नाराबारियाव जों उन्दै समाव बायदिसिना गेलेयोमोन
जोंनि गामिनि गासैबो मानसिफोरानो आबादारि गोजामोन। रावबो सासेबो साख्रि मावनाय गैयामोन। बुंनो थाङोब्ला लेखा-फरा गोरों मानसियानो जोंनि गामियाव गैयामोन। जोंनि गामिनि नखरफ्रोमहाबो दैज्लां बोथोर फैयोबानो माइ आबादखौ गायोमोन। सोरहाबा एसे, सोरहाबा एसे बांसिन बेबादिनो बोसोरसेनि थाखाय बोथोर फैयोबा जानो आनथा माइ आबादखौ गायनानै लायोमोन। जोंनि गामिनि थाखाय दैज्लां बोथोरानो जादों माइ आबाद मावनायनि साबसिन बोथोर। बे बोथोर सफैयोबा बयबो गावबा-गाव माइ आबाद मावनो थाखाय साखा-फारा जायो।
जों गामिनि सानैसो माहाजोनफोरहा दैज्लां बोथोर सफैयोबा रुवाथि आरो दाहोना हालिनै गाहाम लानोबो गोनां जायोमोन। जायफोरहा गायनो फुनो थाखाय हा गैजाया बिसोरो बोथोर फैयोबा माइ खामला हायोमोन आरो मावनायनि मोननांगौ बादियै माइ लानानै थाङोमोन।
उन्दै समाव गामिनि माइ दुब्लिजों आंहा गोथौ सोमोन्दो दंथारमोनलाय। सानफ्रोमबो बेवहायनो मोसौ आरो बोरमा खाहैयो, ननि माबा मोनसे खामानि दंब्ला खामानि मावहैनांगौ जायो, दैज्लां फैयोब्ला हालेवनाय, आलि खोनाय, खोथिया रोगानाय, ओंखाम हैनाय, माइ गायनाय बेफोर खामानिफोरा सोलिबाय थायोमोन। बेबादिनो ना नांबाय बायोखोमा मोनजानायनि आसाजों खखा सानाय, माइसा दांनाय, सिबुं आरो आजोनाय मैगं नागिरनाय जायोमोन। माइया जेब्ला मोनो बे समाव दुब्लियाव एनजर हाबो। बेबादि समाव खल एबा खैसार बानायनानै एनजरखौ गावनि थाबायग्रा लामायाव सानानै दोनोमोन। सोरांस्लाब मोनै माइबारियाव निहिर बुस्रि बुस्रि एनजर सानानै दोननायखौ नायनो थाङोमोन। बेलासियाव खैसार सानानै दोनबा माब्लाबा हर गेजेरावनो सिमाङाव एनजर नांनाय सिमां नुगुलायोमोन। फुङाव जेब्ला नायनो थाङो होनबा बेबादिनो एनजरखौ खैसाराव नांनानै थानायखौ नुनो मोनोमोन आरो नसिम लाबोनानै आदार हिसाबैबो जानाय जायोमोन।
माइया जेब्ला मोनो होनबा बेखौ खासि लानानै हानांगौ आरो बजा खानानै खर’आव रुजुननानै, माब्लाबा बावखाजों फाफ्लियाव बाननानै लाबोनांगौ, बेबादिनो माब्लाबा मोसौ गारियाव दैखांनानै नसिम लाबोनांगौ आरो मारा होनांगौ जायोमोन।
माइ दुब्लियाव जेब्ला माइखौ हायो होनबा बे जायगाया नाराबारि जानानै थायो। दुब्लिनिफ्राय माइखौ नसिम लानानै फैनायनि उनाव बेवहाय मोसौ खानो हानायनि खाबुवा थायो। नाराखौ मोसौआ जानानै माखासे सम गुफुं लोदो लोदो जागुलायो। नाइ हागोदान नाराया गोदै जायो।
बेनि मादाव आरोबाव खायसे माइनि नाराया इनायनो गोदैसिनथारबाव। नाराखौ मोनजानायनि अनगायैबो दुब्लिनि आलियाव रज’नाय गांसोफोरखौ मोसौआ जोबोद गाहामैनो जानानै गावनि उदैखौ सुफुंना लानो हायो।
माइ हागोदान नाराबारियाव जों उन्दै समाव जोबोद गेलेयोमोन। जोंनि गामियावथ’ बुंनो थाङोब्ला गेलेग्रा मोजां फोथार गैयामोन बेनि थाखायनो लामा, ननि सिथ्ला आरो माइ दुब्लियावनो गेलेनो गोनां जायोमोन। जेब्ला माइखौ दुब्लिनिफ्राय रोगानानै लाबोयो होनबा गेलेनो थाखाय जोबोद मोजां जायोमोन।
