औवाजों मा मा बानायो बेखौ मिथिना लानाया गोनां

औवाजों मा मा बानायो बेखौ मिथिना लानाया गोनां

औवाया लाइफांफोरनि मादाव मोनसे सुबुंनि जिउ खुंनायाव बाहायजानाय गोनांथार सम्फद। सुबुं माहारिया गोदो गोदायनिफ्राइनो बेखौ गावसोरनि नखर खुंनायाव मददनि थाखाय ननि खाथियावनो आबाद खालामबोदोंमोन। औवाजों गावसोरनि न लुनायनि अनगायैबो आबाद मावनाय, मैहुर खालामनाय, लामा हान्थिनाय आरो रंजानाय फोरबोराव गोनां जानाय आयजें-आइलाफोरखौ बानायनानै लादोंमोन। गाहायाव बर सुबुंफोरा औवाजों मा मा खालामो बेनि बागै होनाय जाबाय।

न लुनायाव बाहायनाय- गामिनि मानसिफोरा औवाखौ न लुनायाव मैखोमै बाहायनाय जायोमोन। गोदोनि समाव बर सुबुंफोरा औवाखौ दानखावनानै बेजोंनो फेराय, मान्दालि, उखुम मुदा, दरजा आरो खोरखि बानायोमोन। दरजा सुंथाग्रा लावथिबो बानायोमोन। लामानि दरखंआव औवाजों होरखिला बानायनाय जायो।

लामा हान्थिनायाव बाहायनाय- गोदो गोदायनि समाव औवाखौ लामा हान्थिनायाव गोबां बाहायनाय नुनो मोनोमोन। बोराय आरो बुरै मानसिफोरा औवाखौ थखन बानायनानै बेजोंनो सुंथानानै लामा थाबायोमोन। खाना मानसिफोरनि थाखाय औवायानो मददगिरि बादिमोन। बिसोरो लासै लासै औवानि लावथिजों लामा थुग्रोमनानै थाबायमोन। खायसे मेगन नुनाय मानसिफोरा औवानि लावथियाव फारसे हमनानै गुबुन फारसेजों खाना मानसिखौ हमहोनानै बोबायोमोन। दैमा गाथोनखौ बारनो थाखाय दिङारिफोरा औवानि लोरगि बानायोमोन।

मैहुर खालामनायाव बाहायनाय- गामिनि मानसिफोरा गावसोरनि मैहुर खालामनायाव गोनांथि जानायबादियै औवाजोंनो बायदि रोखोमनि हाथियार आरो आइजेंफोर बानायोमोन। दासिमबो गुबुन गुबुन जायगायाव बेबादि बानायनायखौ नुनो मोनो। औवाजों बोरला, बोरला थिर आरो जं बानायोमोन। ना गुरनो थाखाय औवानि जेखाय, ना लानो थाखाय खबाय बानायो, आरो गुबुन गुबुन राहाजों ना हमनो थाखाय औवाजोंनो सेन, खखा, फल, ना गावनो थाखाय जाबथु बानायोमोन। एनजर हमनो थाखाय औवाजों खैसार एबा खल बानायनाय जायो। खायसे दाउसिन गावनो थाखाय बानायनाय बाथुल आखायखौ औवाजोंबो बानायनाय जायो।

आबाद मावनायाव बाहायनाय- औवाखौ गामिनि बर सुबुंफोरा गावसोरनि आबाद मावनायाव गोनांथि जानाय बादियै बाहायनायखौ नुनो मोनो। हाल एवनायाव गोनांथि जानाय बादियै औवानि जुंगाल, लावथि, मै, सुखेन, बावखा, बेदानि हाथाय, हासिनि, अखा सिनायखौ होबथानो थाखाय खफ्रि बानायनाय जायोमोन। बारियाव फोरला, जिंगा, जोगोनाद, खुमब्रा आरो थाइबें बायदि आबाद मावोब्ला औवा बिजौखौ दानसनानै जायखौ जांसि होननानै बुंनाय जायो बेखौ बैसां बानायनाय जायो। मोसौ, मैसौ, अमा आरो बोरमाफोरा हाबनो हायैनि थाखाय औवाजोंनो बेरा बानायनाय जायो। न गाखोनो एबा गोजौआव थानाय मुवा बेसादफोरखौ हाननो थाखाय औवाजों जांख्ला बानायनाय जायोमोन।

नखराव गोनां जानाय माखासे आयजें-आयलाफोर बानायनाय- नखराव गोनांथि जानाय बादियै औवानि बायदि रोखोमनि आयजेंफोर बानायनाय नुनो मोनो। बेफोरनि मादाव माइ लामनो थाखाय दारहा, माइ दोननो थाखाय दुलि, माइ रोगानो एबा दाखो गारनो थाखाय खादा, माइ जावनो थाखाय संग्राइ, माइ सालिनि सानद्रि, माइ सालिनो सान्दांगा, मैगं खानो थाखाय मैगं खादा, गय दोननो थाखाय बाथा, दाउ बिमानो बिदै दैनो थाखाय खाथाख, लेखा फरायनायाव नांगौ जानाय सिकेल, ओंख्रि साग्लिनो सागं, ओंखाम एरखावनो थाखाय खादौ बायदिसिना। नखराव जिरायनो थाखाय औवाजोंनो लियार, मरा बानायनाय जायो। गोदो गोदायनि समाव उन्दुनो थाखाय गामिनि मानसिफोरा औवाजोंनो सखिबो बानायनाय जायोमोन।

गेलेनायाव बाहायनाय- गेलेनो थाखाय गामिनि सुबुंफोरा औवाखौनो गोदो बाहायबोदोंमोन। गेलेयाव औवाजों दाउब आथिं बानायो, गायथि, बाथा गेलेनायावबो बाहायनाय जायो।

गोजौआव होनायनि अनगायैबो गामिनि बर सुबुंफोरा औवाखौ हाबा, खेराय, सावरि-बादालिफोराव बाहायोमोन। सि दानायाव नांगौ जानाय बादियै औवाजोंनो माखु, जेनथोर, साल खुन्था, बौदांगि, आबै दांगि बानायमोन। मेला आरो सोरखारि हाबाफारिफोराव गाहायै फिरफिला बिरहोनायाव बाहायनाय जायो। गोथै बाननो थाखाय सांगि बानायनाय जायोमोन। दिनैसिमबो औवानि बाहायथिया बुंनो थाङोब्ला गोगोमैनो दंबायथायो।