आरजाथाव थांनानै थानाय
गोबां मायथाइनि उननि बाथ्रा। गिलुबालु मोनसे मिथिंग्रायारि जाब्रबथायनि थाखाय बंग लैथो गेजेराव मोनसे दिप जाखांनायसै। जोबोद समायना आरो सानथ्रहायै गोदान गोदान बिफां-लाइफांफोरजों बुंफबनाय दिप बेयो। मुलुगनि गुबुन गुबुन अरनबारियाव जाय बिफांफोरखौ नागिरनानै मोननो थाङा बैफोरबादि असिना बिफां-लाइफांफोरा बे दिपआव दं। लाइफां बिगियानगिरिफोरा बे खौरांखौ बै ओनसोलाव थानाय माखासे जनजाथि सुबुंफोरनिफ्राइ मिथिनो मोनदों। मिथिनाय बादिब्ला बे दिपनिनो मोनसे बेसेबांबा रोजा अरनबारि दं जेराव मासेबो जिब-जुनार आरो एम्फौ-एनलाफोरानो थांनानै थानो हाया। नाथाय मा जाहोननि थाखाय बे अरनबारियाव जिब-जुनारफोरा थांनानै थानो हाया बेखौ रावबो दिनैसिमबो खिन्थानो रोङाखै। जायनो बे अरनबारियाव थाङो बिथाङा माब्लाबाबो न’ फारसे गिदिंनानै फैफिननो हाया। बेनिखायनो बे अरनबारियाव थांनो थाखाय रावबो आवगाया। रावबो बेवहाय थांनो गोसो जाया।
सानसेखालि बड’लेण्ड मुलुगसोलोंसालिनि साब्रै लाइफां बिगियाननि फरायसा संबिजिरगिरिफोरा असिना लाइफांनि बागै फरायसंनो थाखाय बै दिपफारसे रावना होबाय। बिथांमोनहा बंग लैथोआव जाहाज गाखोनानै बै दिपआव ओंखारफैबाय। बेवहायनो माखासे सान थानो थाखाय बिथांमोनहा लैथोनि बोरिमायाव थाबाय। गोबां लाइफांनि बागै बिसोर नायबिजिरनो आरो फरायसंनो हमबाय। गिलुबालु होननानै मिथिनाय अरनबारि फारसे बिथांमोनहा थांनो जोबोद गोसो जाबाय। बिथांमोननि मादाव गोजोनथाव होननाय सासे फरायसा संबिजिरगिरिया बुंबाय।
-जिउआव गिनायानो देरसिन नङा। जों गिनानै थायोबा जोंनि इयुन जोलैयाबो गिनानै बेसेबांबा गोबाव फावसयनानै थागोन। जों जोंनि फैबाय थानाय इयुन जोलैफोरनि थाखाय जायखिजाया खामानियानो गोरलैयै जानानै फैनायनि थाखाय साननांगौ। गिनायखौ नागारनानै जों दावगालांनायासो साबसिन। बेबादिबासो जाफुंसार एबा देरहासार जानो हायो।
देरहासार मुंनि संबिजिरगिरियाबो बुंबाय।
-जोङो संबिजिरनो थाखायनो बेवहाय फैदोंब्ला बेखौ मावफुंथारनांगोन। बे जायगानिफ्राइ माबा मोनसे गोमोथाव नमुना लानानै थांफिननांगोन।
बिथांमोननि सासे लोगोआ बुंबाय।
-थैनाय थांनाया खाफालनि खोथा। जों थैनाय नङाबो जानो हागौ। थु माबादि जिब-जुनार थांनानै थानो हायै अरनबारि बेयो दावगालांनि।
बिथांमोनहा गावसोरनि जि-जोमफोरखौ बेगआव सोनानै बिखुंआव बानानै लाबाय। साफ्रोमबो गाव गावनि केमेराखौ गोदोनायाव सैनानै लाबाय। बिथांमोनहा जोबनो गैयै गावसोरनि साहसखौ लानानै अरनबारि फारसे दावगालांबाय।
