मासे मावजि आरो बोरायनि सल'

मासे मावजि आरो बोरायनि सल'

मोनसे गामियाव सासे बोराय आरो बुरै दंमोन। बोराय बुरैहा जोबोद माहाजोनथारमोननो । माइ बाख्रिया गंनै ससे दंमोन। माइ बोखांनाय बोथोराव माइया बाख्रियाव दोनसे दोननानैबो बहा दोननो जाबावलायोमोन बेनिखायनो दुलियावनो सोनानै दोननो गोनां जायोमोन। दुलिखौ अरसिनानै एनजरा माइखौ आद्रि खालामनानै होयोमोन बेनिखायनो एनजरखौ हमनो थाखाय बुरैया मासे मावजि फिदोंमोन। मावजिया बुन्दिमोन ।

सानसेखालि बे मावजि बुनदिया मासे फिसा आजायनायसै। सम सम मासे जोबोद गाज्रि मावजि बुनदा फैयोमोनलाय । बियो जेखौनो बेखौनो जायोमोन। बोराय बुरैनि ना आरो बेदर दोननायखौमानि बे मावजि बुनदाया दाखिनि बोदलानानै जायोमोन। बे मावजि बुनदाया मावजि फिसाखौबो जानो खायदा खालामबाय थादोंमोन। बेनिफ्राइ रैखा मोननो थाखाय मावजि बुनदिया गावनि फिसाखौ जेरावनो मेरावनो सानफ्रोमबो दोनखोमानो गोनां जानायसै।

बेबादिनो मावजि बुनदिया एखमबा मोसौ गलियाव , एखमबा ओंखाम संग्रा नआव, एखमबा दाउ गग्रायाव, एखमबा अमा गन्द्रायाव, एखमबा बाख्रि सिङाव दोनखोमानो गोनां जाबाय । मावजि बुनदायाबो बहा मोनगोन सिरि सिरि नागिरखोमाबाय थानो हमबाय।

सानसेखालि मावजि बुनदिया गावनि फिसाखौ मावजि बुनदानिफ्राइ रैखा मोननो थाखाय बोराय उन्दुग्रा खमबल सिङावनो दोनखोमानायसै। बोराया जोबोद गिखथारमोन। बुहुत आरो हांगोरमोन्दा होनबाथाय बियो गोजांस्रिउ लायग्राथार। गिनानैनो हराव बियो हासुनो ओंखारबाबो बायजोआव ओंखारा। न' सिङावनो बालथिं गंसे लानानै थायो। मोनाबिलि समाव थेब्रे जानानै बोराया उन्दुनो थाखाय गावनि बिसिनायाव गाखोनायसै। खमबलखौ बोदलानानै बियो जोमनो नागिरोबा मावजि फिसाया 'मेव' होननानै बुंबाय । लोगो लोगोनो बोराया गुरलाब बागदावखांबाय आरो हायाव जल्दब गोग्लैबाय।

हानिफ्राइ सिखारफिननानै बोराया गावनि गान्दु सिङाव दोननानै लानाय थुंग्रिखौ लानानै बिसिनायाव जिरायनानै थानाय मावजि फिसाखौ दाननो थुंग्रिखौ थिखोदावबाय। मावजि फिसाया बोरायनानै अनथाव-बाथाव 'मेव' होननानै बुंबाय। बोराया बोलो होनानै मावजि फिसाखौखौ दाननो हमबाय। मावजि फिसाया फिउ बारगासिनो आरांगा मोनहैबाय। थुंग्रिया बोरायनि बिसिनाखौसो सनै खालामगारबाय। आरांगायाव जिरायनानै मावजि फिसाया अनथाव-बाथाव 'मेव' होननानै बुंबावबाय।

बोराया आरोबाव मावजि फिसाखौ बोलो होनानै दाननो हमबाय। मावजि फिसाया बारगासिनो बारनानै उखुम मुदा मोनहैबाय आरो खारनलांबाय। बोराया आरांगाखौबो खावनै खालामबावबाय।

मा जाखो होननानै बुरैया न' सिङाव हाबफैदोंमोन। बोराया रागाखौ हमथानो हायैनि बुरैखौनो थबस्र' दानसनायसै। बुरैया बाब्राब बाब्राब जायगायावनो दुब्ला थानायसै। दान्दिसे गोबाव नायबाय थानायनि उनावसो बोराया जोबोद गाबनायसै। बुरैखौ मानो दानथारफ्लांखो होननानै बियो गाबै गाबै हरखौनो सोरां होनायसै। अखानायै गामिनि मानसिफोरा बोरायखौ मिथिं खालामनायसै। बुरैखौ दानथारनायनि थाखाय बिखौ जुरिमाना फोनांसे फोनांनानै हाग्राबारियाव होखारहरनायसै। बोरायनि दोहोन- दौलदनि गासैखौबो जाथि खुरमाफोरा लाजोबनायसैनो।