निसिमा ओनसोलनि सोलोंथाइयारि थासारि आरो फरायसाफोरनि जेंना

निसिमा ओनसोलनि सोलोंथाइयारि थासारि आरो फरायसाफोरनि जेंना

निसिमा होननानै बुङोब्ला सिरां जिल्लानि सिङाव थानाय मोनसे गोग्लैसोनाय गेदेर हाग्रा बंग्राजों साग्लोबजानाय जायगानि मुंखौ गोबां मानसिफोरा मिथिगौ। बङाइगाव सहरनिफ्राइ साफागुरि जानानै साहा फारसे फैयोब्ला मोनफैयो फारियै बभानिफुर, आमगुरि, खैला मैला, आमटेका आरो मालिभिटा। दिउआ दिउआ बेसेबा गोलाव बारज्ल’-बुरज्ल’ सिनस्रि सागुलायनाय हाद्रि-बालाजों दाजानाय बायला-जिला लामा सहरनिफ्राइ गंगार हाजोसिम। गामिनिफ्राइ सहरसिम लानानै थांबाय थानायावनो माब्लाबा बेमारिया दुब्ला थैलाङो, माब्लाबा सोरबा आइजोआ लामा गेजेरावनो लेलाय लेलाय गथ’ जोनोम होनो गोनां जायो।

बेंटलथिंनिफ्राइ दैमा दैसा बारनानै फैयोब्ला मोनबोयो औगुरि, फाटाबारि आरो ग्रोब आमटेका। बे ओनसोलनि साहाजों भुटान रायजो, सानजाजों सुबाइझार, खोलाजों काग्राबारि, साफागुरि आरो सोनाबजों दं बेंटल आरो तुक्राझार। निसिमानि सोरगिदिं थानाय मोनफ्रोमबो जायगानि रुजुनायाव मोनफ्रोमनिबो निसिमा ओनसोला गासैबो बिथिङावनो उन जानानै दं। लामा-सामा, सोलोंथाइ, आबाद दिहुन्थाइ, हारिमु, थुनलाइ, रांखान्थि आरो राजखान्थियारि मोनफ्रोमबो बिथिङावनो उन। बेनि जाहोना जादों निसिमा ओनसोला सोलोंथाइयारि बिथिङाव गोग्लैसोनाय। मख’जानाय गुबुन गुबुन जायगाफोरनि रुजुनायाव निसिमा ओनसोलावनो लेखा गोरोंनि अनजिमाया खमसिन। लेखा फरायनो थाखाय नांगौबादि फरायसालि आरो फरायसालिमा नागिरना मोननो गोब्राब बे ओनसोलनि सिङाव। बुंनो थाङोब्ला दिनैसिमबो गंसेबो फरायसालिमा होननायानो गैया। बिसायखथिनि समफोराव, गोनां जायोब्लाबा दैदेनगिरि आरो सोरखारनि मानसिफोरा बेवहायनो गिदिं गिदिं थाङो थेवबो अनखांनाय फैयोना फैयाथाय...। राजखान्थिगिरि दैदेनगिरि आरो सोरखारजों दिनैसिमबो नायसनजाथाराखै निसिमा ओनसोला। गोजौ फरायसालिखौ बागरग’नायनि उनावनो गोजौ सोलोंथाइ लानो थाखाय बिजनि, बङाइगाव, बेंटल, काजलगाव, कक्राझार जेरावनो गोसो बेवहायनो थांनांगौ जायो। जायफोरा एखेबारे जोबोद गोरिब बेसेराफोरा फरायनो गोसो थाबावबाबो थाखा फैसा गैयैनि थाखायनो फरायनायखौ नागारनो गोनां जानानै फैयो। फरायनायखौ गारनांगौ जायोबाथाय मा मावनानै जाबावनो सोरबा बिफाया जेरै हाल-खुदालजों जिउ खुङो बेबादिनो जिउ खुंनो गोनां जायो। सोरबा बेखौबो बायोबा मेघालया, बांगालुर नङाबा भुटानफोरबादि जायगायाव थांनानै जिउखुंनांगौ जायो। आलाय-सिलाय जाहैनानै गोमाहैनाय आरो सोरजोंबा खास्रि-बुथारजाहैलाबायनाय खौरांखौबो मोनबायानो थायो। जायफोर गोजानाव थांनानै खुनुरुखुम गोजौ सोलोंथाइ लाहैनो हादों बिसोरो एसेब्लाबो गावनि आथिंआव गसंनो हानायबो जादों। फिसा-फिसौ साख्रि मावनाय, बेफार-फालांगि खालामनाय आरो मोजाहै जाय जेरै हागौ दुखान-गला सालायनायखौबो नुनो मोनो।

