गोग्गानाया सिगां फारसे खोख्लैयो

गोग्गानाया सिगां फारसे खोख्लैयो

गोग्गानायनि ओंथिया जादों बांद्राय गोजौद्राय आरो गावखौनो गोख्रैद्राय साननानै लानाय। सासे गोग्गामारा सुबुङा सानो बियो बयनिख्रुइबो साबसिन। बांद्राय दुग्गामाराया सासे सुबुंखौ फोजोबस्राङो। दुगामारा सुबुंफोरा सानोदि बिसोर गासैखौबो मिथिजोबखायो आरो बिसोर रावखौबो खोनासङा। बिदिन्थि हिसाबै सासे हिनजावसाया थाखोआव साननो हागौदि बियो थाखोआव बांसिन नंबर मोनगोन। बियो जोबोद रोखादि बियो रोखासिन हिनजावसा आरो रावबो बिखौ फेजेननो हानाय नङा। बे साननाया बिनि फरायनायखौ खम खालामनो हागौ। उनाव बे साननाया बयनिख्रुइबो खमसिन नंबर मोनहोनो हागौ। सासे दुगामारा सेंग्राया गावनि फोरोंगिरिनि सिगांआव आब्रुथि गैयै दिन्थिनो हागौ।

गोग्गानाया जोबथारनायाव गोग्लैनाय लाबोयो। सासे गोग्गामारा सुबुङा गुबुनाबोदि गावसोरनि बेसेन दं बेखौ बावगारलाङो। बियो गावखौनो बयनिख्रुइबो साबसिन सानो। बेवहाय गंसे दुगामारा ममबाथिनि सल' होनाय जाबाय।

गंसे दुगामारा ममबाथिया खोमसियाव जोंबाय थादोंमोन। बेखौ गंसे आरांगा सायाव दोननाय जादोंमोन। खथाया एसेबो खोमसि नङामोन जेब्ला ममबाथिया सोरां होदोंमोन। बेनि सोराङा खथाखौनो आबुं खालामदोंमोन। ममबाथिया दुगायैनो बुंनायसै, "आह! आंदि बेसेबांदि गेदेमा! आं आंनि सोरांजों खोमसिखौ सिफायनो हायो। रावबो आंनिख्रुइ देरसिन गैया।" दसेल' उनावनो मोनसे गुरै बारआ बारबोनायसै। ममबाथिनि सोरांआ खोमोर जानायसै। गासै खथायानो गुरै बारनि एसे बारनायाव खोमसि जाफिननायसै । अब्लाना ममबाथिया गावखौनो बुंनानानै लानायसै, "हे खाफाल! बेयो जाबाय आंनि दुगामारानि मोननांगौ साजा।"

बेबादि एखेयानो सुबुंफोरनि गेजेराव जायो जायफोर जोबोद दुगामारा। मोनसे समाव राधा मुंनि सासे हिनजावसा दंमोन। बियो जोबोद सियानमोन। बियो माबोरै सावगारि बोनांनांगौ (आखिनांगौ) आरो गाव फुननांगौ बेखौ रोंगौमोन। बयबो बिनि बेबादि रोंग'थिखौ गनायोमोन। बिनि फरायसालियाव मोनसे सावगारि आखिनाय बादायलायनाय जादोंमोन। राधाया बेवहाय बाहागो लानो गावनि मुंखौ थिसनदोंमोन। बियो रोखादि बियो थारैनो बान्था देरहागोन। बेनि थाखायनो बियो मोजाङै थालिम खालामाखिसै आरो गावखौनो बादायलायनायनि थाखाय थाख थियारि जायाखिसै। बेवहाय गोबां बादायारिफोर दंमोन। बिसोरनि गेजेराव उमा मुंनि सासे हिनजावसा दंमोन। बियो राधाबादि एसेबां मोजां महरगिरि नङामोन।

बादायलायनायनि सानथामनि सिगां, राधाया उमाखौ बुंबाय,"नोङो नोंनि मुंखौ बोखारनायानो साबसिन जागोन मानोना बे बादायलायनायाव आंनो गमामा बान्थाखौ देरहानो हागोन। नाथाय उमाया बुंबाय,"आं आंनि मुंखौ थिसननायनिफ्राइनो नाबाय थादों।" उमाया सानफ्रोमबो गुबुन गुबुन गाबफोरजों थालिम खालामबाय थाबाय। बादायलायनाया समफैनाय समसिम बियो गुबुन गुबुन रोखोमनि सावगारिफोरखौनो गाब फुननो नाजादोंमोन।

बिसोरो समायना नुथायफोरखौ आखिनो बिदोंमोन। बिसोरनि बयबो गावसोरनि साबसिन हामसिनै नाजादोंमोन। अखानायै, बादायलायनायनि फिथाइखौ फोसावनायसै। बेवहाय राधाया नङा उमायासो बान्थाखौ देरहानो हादोंमोन।

राधाया उमाखौ लोगो हमनो लाजिनाय मोनदोंमोन। बियो बादायलायनायनि सिगांआव उमाखौ मा बुंदोंमोन बेखौ गोसोखांनानै लाजिनाय मोनबाय। बियो मिथिबायदि बियो गावनि बाथ्राखौ मन'नानै लाथारनांगौमोन। बेयो बेबादि बान्थामोनदि बियो गावनि गोग्गानायनि थाखायनो होथारनांगौमोन।

(थाखो ब्रैनि मोरेल चाइन्स बिजाबनिफ्राइ ‘प्राइड गस बेपर ए पल’ आयदाखौ उदाङै राव सोलायनानै होनाय जाबाय)