नाराबारियाव जों गोबां रोखोमनि गेलेनायफोरखौ गेलेयोमोन। उन्दै समाव जों नाराबारियाव गेलेनाय खेलाफोरा जाबाय- होसोलायनाय, जल्दा, गायथि गेलेनाय, बाथा गेलेनाय, खाफाल गावलायनाय, खुवा एबा बाथाम जाबनाय, खाबादि, आथिं लेंग्रा एबा बायगन बासा गेलेनाय, दाउस्रि आथिं गाखोना थाबायनाय एबा खारनाय बादायलायनाय, खै गोलाव आरो गोजौ आरो गोलाव बारनाय लोगोसेनो खेरेड गेलेनायफोरानो दाबो आंनि गोसोआव फैयो।
होसोलायनाय, खै गोलाव आरो जल्दा बेफोरबादि गेलेनायखौ जों माखासे सम बुंनो थाङोब्ला सानफ्रोमबो गेलेयोमोन। मानसि बाहागो रानलायनाय समाव सानैया बिमा जायोमोन। बेबादिनो जों गोलाव गुसुं नाम लानानै बिमाफोरजों थाफायोमोन आरो बेबादिनो गेलेनाया जोबोद मुजिनां सोलियोमोन। बादायलायनाया जोबोद गाहामैनो जायोमोन। माब्लाबा माब्लाबा नांज्लायनाय आरो बोराबलायनानैनो गेलेनाया थुंगेयोमोन।
जल्दा गेलेनायाव जागायनायनि सिगाङावनो रोजाबनाय दोंसे मेथाइखौ आंहा दाबो गोसोआव फैयो। मेथाइखौ जों ओरैबादि रोजाबोमोन।
जल्दं माल्दं नारिकल दं
राजा खुरासे खुमब्रा जरा
दिब’ना ना दिब’
महाराज
मेथाइया हारसाफोरनि रावैनो रोजाबनाय। बायगन बासा गेलेनायाव उनथिं आथिं हेबलायनानै आखाय खबै खबै ओरैबादि बुङोमोन- बायगन बासा ख्रिं ख्रिं…..।
खाबादिखौ जों आब’ आरो हिनजावसा लोगोफोरजों गेलेफायोमोन। खाबादि गेलेनाय समावबो रोजाबनाय माखासे मेथाइफोर दंमोन। गोबां मेथाइखौनो आं बावगारलांजोबबाय। नाथाय दोंसे मेथाइखौ दाबो गोसोथांनो हायो।
जाय खांख्रिखला खांख्रिखला
रामफागुरि देगार फाथि
फाथि फाथि…………
औवा बारियाव थाङोबा औवा दाननानै बिजौ गारबोनायखौ नुनो मोनोमोन। बैफोरखौनो लाबोनानै जों जोबोद मोजाङै दाउब’निबादि आथिं बानायोमोन। बेवहायनो गाखोनानै जों दुब्लिबारियाव खारनाय बादिलायमोन। माब्लाबा गान्थिया थारला गानानै गोलैजानाय गोबां समावनो जायोमोन। माब्लाबा लामायाव गोग्लैनानै आरो माब्लाबा फेनदाया हायलाब जानानै थै गयोबा जों हाद्रि फुनना लानानै थै गनायखौ होबथानो नाजायोमोन।
सेंग्रा दिखुरा दिखुरा जयै लोगो लाज्लायनानै जों बाथा गेलेयोमोन। बाथा गेलेनाया मोनसे जोबोद गिलुबालु नाथाय मुजिनां गेलेनाय। बे गेलेनायाव माब्लाबा माब्लाबा बाथा बुगारनायाव खर’आव नांजायोमोन आरो माब्लाबा मोदोमाव। मेगनाव नांजानोबो जोबोद गिनांगौ दं। खर’ नांजानानै माब्लाबा जोबोद होख्राव होख्राव रौवा रौ गाबनो गोनां जायोमोन। खर’निफ्राय थै बोहैलायनायबो जादोंमोन जोंनि गेलेनाय समाव।
बाथा गेलेनाय समाव मोनसे हिसाब साननाय जायोमोन। बेनि साननायखौ आंहा दाबो गोसोआव दं। साननाया ओरैबादिमोन- एरे दौरे थिलिया सावरि साफा सिख जुद’।
खुवा गेलेनाया जोबोद मुजिनां गेलेनाय। गेलेदावबाथाय बे गेलेनायखौ नागारनो बालायो। बे गेलेनायनि थाखाय थोजासे बाथाम एबा थबथा फिसा फिसा नांगौ जायो लोगोसे थोबसे मुजाजों बानायनाय बल। हानजा मोनसेया बलजों हानजा मोनसेनि मानसिफोरखौ साफा साफा मोदोमाव खुबैना फोनांनानै बुथारनांगौ। आथिं आरो आखाय मोननैबो हानथुनि गाहायाव नाङोबा थैया। खारनानै बलखौ खाबु लानानै जोगारनांगौ आरो बाथाम एबा थबथा थुख्राखौ जाबनानै फोजोबनांगौ। देरहायोबा गले गले गेलेबाय थानो मोनो।
