खुसियै थानो हानायनि माखासे राहाफोर
जिउआव जों बयबो खुसियै थानो लुबैयो नाथाय जोंनि माखासे गोरोन्थि आरो आखुनि थाखाय जों खुसियै थानो हायै जायो। जोंनि माखासे गोरोन्थि, माखासे आखु आरो साननायफोरा जोंखौ सम सम दुखु होयो आरो गोजोननाय गैयै खालामो।
जिउआव खुसियै थानो हानायनि माखासे राहाफोर दं । बेफोरो गाहायाव होनाय बादि जानो हागौ -
(क) माब्लाबाबो दामुगै ।
गोबां मानसिनावनो मुगैनाय हुदा थायो। गावखौ साबसिन आरो गोथार होनना साननानै माब्लाबा जों गावनि एसे गाहायाव थानाय सोरखौबा मुगैयो। बुंनो थाङोब्ला मुगैनाया मानसिनि मोनसे गेदेर गोरोन्थि। गुबुनखौ मुगैनाया मोनसे गोरोन्थिल' नङा, मोनसे दायबो । माब्लाबा जों गुबुनखौ मुगैनानै इयुन जिउआव गुबुनजों मुगैजाफिननो गोनां जायो।
(ख) गिनो नाङा ।
लोरबां मानसिफोरा गियो। माब्लाबा गिनाया सासे मानसिखौ माबा मोनसे खैफोदनिफ्राय रैखा खालामनो हागौ। नाथाय गोबां समावनो गिनाया मानसिखौ दावगानायाव हेंथा होनो हागौ। गिनायनि थाखायनो मानसिया गावनि थांखियाव सहैनो हायाबो जानो थामहिनबा बियो गावनि मावनो गोनां खामानिखौ मावनो हानाय नङा। माब्लाबा सासे मानसिया गिनायनि थाखायनो गावनि जेंनाफोरखौ बोखारनो हानाय नङा। माब्लाबा गिनायनि थाखायनो खैफोदाव गोग्लैनो गोनां जायो।
(ग) सरासनस्रायैनो था।
आथिखालाव गोबां मानसिफोरानो साबसिन हामसिन लुबैयो। साबसिन हामसिन थानो लुबैयो। मोजां जानाय लुबैयो। मोजां थानाय आरो मोजां गाननाय जोमनाय लुबैयो। माखासे मानसिफोरा जोबोद जोंगा -मागा गावखौनो दामगोसा दिन्थिनो नाजायो। नाथाय गावनियाव थोजासे खरसा खालामनो हानाय आरजिनाय गैयाबा गावखौ बांद्राय साजायनाया गोनांथि नङा। जेरै दं बेबादि सरासनस्रा थानायानो गोनां।
(घ) एसेल' आसा खालाम।
बांद्राय लुबैनाया मानसिखौ दुखु होयो। माब्लाबाबो गुबुन मानसिफोरनिफ्राय गोबां मोनगोन होनना आसा खालामनो नाङा। गुबुन सोरनिफ्रायबा नोङो जेसेबां मोनगोन आसा खालामदों बेनिख्रुइबो खमसिन मोनगोन। मानसिया गावनि आसा खालामनायखौ मोनाब्ला दुखु मोननाय आरो गोसो बायनाय सोमजियो। बेनिखायनो गोबां आसा खालामाजासे एसेल' आसा खालामनाया मोजां।
(ङ) गोबां हो ।
गुबुन सोरनोबा गोबां होनो हायोब्ला नोङो गोजोननाय मोनगोन। माब्लाबा बयनिख्रुइबो बांसिन होनो हायोब्ला नोंनि मुङा सेथि फारिलाइयाव फैनो हागौ। बे समाव नोङो बयनिख्रुइबो बांसिन गोजोननाय आरो अनसायनाय मोननो हागौ।
(च) जेब्लाबो मिनिस्लु जा ।
मिनिनाया जिउआव जोबोद गोनांथार। मिनिनाया सासे मानसिनि गोसोखौ सोरां खालामो आरो देहाखौबो गोख्रों खालामो। जेब्लाबो मिनिस्लु थाग्रा मानसिनि गोसोआ गोथार आरो गोख्रोंसिन जायो। मोनसे जोबोद गोसो होनो गोनां बाथ्राया जादों मिनिस्लु थानाया गुबुन मानसिफोरजों मोजां मोनजानायल' नङा गुबुन मानसिफोरनि गोसोखौबो मोजां खालामो। दुखु जानाय समाव सासे मानसिया गुबुन सोरखौबा बेबादि मिनिस्लु थानाय नुयोब्ला गावबो गोजोननाय मोनो आरो बिनि दुखुआ जायखारलाङो।
(छ) जेब्लाबो इसोरजों सोमोन्दो लाखि।
जोंनि गासैबोनि गुदियावनो दं अबंलावरि। अबंलावरिखौ नागारनानै जों जिउआव जेबो खामानिखौनो मावनो हाया। अबंलावरिजों जों जेब्लाबो सोमोन्दो लाखिनाया गोनांथार। अबंलावरिजों सोमोन्दो लाखिनानै जों जोंनि गोसोखौ गोख्रों आरो गोथार खालामनानै लाखिनो हायो ।
0 Comments