हाग्रानि मोसौ मै

हाग्रानि मोसौ मै

लाइसि बिमाया मैया मोनानिफ्रायनो गोबागासिनो दं। गले गले गोबागासिनो दं बियो। लोरला जालायथारबाय बियो मुगैनानै खुदै गारै गारैनो। दिनै फुंआव गामिनि हालमाजि गल्लाया रांखौ खांफैब्ला बुंदोंमोन।

-जोबोद लासिंसिं जाथारबायलै ने बाजै! गावबुराया नखरसेयाव बाजौ खुरै खांनो खावलायदों जिबा रोजा रां हरफिननांगौनो होननानै।

-बाजौ रां खांनो खावलायदों?

हाग्रानि मोसौखौ ननिबादि मोसौ होननानै साननाय जाया।बुंनो थाङोब्ला मै बेदरनिफ्रायबो बिनि बेदरा गोथावसिन होननानै लाइसि बिमाया मिथिगौ। हाग्रानि मोसौ मै बेदरखौ हिन्दुफ्राबो जायो। नआवनि मोसौ बेदर जानायाव जेरै फाफ जायो, हाग्रानि मोसौ मै बेदर जानायाव फाफ जाया होननानै हाल्दुंफारानि खृस्टान नङै बर'फोरा बुङो।दाखालि लाइसि बिमा आरो फिसाय हंला सानैजों दुब्लियाव बेसर फुबाय थादोंमोन। बे समावनो बिसोर गामिनि सेंग्रा आरो बोरायसाफोरखौ फालो फालो बनगुरु आरो बनगुरु होननानै होसोनाय नुहरदोंमोन। एसेल' सोलो गैया लाइसि बिमानियावबो।

-थौहाय बोराय जोंबो होसोहैनि बाहागो मोनफा बायोखोमा।"

बाथ्राखौ बेबादि होननानैनो बिसि फिसाय सानैजों होसो हैफादों बिसोर। हाल्दुं फारानि आखाय गोथों फलान खुग्लुब रामसियारिया गावनि सिलाइ गादाजों थौ रौरौ होनलायनाय गावथारदों। अब्ला बनगुरुआ खारै खारै खरथेंमोननि मोसौ बेह्राजों सौलायनो हारांल' खुरहांदोंमोन।

गमामा लाइसि बिमा आरो बिमामोना फान्नै बाहागो मोनबोदों सेरब्रैनि एसे बारा। हराव साथा आथिंआव थुनानै सावजालाय, आरो ओंखामजों एवनानै जासे जानानै सान्दांगायाव अर सुलायना फोरान्ना दोनबावदों।

नाथाय मैया बेलासियाव सासे सेंग्रा फैदोंमोन बयबो दाजु होनग्रा सोरबा नेपालि माहाजोननि खुथिनि लावखार।

-जोंना मासे मोसौ दामब्रा गोमादोंलै! सोरबा नुदों नामा बबेजोंबा थांनाय? फालो नागारनाय मोसौआ एकदम गिथावथारमोन।

अब्ला बांबुला बोराय बनगुर होननानै जायखौ गावथारना बेदर जादोंमोन बेनि गाब आरो मोदोमनि दाथाय, गंआ माबादिमोन बेखौ बुंनानै होयो। लावखारा रागाजों बुङो।

-नोंसोर जोंनि मोसौखौ जाबाय? इनाय जाथारबाय नोंसिना। जिबा रोजा रां नांफिनखौ।

बिनि उनाव जै गामियाव बांबुला बोराया मोसौसोमोन होननानै खिन्थाबाय बयबो गोबासावनो हमबाय। फोरानना दोननाय बेदर गोरानखौ बारि बागान बारहो हरबाय। बांबुला गावबुरा बोरायाबो गारमा जिब्रालायनाय गोबानानै सिरियास। सिगांआवनो बियो मोसौसोमोन नामा? जागोन जा जाजाया साननानै गोसोआव सन्देह दंखायोमोन बिहा।

20 / 07 / 2020