बारनाय, बुलायफ्लानाय आरो उल्थंलाय फाल्थांलाय गेलेनो इनायनो मोजां मोनथारोमोन जों। माब्लबा मोसौ लायनांगौ दंबाबो मोसौ लायनो बावनानै गेलेबाय थानायनि थाखाय बिफाफोरजों बुनो होसो जागुलायोमोन।
गेजेर आरौ गोजौ फरायसालियाव फरायनाय समाव जोंनि फरायसालियाव स्नि साननि थाखाय बोसोरारि गेलेनाय बादायलायनाय हाबाफारि थायोमोन। बे समाव जों गोजौ आरो गोलाव बारनायखौ सोलोङोमोन। फरायासालियाव बेबादिनो आं गोजौ आरो गोलाव बारनायाव बान्थाबो मोननो हायोमोन।
खाफाल गावलायनाय गेलेनायखौ जों बांसिन लामाफोरावसो गेलेयोमोन थेवब्लाबो नाराबारियावबो गेलेयोमोन। खाफाल गावलायनायाबो मोनसे जोबोद मोजां मुजिनां गेलेनाय। बेवहाय हानजा मोननै जायो । मोनफ्रोमबो हानजाहानो साफा बिमा थायो आरो बियो गावनि लोगोफोरखौ फिथाइ सामथाइ नङाबा जिब जुनारफोरनि मुं दोननानै लायो। बेबादिनो गुबुन हानजानि सोरखौबा मेगन फांथेनानै गावनि लोगोफोरखौ मुं गाबज्रिना लेंहरोमोन। लेंहरजाग्राया सिरि सिरि फैनानै खाफालाव खेबसे गावनानै थाङो। मेगन बोखारनानै होबा खाफाल गावजाग्राया सिनायनो हानांगौ सिनायनो हाया खाफाल गावग्रा हानजाया देरहानायनि थाखाय खाबु थायो।
आलि आरो दुब्लियाव गुदुं खुरनानै थानाय एनजरखौ जों जावोमोन। माब्लाबा सानसेगाहाम नाराबारियाव एनजर जावनानैनो सानसेनि जोबोद बेसेन गोसा समा बारगलाङोमोन। एनजर जावनाय समाव सानजाजों नुजाबोनाय सानआ माब्लादि सोनाब फैसालियाव दोबैलांनानै खोमसि जाबोखो बेखौ हमनोनो हास्लाबामोन।
आथिखालनि खुदियाफोरा नाराबारियाव गेलेनो मोननायनि खाफाला गैलिया। जों गेलेबोनो मोननाय बैफोरबादि गेलेनायखौ बिसोर मोजांबो मोनलिया। खायफा गोग्लैसोनाय गामिनि साफा-सानै गथ’फोराल’ बेफोरबादि गेलेसै।
उन्दै समाव जों जेरैबादि हालो दैलो गेलेनानै समखौ बारहो हरदोंमोन दानि गथ’फोरा बेबादि गोसोबादि गेलेनो मोनलिया। बिसोरखौ एसे बैसो जाबानो मोजाङै फरायनो थाखाय बिमा बिफाफोरा हस्टेलाव दोनहैयो। गावनि फिसाफोरखौ फरायनानै मानसि गेदेर जानायखौ बयबो बिमा बिफाफोरानो लुबैयो। गथ’फोराबो जेरावनो दोनहैयो बेवहायनो थाहैनो गोनां जायो। नाथाय गोबां गथ’फोरखौनो हस्टेलनिफ्राय नसिम खारखोमाबोनायखौबो खोनानो मोनो। हस्टेलाव बिसोरनि गेलेनाय आरो रंजानायफोरा आलादा रोखोमनि जायो।
गोबां गथ’फोरानो फोथार आरो दुब्लियाव गेलेनो नागारै बिमा बिफानि मबाइल फनखौ लानानै जानला मोनला युटुबआव ओंखारलाबायनाय सावथुनफोरखौ नायबाय थायो। खायसेफोरा मबाइलनि बायदि रोखोमनि खेलेफोरखौनो मेगन गोजा जालायजासे सानफाथोलो रावजोंबो रायज्लाया लासे सिरियैनो न’ सिङाव एबा बबेबा खनायाव हाबसोनानै जानो लोंनो मिथिलायै गेलेबाय थायो।
उन्दै समाव जेब्ला जों नाराबारियाव गेलेयो नाराबारिया जुदि गोदान जायो होनबा नाराफोरा जोंनि आथिं आदैफोरखौ थुलाबोमोन। गेलेनाखांनायनि उनाव जेब्ला आथिं सुयो होनबा जोबोद आलौनाय मोनोमोन। गेलेनायजों मेंनानै मोनाबिलियाव बिजाबखौ मोजाङै फरायनो हायामोन। जोबोद थाब थाब उन्दुनो ओंखारोमोन। ओंखामखौ हले जोबोद मोजाङै बुरजा जानो हायोमोन।
0 Comments