नाथाय गोथौयै नोजोर होनानै नायोब्ला नुनो मोनोदि गोदोनिफ्राइनो दासिमबो निसिमा ओनसोलनि सोलोंथाइयारि थासारिया मोजां नङा। ओनसोलनि फरायसाफोरा गावसोरनि सोलोंथाइ लानायाव जोबनो गैयै जेंनाफोरजों मोगा-मोगि जानो गोनां जाबाय थादों। बेफोरबादि जेंनाफोरनि मादाव दं मिथिंगायारि जेंना, राजखान्थियारि जेंना आरो सरासनस्रा माखासे समाजारि जेंनाफोर।

मिथिंगायारि जेंनानि बाथ्रा बुंनो थाङोब्ला दैज्लां बोथोराव जानाय दैबानाया जादों ओनसोलनि फरायसाफोरनि सोलोंथाइ लानायनि थाखाय मोनसे जोबोद गेदेर जेंना। औगुरि, फाटाबारि आरो बेटिनि बायदि गामिनि फरायसाफोरा सानजा फारसे लांखार दैखौ बारबोनानै सोलोंथाइ लानो थाखाय फैनांगौ जायो। औगुरि आरो फाटाबारिनि फरायसाफोरा दैज्लांनि समाव लांखार दैखौ बारबोनानै आमगुरियाव सोलोंथाइ लानो फैनो हाया जायो। फाटाबारि आरो बेटिनि गामिनि फरायसाफोरा गोबाङानो आमटेका गोजौ फरायसालियाव फरायनो फैयो। दैज्लांनि समाव बिसोर दैबाना जायोब्ला लांखार दैखौ बारनानै फैनो हाया। माब्लाबा दान मोननै गाहाम फरायसालिसिम थांलाय-फैलाय खालामनायखौ बन्द’ खालामनो गोनां जायो। सम सम खुनुरुखुम दैखौ बारनो थाखाय दिंग्रा जावोबाबो फरायसालिनि समा बारा जालायजासे नेनानै थानांगौ जायो आरो गिलुं गिलुं दिंग्रा गाखोनानै गस्ला लंफेन गिसियै फरायसालियाव फैनांगौ जायो। दासिम लांखार दैसानि सायाव गंनैसो दालां थानायमोनबा बेफोरबादि जेंनाखौ जानो हागौ ओनसोलनि गथ’फोरा बेबादियै बुगिनांगौ थानाय नंलियामोन।

राजखान्थियारि जेंनाया जादों निसिमा ओनसोलनि फरायसाफोरनि सोलोंथाइ लानायनि थाखाय मोनसे गेदेर जेंना। दिनैसिमबो निसिमा ओनसोलाव राजखान्थिनि गोहो थानाय नांगौबादि दैदेनगिरि उजियाखै। बेवहाय मन्थ्रि आरो एम एल एफोरनि जोबोद आंखाल, जाय बिथांमोनहा एसेब्लाबो जायगानि गोनांथिफोरखौ सुबुंनो हायो। लामा-सामा गाज्रि, मोजां फरायसालि, फरायसालिमा आरो फसंथान गैयैनि थाखाय ओनसोलनि फऱायसाफोरा गोसो थासेयावबो नांगौबादि सोलोंथाइ लानो हायाखै। राजखान्थिनि गोहो थानाय सुबुंफोर थानायमोनबा जानो हागौ दिनैसिम बेवहाय मोजां मोजां गंनै गंथामसोबाबो सोलोंथाइ फसंथान गायसन जागौमोन आरो ओनसोलाव सोलोंथाइनि थासारिया मोजां फारसे दावगाबोगौमोन।

