फांसे बिफां आरो बेनि दालाइफोर
मोनसे अरनबारियाव फांसे बिफां दंमोन । बिफाङा गोबां दालाइ आरो बिलाइ दंमोन बेनि थाखायनो बेखौ नायनो जोबोद समायना नुदोंमोन । अरननि दाउसिन-दाउलाफोरा बे बिफांनि दालाइयावनो बानानै मेथाइ रोजाबफैयोमोन। बिफाङा दाउसिनफोरनि मेथाइ रोजाबनाय आरो खुसिखौ नुनानै जोबोद गोजोननाय मोनोमोन।
सानसेखालि सासे लाउखारा बे बिफांनि दालाइखौ दानफैनायसै। लाउखारा बिफांनि दालाइखौ लांनानै गावनि मैसोफोरनो जाहोदोंमोन। मैसोफोरा बिफांनि बिलाइफोरखौ जानानै जोबोद गोजोननाय मोनदोंमोन।
दालाइ दानजानायनि थाखाय बिफाङा जोबोद दुखु जादोंमोन। बियो गाबबाय थानाय समाव खोनानानै खाथियावनो थानाय फांसे बिफाङा बुंदोंमोन, "हाबाब! एसेबां खुसि जानांगौ समावबो नोङो गाबनानै गावखौनो लोरबांसो खालामदों मानो ? नोंनि बिलाइफोरखौ जानानै मैसोफोरा बेसेबांदि गोजोननाय मोनदों, नोंबोथ' गोजोननाय मोननांगौ।"
बिफाङा बुंफिनदोंमोन, "आंनि दालाइ आरो बिलाइफोरादि गैला, आंदि थैथारसिगोन बेनि थाखाय आं दुखु जानानै गाबनाङा नामा?"
अब्ला सेराव गसंना थानाय बिफाङा बुंफिनबाय, "गाबनो गोनां जेबो गैया। दालाइखौ दानफायोबानो बिफाङा थैया। बिफांखौ बुथारनोबा बेनि गासै रोदा नङाबा गुदिखौ दाननांगौ जायो। नोङो थारैनो साननैसोनि उनावनो गोदान दालाइ आरो बिलाइफोरखौ मोनफिनगोन।"
बिफाङा गुबुननिफ्राय मोजां राव मोननानै जोबोद गोजोननाय मोननायसै। बियो गावनि मेगननि मोदैखौ हुगारनानै लाफिननायसै।
0 Comments