जोबोद गुदु आरो नुनो मोनफेरै असिना लाइफांफोरा बेवहाय दं। बिफां-लाइफांफोरनि बारफुनाय बिबारनि समायना आरो मोदोमफ्रुनायखौ बुंनानै फोजोबनो हाया। बेफोरखौ नुनानै बिथांमोनहा सोमोनांबाय। जोबनो गैयै गोजोननाय मोनबाय। बिथांमोनहा बेफोरनि समायना सावगारिखौ केमेराजों सेबखांनानै लाबाय। जोबोद गुसु अरनबारि बेयो। जेसेबांनो अरन गेजेराव हाबलाङो एसेबांनो गुसुआ बांसिननो हमबाय। बिथांमोनहा जोबोद गोजांनाय मोनबाय। गावसोरनि बिखुङाव बानानै लानाय थफ्लाखौ खेंफ्रुनानै बेनिफ्राइ गस्ला गुदुं दिहुननानै गानबाय। गावनि गोजांनायखौ सहायनो हायैबादि मोननानै देरहासारा बुंबाय।
-सहायनो हायैबादि गोजांनाय मोनबाय आं। हरसेमानि बेबादि गोजांजानांगौबा थैथारसिगोन।
बिथांमोननि दैमासा मुंनि सासे लोगोआ बुंबाय।
-बिफांनि दालाइ आरो बिलाइ गोरान बुथुमनानै दानदिसे अर सायनायानो मोजांसै। बेबादि खालामनानै हरसेखौ बारहोहरनोसै।
बिसोरो हानायमानि बिफांनि बिलाइ गोरान आरो दालाइ गोरान बुथुमनानै अर सुखांनो हमबाय नाथाय खायफा बिफांनि बिलाइया गोरानबाबो अरानो खामा। गोबां बिलाइ गोरान बुथुमनानै बिसोरो अर सायनो हमबाय। बेबादिनो जायै लोङै बिसोरो हरसेखौ खुनुरुखुम जोबोद खोस्थोनि गेजेरजों बारहोहरबाय।
अखानायै बिसोरो आरोबाव दावगाबावनो हमबाय। बांद्राय गुसु आरो हां लाखनो हायैबादि मोननानै बिसोरो साननायसै बे अरनाव थाबाय थायैआनो गाहामसै। नाथाय बांद्राय गुदु जानायलाय बिसोरो उल्था गिदिंफिननाय लामाखौनो मोनफिनासै। थाबायै थाबायै बेबादिनो बिसोर अरन गेजेराव बेसेबांबा गेदेर बिफांखौ नुनायसै। बे अरनबारियाव बेनो बयनिख्रुइबो देरसिन बिफां। बेनि दालाइ मोनफ्रोमबो नायनो समायना जाथावथाव दिन्दां-फादां फिथाइ। महरा कास्मिरनि मोनफ्रुनाय आफेल फिथाइबादि जारौरौ। बेनि सिङाव आरो सोरगिदिं सानथ्रहायै गेरेमसा आरो समायना असिना बिफांफोर।
बिथांमोनहा ओंखाम उखैनायाबो हामथारलामोन बेनिखायनो बिसोर बिफांनि फिथाइखौ नुग्रोमोनना खानो थाखाय होसोलांनायसै। जेब्ला बिसोरो बिफांनि फिथाइखौ खानो थाखाय आज्लंना आखाय फोलावना हमहैयो होनबानो फिथाइया गोजौ फारसे दावखोलांनायसै आरो गोमाहैनायसै। गोजोनथाव होननाय संबिजिरगिरिया लोगोफोरखौ दलर गसंनानै नायबाय थादोंमोन बिथाङा फिथाइयानोदि गावनि लोगोफोरखौ गोजौआव बोखोलांबाय