सरासनस्रा माखासे जेंनाफोरा बे ओनसोलनि सोलोंथाइ थासारिखौ जौगानो खाबु होआखै। बेफोरनि मादाव दं निखावरि, लेखा फरा रोङै बिमा-बिफा आरो हाग्रानि जिब-जुनारफोरनि उदखार। निसिमा ओनसोलनि सिङाव थानाय गोबां गामिफोरानो हाग्रा बंग्रानि सिङाव फसंजानाय। सम सम बेवहाय हाग्रानि मैदेर, मोसा, लख्रा आरो सियालफोरा फैनानै उदखार खालामफैयो। बेफोरनि सायावनो गिलुं गिलुं थानानै फरायसाफोरा गोसो होनानै फरायनो हाया। गोजौ सोलोंथाइ लानो खाथियाव फसंथान गैयैनि थाखायनो गंगार हाजो सेराव थानाय मालिभिटा, जनता, मोखोनागुरि, मैनागुरि, सेसा बाजार बायदि जायगानि फरायसाफोरा स्नि-दाइन किल’ मिटार गाहाम साइसेल सालायनानै आमगुरि आरो खैला मैला बायदि गोजौसिन गेजेरारि फरायसालिफोराव सोलोंथाइ लाहैनो गोनां जायो। फुङाव सोरांबानो न’निफ्राइ ओंखारनाय आरो मोनाबासो नआव सहैफिननाय बेफोरबादि गेदेर जेंनाजों बिसोरो जुजिनो गोनां जायो।

गोबां लेखा फरा रोङै बिमा-बिफारानो फरायसाफोरनि गोगो सोलोंथाइ लानायनि बाथ्राखौ साननो हाया। गावसोरनि गथ’फोरखौ मा समाव फरायनो होनांगौ आरो माबादि जोथोन लानांगौ बेनि थाखाय एसेबो सांग्रां नङा। गोबां बिमा-बिफाफोरानो सान-हर जौ लोंनानै नखराव दावराव-दावसि नांज्लाय-खमज्लाय खालामबाय थायो। गोबाङानो फिसाफोरनि फरायनाय एबा सोलोंथाइ लानायाव गोनां जानाय बिजाब, रेबगन, फिनसिल आरो गाननाय फेन-गस्लाफोरखौ थिग समाव जगार खालामनानै होनो हाया। नआव मोजाङै जिरायनानै फरायनो थाखाय गंसे मोजां आरांगा, गंसे सियार आरो गंसे बाथि एबा मोब्लिबनि जगार खालामनानै होनो हाया। थाखो गु आरो जिआव फरायनाय गथ’फोरा जौ फाग्ला बिमा-बिफाजोंनो खथा मोनसेयाव उन्दुफानो गोनां जायो बेबादिनि थाखाय बिसोरनि बुदुं बुदुं रायज्लायनायखौ खोनासंबाय थानांगौ जानायाव गोसो होनानै फरायनो हाया। बेफोरबादि सरासनस्रा जेंनाफोरजों बुगिनांनायनि थाखायनो ओनसोलनि गोबां फरायसाफोरानो फरायनो गोसो जाया।

गोबां नखरफोरा जौ फाननानैसो जिउ खाङो। बिसोरनि गथ’-गथायफोरनि सोलोंथाइ लानायथि खोथाखौ मा बुंनो? बिमाया सानसेथारला जौ संनाय आरो जौ सरनानै होनायावनो सान-हर मुखुब। बिफाया खामसालियाव हर-सान उन्दुसोनानैनो गोब्रामबाय थायो। हाजो सेर सेराव थानाय खायसे नखरफोरा खोमसि फोथायनायजों बेंखनजानाय। बेबादि नखरनि गथ’फोरनि गोसोआव जेब्लाबो गिनाय आरो लाजिनायजोंनो साग्लोबजानाय। लेखा-फरा रोङैनि थाखायनो बेराम-आजारा जायोब्लाबो दाक्टारफोरनियाव थांनो गिनानै अजा हमै हमै सानफ्रोमबो मोदाय होखारनायाव मुखुब जानानै थाग्रा गोबां नखरफोर दं। नखराव जिउखौ लानानै गेलेबाय थानायावनो गथ’-गथायफोरनि थाखाय सोलोंथाइनि मोजां आबहावा सोरजिनो हायाखै।

