मानो बोराबनो मोजां मोनो

मानो बोराबनो मोजां मोनो

बोराबनाया मोनसे आरिमु । खुगाजों बाथ्रा बुंनो हायै मानसिफोरा बोराबनायजोंनो गावनि साननाय आरो लुबैनायखौ फोरमायो । खायसे मानसिफोरनि बोराबनाया जोबोद गिलुबालु । बोराबनानैनो खायसे मानसिफोरा खिथिर होखारो । बेनिखायनो बोराबनाया मोनसे खिथेर होखारनायबो। खायसे मानसिफोरखौ बोराबनायाव जोबोद समायना नुयो, बेनिखायनो खायसे बोराबनानै गावनि समायनाखौ दिन्थिनो नाजायो ।

रावबो मानसिफोरा ओरैनो बोराबा  । बोराबनानै माबा मोनसे फोरमायो, माबा मोनसे खिथेर लायो, माबा मोनसे दिन्थियो।

नोंथाङाबो बोराबोना ? नोंथाङा सोरखौबा बोराबनानै खिथेर होखारनो हाफेरबायना? दिनैसिम आं रावखौबो बोराबफेराखै होननानै नोंथाङा बुंनो हागोनना? जानांगौ नोंथाङा सम सम बोराबो? नाथाय नोंथाङा मानो बोराबनो मोजां मोनो? बेनि फिननायखौ नोंथाङा गावनो मिथिगौ। नोंथांनि बोराबनायखौ आंबो मिथिगौ, नाथाय आं बुंनो गोनांथि गैया।

नोंथाङा माब्लाबा गावनि साननाय बादि जायैनि थाखाय बोराबो । माबा मोनसे सोरनियावबा बिनानै मोनैयाव बोराबदों। माबा मोनसे मदद मोनैनि थाखाय बोराबदों। माबा मोनसे खाबुखौ मोनैनि थाखाय बोराबदों। जानो हागौ गावनि गोरोन्थि एबा लेहेम खालामनायनि थाखाय बिथांजों रायजानाय एबा बाथ्रा बुंजानायनि थाखाय बोराबदों।

बुहुमनि साफ्रोमबो मानसिफोरानो बोराबनो हायो। बोराबनायखौ नागारनो हानाया जोबोद मोजां। नोंथाङा सोरखौबा बोराबनानै बिखौ जोबोद आख'-फाख' खालामगोन। सासे मानसिनि आख'-फाख' जानांनायनि थाखाय गोबां मानसिफोरा जारलायाव गोग्लैनांगोन। नोंथाङाबो बे एखे रोखोमनि जारलायावनो गोग्लैनानै गावनि आसोल गोजोननायखौ खोमानानै लानांगोन।

बेनिखायनो सोरबा सासे मानसिखौ बोराबनानै रोजा रोजा मानसिफोरखौ खैफोदाव खोख्लैनो दानाजा। इसोरा मानसिखौ बेबादि हाबा मावनायनि थाखाय सोरजियाखै। बुहुमाव कौटि कौटि मानसि दं। मानसिफोरनि अनगायैबो सानथ्रहायै जिउ जिबिफोर दं। बिसोरनि गासैबोनि थाखाय गाहाम साननो आरो हाबा मावनो थाखाय इसोरा मानसिखौ सोरजिदों।

बोराबनानै गावनि समखौ दाबारहो । बोराबनानै गावनि गोसोखौ गाज्रि दाखालाम। बोराबनानै रोजा रोजा मानसिफोरखौ खैफोदाव खोख्लैनो नाङा। सोरबा सासे मानसिया माब्लाबाबो गाव हारसिंनि थाखायल' जानो हाया । मानसिखौ मानसिफोरनि थाखायनो इसोरा सोरजिदों। नोंथाङा दासिमबो सोरखौबा बोराबनानै थादोंब्ला खेबसे मोजाङै सान । बे मुलुगाव जों रावबो अरायसमनि थाखाय नङा। सोरखौबा बोराबनानै गावनि बेसेन गोसा सम आरो मोननो गैयै जिउखौ दाबारहो ।

थांनानै दासान्दि समाव जायखौ लोगो मोनदों बिथांजों रंजानो सोलों। जिउआव सोरखौबा बोसोन होनाय, सोरखौबा रायनाय आरो फोसाबनाय, सोरखौबा मदद होनाया नोंथांनि मावनो गोनां खामानि।