बिबारफोरनि सोमोन्दै सोंनाय आरो फिननाय

मिथिंगानि समायना सोरजिफोरनि मादाव बिबाराबो मोनसे समायनाय सोरजि। बिबारा मिथिंगाखौ समायना खालामनानै लाखिदों। समायनाल' नङा बिबारफोरा मिथिंगा जिब-जुनार, एम्फौ एनला आरो दाउसिनफोरनो आदार जगायनानै होदों।

गोबां दाउसिन-दाउलाफोर दं बिसोरो बिबारनि बिदै सोबनानैनो थांनानै थायो। बिबारनि उनाव फिथाइ जायो, बेनिखायनो बिबारनि बेसेनखौ बुंनानै फोजोबनो हाया।

अरननि जिब-जुनारफोरा जेरै बिबारखौ आदार महरै जायो, दाउसिन-दाउला आरो बेरे सिखिरिफोरा जेरै बिबारनि बिदै सोबनानै थांनानै थायो बेबादिनो मानसिफोराबो बिबारनि सायाव लामा नायो।

मिथिंगानि गोबां रोखोमनि बिबारफोरखौनो मानसिफोरा आदार महरै बाहायो। गोबां रोखोमनि बिबारफोरखौनो मानसिफोरा फुजा आरो फोरबोफोराव बाहायो।

मानसिफोरा आदार महरै जानाय बिफांनि बिबारफोरा जादों- खारौखान्दाय बिबार, खमा बिबार, सेफालि, फोरला बिबार, जोगोनाद बिबार, लाउ आरो खुमब्रा बिबार।

मानसिफोरा फुजा आरो फोरबोफोराव बाहायनाय बिबारफोरनि मादाव दं- दाउदै बिबार, गेनदा बिबार, जबा बिबार, गलाब बिबार बायदि बायदि।

मुलुगाव गोबांथार रोखोमनि बिबारफोर दं। खायसे बिबारफोरखौ दासिमबो संदानानै दिहुननो हानाय जायाखै। दासिम लाइफां बिगियानगिरिफोरा माखासे बिबारखौ सिनायथि होदों आरो बेफोरो माखासे जुनिया गुन आरो मुंखौ मोननो हादों। गाहायाव मोननैसो होनाय जाबाय।

गलाब बिबार: बेखौ बिबारफोरनि मादाव बयनिख्रुइबो समायनासिन बिबार होनना बुङो। बेनि गुन आरो समायनाखौ बुंनानै फोजोबनो हाया। बेखौ बिबारफोरनि मादाव रानि होननानै बुंनाय जायो।

फामे बिबार: सरासनस्रायै बेयो हाब्रुआव बारो । बेखौ गोथार बिबार होनना बुङो।

राफ्लेसिया: बुहुमनि गासै बिबारफोरनि मादाव बयनिख्रुइबो देरसिन बिबार होनना गनायनानै लानाय जादों।

गन्दराज: जोबोद मोदोमनाय गुन थानायनि थाखाय बेखौ मोदोमनायनि राजा होनना बुङो।