अबंलावरिया गासैखौबो मिथिजोबो

अबंलावरिया गासैखौबो मिथिजोबो

दानिल' एबा दिनैसो मिथिनाय नङा। गोदो गोदायनिफ्राइनो सुबुंफोरा बे बाथ्राखौ बुंबोबाय थागासिनो दं। जेब्ला बुजिनो आरो खोनासंनो रोंदोंमोन अब्लानो आंबो बे बाथ्राखौ खोनादोंमोन, अबंलावरियालायनो गासैखौबो मिथिजोबो। बियो गासैखौबो नुजोबो। अबंलावरिया जों बयजोंबो अरायसम थाफाबाय थायो। जों मा सानो आरो मा मावो बियो गासैखौबो मिथियो आरो नुजोबो।

बाइबेलाव मख'नाय बादिब्ला आद’मानो जादों मुलुगनि गिबिसिन सुबुं। बिथांनि बिसिया जादोंमोन इभ। एडेन गार्डेननि गियान फिथाइखौ जानायनि उनाव बिसोरहा सानै फिसाज्ला मोनदोंमोन। गेदेमा सुबुं बुहुमखौरां बिगियानगिरिफोरा बिसोरनि मुंखौ बुंदों केइन आरो आबेल। केइनआ जादोंमोन सासे हालुवा आरो आबेलआ जादोंमोन सासे बोरमा गुमग्रा।

केइनआ गावनि मावनानै मोननाय आबादखौ अबंलावरिनि मुङाव बाउहरदोंमोन। आबेलआ गावनि गिबि जोनोम जानाय बोरमाखौ अबंलावरिनो बाउनो लाबोदोंमोन। अबंलावरिया आबेलनि बाउनायखौ आजावदोंमोन नाथाय बियो केइननि बाउनायखौ नाजावाखैमोन। बेनि थाखाय केइनआ रागा जोङो आरो बेरेद (सोगोम) नो हमो। बियो आबेलखौ बुथारनो थाखाय सोलो बानायो।

सानसेखालि बियो गावनि फंबाय आबेलखौ गावनि आबाद फोथाराव फैनो थाखाय खावलायो। जेब्ला बिसोर सानैबो फोथाराव फैयो, अब्ला केइनआ आबेलखौ बुथारो। बेबादिनो उनाव बियो बिखौ हा सिङाव फबो आरो बेनि थाखाय रावबो गुमुर मोनाखिसैदि बियो मा मावदोंमोन। नाथाय अबंलावरिया केइननाव सोंबाय, "नोंनि फंबाय आबेला बोरो? एसेबां गिथाव बाथाव खामानिखौ नोङो नोंनि फंबायनि सायाव मानो मावखो?"

अबंलावरिया मिथिगौदि केइनानो आबेलखौ बुथारदोंमोन। केइना सानदोंमोन रावबो बिनि थैनायखौ मोननाय नङा। नाथाय अबंलावरिया बेखौ मोनबाय। माखासे समाव सुबुंफोरा बबे गाज्रि बेखौनो मावो। बिसोर बेखौनो साननानै मावोदि, रावबो गावसोरखौ नुवाखै। नाथाय अबंलावरिया बेहाय सोर मा मावदों बेखौ लिरनानै लायो।

सानसेखालि बिनाया सालुखौ गावसोरनि उनदै समनि नआव फैनो थाखाय बुंदोंमोन। सालुवा बिनानियाव सोंदोंमोन बेवहाय मानो थांनांगौ। बिनाया फिननाय होफिनदोंमोन, "बेवहाय जोबोद समायना समायना गलाब बिबारफोर दङ'। बिगोमाया फोरबो (बन्द) नि थाखाय बेवहाय गैया। थु जों बैहाय थांनानै एसे खाहैनि।"

सासे राहुल मुंनि गथसाया सहराव थानाय लामानि बिजुलि साथिखौ अन्थाइजों खुबैयो। सासे लोगोआ बिखौ बेबादि खामानि मावनायनि थाखाय होबथायो। बियो राहुलखौ बुंबायदि, मानसिफोरनो बेफोर बिजुलि साथिखौ हरनि समाव नांगौ, आरो बियो साजा मोनगोन जुदि बियो हमजायो। नाथाय बियो बुंबाय, "सोर मिथिगोन, जुदि नों रावनोबो खिन्थायाब्ला?"

बेफोरो सुबुंफोरनि थाखाय मोननै बिदिन्थि जाय गाज्रिखौ मावो जेब्ला रावबो बिसोरखौ नुवा। माखासे सुबुंफोरा बेरा एबा लामाफोरनि सायाव लिरो नङाबा सावगारि आखियो, सानो रावबो मिथिया सोर बेखौ मावदों। नाथाय बेबादि साननाया गोरोन्थि। अबंलावरिया गासैखौबो नुयो आरो मिथियो । बियो जोंखौ बानथा होनो एबा साजा होनो हायो। अबंलावरिया जोंनि मोजाङै थैनायखौबो मिथिगौ। बबेखानि जुदि गुबुन सुबुंफोरा जोंनि मोजाङै थैनायखौ नुवा, अबंलावरिया बिसोरखौ नुयो। बियो जों मावनाय मोजां हाबानि थाखाय बानथा होगोन।