गोबां जाहोननि सायाव सोनारनानै गामिनि गोबां फरायसालिफोरानो थैलांबाय। खायसे मोजां फोरोंगिरिनि आंखालाव फरायसाफोरा फरायसालिखौ नागारनानै गावारि फसंथानफोराव फरायहैबाय। बेबादिनो फरायसालियाव फरायसानि अनजिमाया खमायनानै गुबुन फरायसालिजों जरजाबजाबाय। गथ’फोरा जाहाथे मोजाङै रोङो बेखौ साननानै खायसे बिमा-बिफाफोरा नेहाद गोरिब निखावरिब्लाबो गावारि फरायसालिफोराव गथ’फोरखौ फोरोंहैबाय। बेबादिनो रांखान्थियारि जेंनायाव गोग्लैनानै नखरफोरा मिरौ-जिरौ जानायबो दं। गेजेर ससेयाव रांखान्थियारि जेंनायाव गोग्लैनानै गथ’फोरखौ मोजाङै फोरोंफुंनो हायैयाव गथ’फोरा गोदाव-सोराव जानायखौबो नुनो मोननाय जादों।

जायगा जायगा खायसे ओरैबादि नखरफोर दंदि जेराव नखरनि गासैबो सुबुंफोरानो मोजां बाथ्रा रायज्लाया। जौ लोंनानै, निसा बेसाद जानानै एबा सोबनानै नखराव गाज्रि गाज्रि बाथ्रा रायज्लायो। खायसे गामियावबो बेबादिनो सोलियो। बेफोरबादि थासारिजों फरायसाफोराबो गोरोबफानानै नखरनिफ्राइ मोननाय गाज्रि आखल-आखुखौनो सोलोंनानै लायो आरो सोलोंथाइनि गुन आरो बेसेनखौ बावगारलाङो। गथ’फोरा सानफ्रोमबो फरायसालियाव थाङोब्लाबो नखर एबा गामिनिफ्राइ मोननाय गाज्रि बाथ्रा आरो आखुफोरखौ नागारनो हाया।

बेनिखायनो आं सानोदि, निसिमा ओनसोलाव सोलोंथाइनि मोजां आबहावा सोरजिनोब्ला हानायमानि ओनसोलनि सुबुंफोरनो सांग्रांथि होनांगोन। गंफ्रोमबो नखरखौ फोसाबग्रोनांगोन आरो बेनि उनाव ओनसोलनि रांखान्थिखौ जौगाहोनांगोन। बेवहाय मोजाङै सानलायनानै गामिनि गोरों-गोराफोरा गावसोरनि नखर आरो गामिखौ फोसाबनो थाखाय बिबान लानांगोन। गोरों-गोरा सुबुंफोरा ओनसोलनि गासैबो बिथिंखौ नोजोर होनानै जौगानायनि थाखाय खामानि मावनो बिबान लायोब्ला थारैनो सोलोंथाइनि मोजां थासारि जोनोम जागोन आरो फरायसाफोरनि जेंनायाबो सुस्रांजागोन।

बेजों लोगोसेनो राजखान्थिनि मदद लानानै बेवहाय नांगौबादि लामा, दालां आरो सोलोंथाइ फसंथान गायसननो हानांगोन। जायफोर एसेबाबो गोजौ सोलोंथाइ मोनबाय बिसोरबादि सुबुंफोरा बे ओनसोलनि दैदेनगिरिनि गिलिर बिबानखौ बोजबनानै लायोब्ला मोजां आरो जाहाथे ओनसोलनि गाहाम जायो बेनि थाखाय गावनिल’ साननाय गोसो आरो आखुखौ नागारनानै थार गोसोजों हाबा मावनांगोन। ओनसोलनि सुबुंफोरा बयबो जुदि मोजां सानोब्ला, ओनसोलनि जौगानायनि बाथ्रा साननानै खामानि मावोब्ला थारैनो निसिमा ओनसोला जौगाया लासेनो थानाय नङा।