थिरांथा खालामनाय
थिरांथा खालामनायानो जोंनि गोख्रोंसिन माबा मोनसे खामानि मावनो गोसो जानाय। जुदिबा सोरबा सासे सुबुङा गेदेमा जानो लुबैयो एबा माखौबा मोननायाव गोब्राब जायो, बिथांनि थिरांथा खालामनाया समानैनो गोख्रों जानांगोन। जुदि बियो बेहेला एबा बंब्लं सोलोंनो लुबैयो, बियो बेफोरनि सायाव सानफ्रोमबो गोब्राब नाजानायजों थालिम खालामबाय थानो नांगोन। जोङो जोबोद थाबैनो गोसो बायो जुदि गोब्राब मोनो एबा जेब्ला सोरबा सासे सुबुङा जों मा मावदों बेनि सायाव गाज्रियै बाथ्रा बुङो। नाथाय गोबां गेदेमा सुबुंफोरनि थाखाय हेंथाफोरानो खालिबोल' बिसोरनि थिरांथाखौसो गोख्रोंसिन खालामो। बिसोर जाफुंसार जानो थाखाय गोब्राबै नाजादोंमोन।
गोजाम ग्रीसनि देमस्टिनेसआ स्नि बोसोर बैसोआवनो गावनि बिफाखौ खोमानानै लानो गोनां जादोंमोन। जिसे बोसोर बैसोआव बिथाङा देहा दाफुंनाय (बडी बिल्दीं) फसंथानाव गावखौ थिसननो गोसो जादोंमोन। नाथाय बिथाङा बांद्राय लोरबां होननानै सानजादोंमोन आरो मुं थिसननायनिफ्राइ नेवसिजादोंमोन। जेब्ला बिथाङा सेंग्रा देरो बिथांनि बाय-बाहागिफोरा बिथांनो बिफानि सम्फथिखौ लानोबो होआखैमोन।
देमस्टिनेस जेब्ला रायज्लायो होनबा बिथांनि गाराङा जोबोद गाज्रियै थाबथायोमोन। बिनि गारमाया जोबोद लोरबांमोन आरो गाराङा गुरै। बेनि थाखायनो मानसिफोरा बिखौ जंखायदोंमोन। बेयो बिथांखौ गोसो सिफायनो हायाखैमोन। बेनि सोलायै, बिथाङा माबोरै साबसिनै रायज्लायनो हायो बेखौसो मुजिहाबनाय मोनदोंमोन। गोसो जादोंमोन।यो। बिथाङा गोब्राबै नाजानो हमो। बिथाङा गोबां नाजादोंमोन। बिथाङा बयनिख्रुइबो साबसिनै रायज्लायनो गोसो जादोंमोन। बिथाङा लैथोनि सेराव थांनानै नाजानो हमो, गावनि गारांखौ लैथोनि गुथालनिख्रुइबो गोसासिन खालामनो नाजायो। बिथाङा हाजोनि गोजौआव गाखोहैनाय समाव गावनि रायज्लायनायखौ दोनखोमायो। बिथाङा जुनिया खथायाव थानानै गाव हारसिंनो सोलोंबाय थादोंमोन। बिथाङा गावनि सालाय आरो सोदोबखौ जौगाहोनो थाखाय गावनि खुगायाव सिथर बानायनानै लादोंमोन।
बिथाङा गावखौनो नआवनो दोननानै सोलोंनो थाखाय बिथाङा गावनि गासै खानायखौनो हनानै लादोंमोन। बिथाङा गावनि थांखियाव सहैनो थिरांथा खालामदोंमोन। जोबथारनायाव बिथाङा सासे गेदेमा बुंथिगिरि जानो हादोंमोन। बिथाङा गावनि समाव बयनिख्रुइबो देरसिन ग्रीक बुंथिगिरि होननानै मिथिजादोंमोन। थामजि बोसोरनिफ्राइ द'जि बोसोर बैसोसिम बिथाङानो बयनिख्रुइबो मुंदांखासिन सुबुंमोन।
देमस्टिनेसआ माब्लाबाबो गावनि गारमा थाबथानायनि थाखाय मानसिफोरा जंखायनायाव गोसो बायाखैमोन, जेब्ला बिथांनि बाय-बाहागिफोरा बिफानि सम्फथि लानो होआखैमोन आरो जेब्ला देहा दाफुंनायनि मुं थिसननो नागिरनायाव नेवसिजादोंमोन। बिथाङा खालिबोल' गोख्रों जानो गेदेर मिजिं खालामदोंमोन। बिथांनि थिरांथा खालामनायानो गेदेमासिन खालामदोंमोन। बिथाङा जोबोद गोब्राबै नाजादोंमोन जेबो जाहोनफोरजोंनो बिथाङा जुजिनांदोंमोन।
जोङो गोब्राब जेंनाफोरजोंनो गोसो बायनो नाङा। जोंनि सोमोन्दै मानसिफोरा जेखि बुङामानो जोङो नागारनो नाङा। माब्लाबा माब्लाबा जोङो मा लुबैदों बेखौ मावनायनिफ्राइ होबथाजायो। बेयो जोंखौ थांखियाव सहैनायाव गोब्राबसिनै नाजानायसो खालामगोन।
जोङो माखासे आयदाफोरखौ गोगोम नाजानायजों जुरिजेननो हागौ जायखौ इनायनो गोब्राब मोनो। जोङो फरायसालियाव थांनायखौबो सानफ्रोमबो (नेमखान्थि बादियै), समबादियै आरो जोंनि सानफ्रोमबोनि न'नि हाबाखौ खालामनो हागौ। जायफोर गेदेमा जानो लुबैयो बिसोर गोब्राब नाजानायजों जाफुंसारनो हागौ। जेराव गोसो, बेवहायनो राहा लामायाबो दं।
(थाखो ब्रैनि मोरेल चाइन्स बिजाबनिफ्राइ 'दीटारमिनेसन' आयदाखौ उदाङै राव सोलायनानै होनाय जादों)
0 Comments