अखानायै सिरां जिल्लानि सासे बर' सेंग्राखौ आं रेल स्टेसानाव लोगो मोननायसै। बैसोआ आंनिनो समानफ्राम जागोन नङाबा आंनिख्रुइबो बिनि बैसोआ बांसिन जानो हागौ। बिनि मोखांआ जोबोद सोमहाबनानै दं। गोसोजों गोसो बेसारा जोबोद गाबखोमागासिनो दं। रेलगारि नेना थाथनो थाखाय जिरायनो फजना दोननाय मासियाव जिरायनानै दं बियो। लासै लासै मेथाय जागासिनो दं बियो। आं बिनि खाथियाव फैनानै सोंनायसै।
-बबेनिफ्राइबा फैदों नामा?
-गौहाटी मुलुग सोलोंसालियाव फैदोंमोन, नाथाय थांफिननाय रेलगारिया खारग'लांबाय।
-मुलुगसोलोंसालियाव मा खामानि दंमोन?
-आं बेंतल कलेजाव फरायदों। आंहा थामथि फरायसमाव मोनसे बेक नांनानै होदों सोलोंथाइ आयदायाव। रिसेक खालामनो फैदोंमोन आं।
-सोरबा लोगो दंमोन नामा?
-दंमोन आंनिनो साथाम मोनसे थाखोआवनो फरायनाय लोगो। आंनि फनआ बेठारि गैलियामोन, बेवहायनो आनदायलायबाय।
-दालाय नों मा सानदों?
-बेनि थाखायनोथ' आं थैनो ना थांनानै थानो जादों। आंनि सिफियाव नैजि रांनि अनगायै थायसेबो रांआनो गैलियामोन। दा बे रांजोंनो आं मेथाय जागासिनो दं।
----------
जिदाइन
आं हराव उनदुनाय समाव नुनाय सिमांखौ दारगा साहाबनो खिनथानायाव दारगाया मिनिबाय। बिथांजों आंबो मिनिफाबाय। मानसिया सिमां नुयो माथो सिमां नुवा। मुलुगाव जाथावै एबा जानो गोनांफोरखौबो सिमांआव नुयो।
सानजौफु समाव आं देहाफाहामसालियाव फैबाय। बे समावनो दाक्टार साहाबआ आंनो स्रोद बुंनानै होनो हमबाय।
"बियो सोमोनांथाव मानसि। बबेखानि बियो मा फोलेरनि मानसि बिखौ दासिम आं हमसनो हायाखै।"
आंनि आइ दैमानि गुवार बालाबारि। बेवहाय अख्रांनिफ्राइ बिरबोनानै गंसे खारहिउ हायाव बाग्लाय फैबाय। दैसाया राविबो बाथ्रा खोनासङा, थाद'वाबो, बियो गावनि गोसोबादि जेरै लामा मोनदों बेजोंनो जिरि जिरि बोहैलांगासिनो दं। जोबोद समायना बेलासिनि सम। सोनाब फैसालियाव जारौ महरै साना मिनिस्लु मोखाङै दं।
अखोरां गंसे गुफुर जोमैजों बुंफबनाय
जोमैआ बिबार महरै गोजावनानै दं
मोदोमाव हि गैजायै सानै सेंग्राफोर खारहिउनिफ्राइ ओंखारबाय।
सानै सेंग्राफोरा नायथिं नायथा खालामहरबाय थानाय समावनो सासे ओंखारबावबाय। बियो खेबसे सोरगिदिं नायहरनानै बयनिबो सिगांआव दावगाबोबाय गावनि मेगनखौ लोगोफोरनि मोखांआव खोख्लैबाय।
सानै सेंग्राफोरा उनथिं फावसलांफिनबाय आरो खारहिउआव हाबफिनबाय। दानदिसे उनावनो खारहिउआ सोर्गो फारसे बिरदावलांफिनबाय। बिसोर बिरलांनाय फारसे समायना अखोरांआव जायख्लंनि जोबोद समायना महर लाबाय। जायख्लंखौ गुदिफ्राइ लासै लासै गोमोरलांनाय नुनो मोनबाय। सेंग्राया बिसोरखौ रोमै रोमै नायहरबाय थायो। उनथाराव बियो गावनि मेगनजों बिसोरखौ नुवा जायो। खारहिउआ अखोरांआव गोमाहैयो। जेरै बियो गोसो जादों बे फारसेनो बियो थाबायनो जुरिजेनबाय।
सेंग्राया थाबायै थाबायै मोनसे गाथोनाव थाद’फैबाय। बे समाव मासे दाउखाया बिनि सेराव गारमा फुवारना गा गा होनना गाबफैबाय। बिखौ नुनानै सेंग्राया गोसो होनानै नायनो हमो। बियो दाउखाजों रायज्लायनो जुरियो।
“ओइ बाहाय मा खौरां?”
