भारतनि दाउनि मानसि सलीम मोइजुद्दीन आब्दुल आली

भारतनि दाउनि मानसि सलीम मोइजुद्दीन आब्दुल आली

सलीम मोइजुद्दीन आब्दुल आली जाय बिथांखौ "बर्डमेन अफ इन्डिया" थामहिनबा भारतनि दाउनि मानसि मुंजों मिथिनाय जायो। बिथाङा सासे भारतनि गिबि सारिनि मिथिंगा बिगियानगिरि आरो दाउ बिगियानगिरिमोन। बिथाङा भारतआव दाउसिन-दाउलाफोरनि बिजिरसंनायाव मख'जाथाव बिहोमा होदोंमोन।

दाउसिन-दाउलाफोरा मिथिंगानि मोनसे गोसोबोथाव बाहागो आरो बेफोरखौ फरायनाया जोंनि आबहावाखौ साबसिनै बुजिनो हेफाजाब खालामो। भारताव, सलीम आली बिथाङा दाउफोरखौ फरायसंनाय आरो रैखा खालामनायाव गावनि जिउखौ बावसोमदोंमोन, जाय हाग्राजिब संरैखाथियाव अरायथा गोहोम खोख्लैदोंमोन। बिथांनि हाबाया जोंनि मुलुगाव दाउफोरनि समायना आरो गोनांथिखौ बाखनायनो थाखाय इयुन जोलैफोरखौ थोजासे थुलुंगा होदों।

सलीम आलीआ गावनि सोलोंथाइ सोलोंथाइ लानायाव जेंनाफोरजों मोगा-मोगि जादोंमोन। बिथाङा सानखान्थिजों जुजिनांदोंमोन, जाय बिथांखौ फरायसालिमा फोजोबनायनिफ्राइ होबथायो। उनाव बिथाङा मोनसे जिब बिगियान फरायफारि लायो आरो बम्बे मिथिंगायारि जारिमिन रैखाथुमसालियाव सासे लामा दिन्थिगिरि महरै खामानि मावो।

बांसिन मिथिनो गोसो जानाय, सलीमआ बार्लिन जुल'जिकेल म्युजियामाव प्रफेसार स्ट्रेसमैननि सिङाव दाउसिन-दाउलाफोरखौ बागै सोलोंनो जार्मानीआव थाङो। भारतआव फैफिन्नायनि उनाव, बिथाङा धोननि आंखालनि थाखाय गावनि हाबाखौ खोमाना लादोंमोन, नाथाय दाउ बिगियान बिगियाननि फारसे गावनि मोजांमोननायखौ बाउसोमबाय थादोंमोन।

सलीम आलीआ भारतारि दाउफोरखौ फरायसंनाय आरो रैखा खालामनायाव 60 बोसोरनिबो बांसिन सम हगारदोंमोन। बिथाङा हादोरनाङै दाउफोरखौ नायबिजिरदोंमोन आरो मिथिंगानि संरैखाथिनि थाखाय गोसो होनानै खामानि मावदोंमोन। बिथांनि नाजानायफोरा हाग्राजिब आरो मिथिंगायारि थाग्रा थावनिफोरखौ रैखा खालामनायनि गोनांथिनि बागै सांग्रांथिखौ बांहोनो हेफाजाब होदोंमोन।

सलीम आलीआ गावखौ बाउसोमनानै खामानि मावनाय आरो सुबुं समाजाव बिहोमा होनायनि थाखाय गोबां बान्था मोननो हादोंमोन। इं 1983 मायथाइयाव बिथांखौ भारतनि नैथि गोजौसिन नोगोरारि बान्था पद्म विभूषणजों मान होनाय जादोंमोन। बिथाङा 5 लाख रांनि मोनसे हादोर गेजेरारि बान्थाबो मोनदोंमोन, जायखौ बिथाङा बॉम्बे नेचुरल हिस्ट्री सोसायटीनो दान होदोंमोन।

बिथाङा लिरलांनाय गांनैसो बिजाबफोरनि मुङा जादों-

1.दि बुक अफ इन्डियान बर्डस (1941): बे बिजाबआ गोबां भारतारि दाउफोरनि सोमोन्दै गुवारै फोरमायथि होयो आरो मुलुगनाङैनो मुंदांखा जायो।

2.भारत आरो पाकिस्ताननि दाउफोरनि हेन्डबुक अफ दि बर्डस अफ इन्डिया एण्ड फाकिस्थान: एस. डिलन रिपलीजों लोगोसे लिरजानाय बे बिजाबआ गोबां बोसोरनि गोब्राब मावसोमनाय आरो बिजिरसंनायनि फिथाइमोन।

3.दि फ'ल अफ ए स्पैरोः बेयो सलीम आलीनि जिउ थुनफावथाइ जेराव बिथाङा गावनि जिउ आरो खामानिनि सल' खौ फोरमायदोंमोन।