मावजि बुन्दा आरो मानसिनि गियान मोननाय दाउस्रि फिसा
समायनाया मासे दाउस्रि फिसा फिदोंमोन। बिबै आरो बिबौआ बुंदोंमोन, "दाउस्रिखौ जेसेबांनो गोरलैयाव फियो मानसिनि गियानखौ बांसिन सोलोङो । साबसिन रायज्लायनो हायो। देरखानाय एबा गां सुखानाय दाउस्रि फिसाखौ फियोब्ला बारा मानसिनि गियान लाया।" बिबै आरो बिबौआ बुंनाय बादिनो समायनाया खालामदोंमोन।
गामिनि मानसिफोरा बुंदोंमोन, "दाउस्रि फिसाखौ मोजाङै फेदेरनोबा गुमा दाउस्रिखौ दौ। गुमा फाग्ला आरो गुमा दाउखाखौ दौनो नाङा, बबा जायो, राव रायज्लायनो रोङै जायो।" गामिनि मानसिफोरा बुंनाय बादिनो समायनाया खालामदोंमोन।
दाउस्रि फिसाया रायज्लायनोबो रोंबायमोन । बियो न'नि मावजि बुन्दाखौ नोजोर होबाय थादोंमोन। मावजिया ना गोरान आरो बेदर गोरान फोराननानै दोननायखौ खावनानै जायोमोन। माब्लाबा फरायसालियाव थांनाय गथ'फोरनो बाहागो खालामनानै दोननाय सारायनि बेदर बाहागोखौबो खावनानै जायोमोन। ना गोराना बहा थांखो, बेदर गोराना बहा थांखो होनना सोङोबा दाउस्रिया बिगोमानो खिन्थानानै होयोमोन। गावनि दायनि थाखाय मावजि बुन्दाया बिगोमाजों साजा होजाबाय थायोमोन।
सानसेखालि ना गोरान खावनानै जानायनि दायाव मावजि बुन्दाया सानथाम ओंखाम मोनजायाखैमोन। बिगोमाया बिखौ सानबा रसा फोनांनो होनना सानदोंमोन। मावजि बुन्दाया रसा नांनानै थानांगौ जादोंमोन। बेनि रागायावनो मावजि बुन्दाया खायदा खालामनानै सानसेखालि दाउस्रिखौ गेब बारसिननानै जादोंमोन। बेबादिनो मासे मानसिनि गियान मोननाय दाउस्रि फिसानि जिउआ अबथिरा जोबलांदोंमोन।
0 Comments