दाउखाया बिखौ गावनि रावजों बुङो।
“गमामा आं नोंखौ सिनायनो हादों….। नाथाय उखैनायानो उखैनाय जोबनो गैया बाहाय मोर्थोफुरियाव। जेब्लाबो उखैनायजोंनो जोङो जुजिबाय थानो गोनां जायो। नाथाय उखैजानायखौ जों रावबो बुहुमनि जिब-जुनार, दाउसिन-दाउला सहायना थानो हाया। गावनि उखैनायखौ होखारनो थाखायनो जों मालायनि बेदर खावनानै जानांगौ जायो। खोनासं बाहाय, दा आं सासे ना सारग्रानि नाखौ खावनानै जादों। बिथांआ दा बे समाव गोदो गोदो उन्दुलांदों, उनाव सिरि मोनगोन। बेखायनो बे समावनो नोङो बे जायगानिफ्राइ माबार खारलांदो। नङाब्ला बे मानसिया नोंखौ नुयोब्ला सिखाव होननानै बुनो हागौ।”
“बेबादि माबोरै जानो हागौ बाहाय? उखैनायाव जेखौ मोनो बेखौनो जानांगौ। बेवहाय मानि दाय? नों ना जादों बै ना सारग्राया आंखौ माबोरै साजा होनो हागौ? आंथ’ सिखाव खावाखैलाय…..!”
“जायखौ नुयो बेखौनो साननाय। मुलुगनि नेमानो बेबादिनो बाहाय। गावनि जानायखौ गावनो नागिरना जानांगौ। सोरनिबा दोहोनआव सोरबा आखाय होयोब्ला बिहा साजा मोननांगौ जायो। आंनि खोथाखौ मानिनानै नोङो माबार बेनिफ्राइ थांदो बाहाय। नङाब्ला आंनि सोलाइ नोंसो मानजा मोनगोन।”
“बेबादि माबोरै जानो हागौ बाहा?"
“आं नोंखौ मा होनबावनोसो जाबाय….! आंनि बोसोनखौ नोङो थाबैनो मानिब्लानो खैफोदनिफ्राइ बारगगोन। मुलुगाव गोरोन्थि साननाय आरो सन्देहजोंनो बुंफबजोबनाय।”
एसेयावनो ना सारग्रा बोराया सिरि मोननानै सेंग्रानि सेराव फैयो। बियो दाउखाजों रायज्लायनायखौ खोनाबाय थादोंमोन नाथाय दाउखानि बाथ्राखौसो बुजिनो हायाखै। ना सारग्राखौ सिखारनाय नुनानै दाउखाया गोजानाव फोर बिरलांङो। सेंग्रानि बुजिया सोमजिया गोदान रावजों रायज्लायनाय बाथ्राखौ खोनानानै ना सारग्राया बिनि खाथियाव फैनानै बुङो।
“ओइ फाग्ला….! सोरजों रायज्लायदों नोंलाइ? सोर जाखो नोंलाइ, बबेनि? नोंनि नोम्फानि मुङा मा?”
बियो मा सोंदों सेंग्राया बुजिनो मोनदों। बियो मानसिनि मोखांआव नायनानै सोंनायनि फिन्नायखौ होनो नाजायो। नाथाय बिनि मोनबो रावखौनो ना सारग्रा मानसिया बुजिनो मोना।
मानसिया हार्सिंङैनो बुङो। साल्ला बुरबखआ नंगुबै फाग्लामारसो। बबेनि मानसि जाखो बेलाय? आवसावथां-माथां बाथ्रा बुंनाय…..! बेबादि खर’ गाज्रिबो मानसि थायोना मुलुगाव? दिनैसो बेबादि मानसि नुफेरबाय आं।
खाथिसिनाव फैनानै मानसिया आरोबाव सेंग्राखौ बुङो।
“ओइ फाग्ला….! बेयाव मानो फैदों नोंलाइ? नोंनो मा नांगौ, मा नांगौ नोंनो?”