बेखौ नुनानै बिथाङा सोमोनांनायसै। बिथाङा गोजौआव नायदावहरबा नुबाय सानथ्रहायै गोथैफोरनि बेगें। जोबोद रोजा आरो खोमसि दालाइ-बिलाइफोर। बिथाङा गावनि लोगोफोरखौ गोजौआवनो गाबख्रावबायनाय खोनानो मोननानै साननायसै, बिसोरो आरो गाहायाव फैफिननो हानाय नंलिया। बेयो जिब-जुनारफोरखौ जाग्रा जोबोरैनो सोमोनांथाव बिफां। बे अरनबारियाव जिब-जुनार थांनानै थानो हायैनि जाहोना बे बिफाङानो जानो हागौ। बेयो जिब-जुनारखौ जायो। बेयो बे अरननि गिलुबालु रायखस बिफां।
गिनानै गोजोनथावआ फायसयफिननायसै। बियो थाबायै थाबायै मोनसे बोरिमा ओनसोलाव सफैनायसै आरो बेवहाय सानैसो ओनलोलनि मानसिफोरखौ लोगो मोननानै गासै बाथ्राखौ खिन्थानानै होनायसै। गावनि लोगोफोरखौ गोमानायनि खौरांखौ खिन्थानानै होनायसै।
गामिनि मानसिफोरा सिखा आरो रुवा लानानै बे रायखस बिफांखौ दानफायनांगौ होननानै अरनफारसे दावगाबोनो हमबाय। बेबादिनो बिसोरो बिफांनि सिङाव फैयोब्ला बिफांनि फिथाइफोरा गाहायाव दिन्दां-फादां जानो हमबाय। मानसिफोरा सोरबा सोरबा फिथाइफोरखौ खानो थाखाय आखाय फोलावहरोबा मानसिफोरखौनो गोजौ फारसे बोखोलांबाय। हाजारबार होख्राव होख्राव गाबब्लाबो बिसोरो गाहाय फारसे फैफिननो हाया। बेखौ नुनानै मानसिफोरा बिफांनि फिथाइखौ दानस्रांनो हमबाय। फिथाइ गोमोना हायाव सिरिबानो जोबोद गोख्रै बिफां रज’नो हमो आरो अख्रां फारसे दावगालाङो। दान्दिसे समनि गेजेरावनो गिलुबालु फिथाइ थाइख्रिनानै बिफांआव दिन्दां-फादां जायो। फिथाइफोरा से घन्टासोनि गेजेरावनो मोनफ्रुयो। बेखौनो नुनानै आरोबाव मानसिफोरा सोमोनांथाव जाबाय। बिसोरो बे बिफांजों जुजिनो थाखाय जोबोद गिनाय मोनबाय। उनथाराव गोजोनथावआ बिफांनि फिथाइखौ दलरै गावनि बेग सिङाव सोना लानानै फैबाय। मानसिफोरा गाव गावनि न फारसे गिदिंनानै फैफिनबाय आरो गोजोनथाव बिथाङा बिसोरनिफ्राइ बिदाय लानानै बड’लेण्डसिम खुनुरुखुम सफैफिनबाय। मानसिफोरा सोंनायाव बिथाङा लोगोफोरनि दुखुनांथाव थैनायनि खौरांखौ खिन्थाबाय। खौरांआ रादाब बिलाइ आरो समाज बिजोंनि गेजेरजों गासै मुलुगावनो गोसारलांनो हमबाय।
संबिजिरगिरि गोमोथाव बिथाङा बिफांनि फिथाइखौ मोनसे आनजादसालियाव लाबोबाय। आनजाद नायनो हमबाय फिथाइ आरो बिफांनि आखुथाइफोरनि सोमोन्दै। बे फिथाइयाव मा गोहो दं। मानसिनो गोनांथि जानाय माबाफोर बेसेन होनो हागोन नामा बेबादिनो दासिमबो आनजाद नायनाया सोलिगासिनो दं।
0 Comments