सेंग्राया मानसिनो गोसोजों गोसो फिननाय होयो।
“नै नोंथां, आं बुहुमखौ नायनानै लानो फैदों। आंनो नांगौआ जादों बुहुमनि खौरां। मा नोंथांआ आंनो बुहुमनि खौरांखौ बुंनानै होनो हागोन नामा?”
मानसिया हार्सिंङैनो बुङो।
फाग्ला जायोब्ला मानसिनि खर’आ एसेबां गाज्रि जायोना…..! बियो गावखौनो सोर आरो बबेहाय दं सिनायनो हालिया। हे गसाइ! बे मानसिखौ मानो बेबादि फाग्ला खालामखो?
मानसिया आरोबाव असिना सेंग्रानि मोखांआव नायनानै सोङो।
“नै फाग्ला, नों बबेनिमार जाखो? नोंनि गुबै थंखौ आंनो मोजाङै खिन्था। नोङो नोंनि थंखौ मोजाङै खिन्थायोब्ला आं नोंखौ दोनलांगोन। मदद खालामगोन। नोंनि नोमा-नोम्फाखौ आं बुंगोन– आदै आरो मादै, बे मानसिखौ मोजां दाक्टार खानानाव लांदो। बिखौ मोजां देहाफाहामसालियाव थिसन। बिखौ मोजाङै फाहाम, बियो जोबोद अनथाव-बाथाव सेंग्रा।”
सेंग्राया गोसोजों गोसो ना सारग्रानियाव सोङो।
“नै बाहाय, नोंनि मुङा मा?”
ना सारग्रा मानसिया एसे रागा जोंखांनायबादि जाबाय। बियो असिना मानसिनि मोखांआव नायनानै बुंनो हमबाय।
"नोङो आंखौ दिनै खाफाल गाज्रिसो खालामबाय। बे जायगानिफ्राइ नोङो माबार थांदो।”
असिना सेंग्राया गोसोजों गोसो मानसिखौ बुंनो हमो।
“आं नोंथांजों दानदिसे रायज्लायबावनो सानदों। नोंथांआ आंनो नोंसोर गसंना थानाय मुलुगनि बागै बुंदो।”
मानसिया असिना सेंग्राखौ बुनो हमो। बिनि दुबादुब सौनायाव सेंग्राया सानाय मोनो आरो उनाव खारनो गोनां जायो। एसे गोजान खारनानै असिना सेंग्राया मानसिखौ नायहरबाय थायो थं गसंनानै।
मानसिया गावनि खबायाव नायो नाथाय मासेबो नाखौनो नुनो मोनाखिसै। बियो दिउ दिउ रागा जोंखाङो आरो असिना सेंग्राखौनो सिखाव होननानै सानो। बियो गसंनानै असिना सेंग्राखौ थं गसंना थानाय नुहरो। बियो सेंग्राखौ नायहरनानै गोसोजों गोसो बुङो।
साला फाग्ला नङा बियो,
आसोल सिखावसो।
बियो आंनि नाखौ खावबाय।
सिखावफोरा गोबां सोलो बाहायनानै मानसिनि मोजां मोजां जिराद एबा जाग्रा आदार, ना-बेदर बायदिखौ खावो। बे मानसियाबो आंनि नाखौ सासे फाग्ला जाफ्लानानै खावफैदों।
मानसिया गोख्रैनो असिना सेंग्राखौ होसोबोयो आरो खुगाजों बियो बुङो।
“ओइ हारामि र’ नोंखौ…..! बिखुं बेरलाब होनानैसो नोंखौ नागारगोन आं….!”
मानसिया बेसेबा गिदिर थाइसे अन्थाइ खनो। अन्थाइखौ लानानै आरो असिना सेंग्रानि फारसे होसोबोयो। अब्ला असिना सेंग्राया बिखौ गिनानै गोर गोर खारो। ना सारग्राया होसोयो, लावदुमा खारो। नाथाय ना सारग्राया बेसेबा होसोब्लाबो बिखौ मोनाखिसै। अदेबानि मोनसे समाव ना सारग्राया थैहां थैहां जालायनाय मेंनानै हायाव गावनोगाव जल्दब गोग्लैनानै थाबाय।
0 Comments