गोहो होननानै बुङोब्ला जों बुजियो जायनियाव लिरथाइ बारायनो हानाय, जौगानो हानाय, लावनो हानाय, सिगां फारसे दावगानो हानाय आरो गावखौ आरो गुबुनखौ थुलुंगा होनो हानाय गुनफोरा दं। जायनियाव जोबनो गैयै हालिलास, सिमां आरो मिजिंफोरा थुबुर जानानै दं बेवहायनो गोहोआ नुजासारनानै एबा थाखोमानानै दं। मख’जाथाव बाथ्रादि बेबादि आखुथाइ आरो गुनफोरखौ नुनो मोनो लाइमोनफोरनियाव। बेबादिनो जों फांसे लाइमोन बिफांखौनो बिदिन्थि हिसाबै नायजायो। फांसे लाइमोन बिफाङा गावनि गोसोबादिनो जेराव रोदा सुथाबनानै दं बिनि रोदाफोरा हानि सिङाव दोबैलांबाय थागोन, गोरा जागोन आरो बेनि उनाव बियो हानि सायाव दालाइ-दासा सोमखोर गेरेमसा महर लानानै अख्रां फारसे खर’ दैखांनानै गसंख्रांगोन। बियो साया-साइख्लुम होगोन, बिबार बारगोन, फिथाइ थाइगोन आरो सानसे जोलैबो गालांगोन।
थिग फांसे बिफांबादिनो सासे लाइमोन सुबुङाबो जेरैबो दावगानो हायो। बेनिखायनो बुंदों दिनैनि लाइमोनआनो गाबोननि दैदेनगिरि। बेनिखायनो लाइमोन गोहोखौ मोजाङै बाहायनांगौनि गोनांथि दं। नाथाय बेखौ मोबोरै बाहायगोन बेबो मोनसे साननो गोनां जानानै फैयो। जुदि दिनैनि लाइमोनआनो गाबोननि दैदेनगिरि जानांगौ जायोब्ला होमबा दैदेनगिरिनि गुनखौ मोननो थाखाय बिहा गोबां सोलोंनो आऱो रोंनो गोनां थायो। रोंग’थि गोनां सुबुङासो दैदेनगिरि जानो हायो, जायहा मोजां रोंग’थि गैया बियो दैदेनगिरि जानांगौ जायोब्ला गोबां बेले-बेजे आरो जेंनाफोर नुजाथियो। ओरैनोबाबो जेरावबो फिसा नङाबा गेदेर जेंनाया थाखायो बेफोर जेंनाजों जुजिनानै बेखौ बोस्रांनो थाखाय मोजां रोंग’थि गोनां दैदेनगिरिखौ नांगौ जायो।
सासे दैदेनगिरिया माबादि जानांगौ बेनि सायाव गोबाङानो गोबां बिबुंथि लाखिनो हागौ। सरासनस्रायै दैदेनगिरिनो नांगौ जानाय गुनफोरा जादों गोबां आयदानि सायावनो एसेब्लाबो मिथिनो हानाय गुन, बयनिबो सुबिदा आरो उसुबिदाखौ मिथिनो हानाय सोलो, बयखौबो खौरां लानो एबा खौरां होनो हानाय गुन, रायजो-राजाफोरखौ लिंथुमनो हानाय गुन, हाजासे सहायनाय आरो गोसो हमथानाय गुन, रायज्लायनायाव माबादि सोदोबखौ बाहायनांगौ बेनि सायाव सोदोब सायख’नो हानाय गियान आरो बायदि बायदि रोंग’थि। सासे दैदेनगिरिनो नांगौ जायो बेराम-आजार गैयै राफोद देहा। बिथाङा जानांगौ जायो गावनि गोख्रों गोसोनि बिगोमा। बिथाङा दैदेनगिरि जानायाव नखरनि जेबो हेंथा गैयै एबा गाज्रि मोननाय थायैया गाहाम। बेफोरबादि गियाना साफ्रोमबो लाइमोनफोरनियाव थाया नाथाय बेफोर गियानखौ बुथुमनानै लानाया बिसोरनि बिबान।
जों मोजाङै नोजोर खालामनानै नायोब्ला नुनो मोनोदि गेदेमा सुबुंफोरनि थांखिया जादों समाजाव थानाय सुबुंफोरनि साननो आरो बुजिनो हानाय गोहोखौ बांहोनानै समाजाव आब्रुथि लाखिनो फोरोंनाय। बेजों लोगोसेनो समाजाव बेसेन गोसा सुबुं समाजखौ बांहोनाय, समाजनि हाबा-हुखायाव बाहागो लानाय आरो साबसिन-हामसिनथार थांखिफोरखौ जाफुंसार खालामनाय। बेवहाय नुनो मोनोदि साबसिनै लाइमोन गोहोखौ फोजाखांनाय आरो बिसोरखौ फोरोंनायानो जादों दैदेनगिरिफोरनि मावनांगौ गुदि खामानि। लाइमोनफोरखौ नागारनानै जायखिजाया गेदेरथार खामानिखौ जाफुंसार खालामनायाव हेंथा फैनोबो हागौ।
लाइमोनफोरनो सोलोंथाइ होनांगौआ साननो-हनो गोरों सुबुंफोरनि मोनसे गेदेर मावनो गोनां बिबान। फारसेथिं बिसोरखौ मोजाङै सोलोंथाइ होनो एबा रोंग’थि बांहोनो थाखाय ओंथिगोनां खामानि मावनोबो खाबुखौ होनांगोन। सासे लाइमोननियाव जोबनो गैयै गोहो थानो हागौ नाथाय बिथाङा बे गोहोखौ मोजाङै बाहायनो रोङाबो जानो हागौ। बेनिखायनो लाइमोनफोरनो माखासे रोंग’थिखौ होथारनांगोन जेरै- गावखौ मोजाङै मोन्दांथि खालामनाय, गावखौ दबथायनाय, जायखिजाया थिरांथा लानायनि रोंग’थि, गावखौ आरो गुबुनखौ माबादि फोथायनांगौ बेनि खान्थि आरो गाव जेराव उजिदों बे समाजनि अनगायैबो गुबुन समाजजोंबो मोजां सोमोन्दो लाखिनाय। आब्रुथिखौ लाखिनो हायै अख्रा आखु, गावनि फारसेल’ साननाय आरो गुबुनखौ एसेयावनो रागा जोंनानै खामानिनि फारसे फावसयनानै दौदाब्ला थानाय आखुफोरा थायैआनो गाहाम।
सासे दैदेनगिरि जायोब्ला बेयो जिउनि गुनखौ बुजिथारनांगोन। बियो गावखौ सासे गोख्रों एबा मोजां दैदेनगिरि होननानै सिनायथि मोननो हागौ नांगौबादियै दोहोन थानाय, खामानि मावनो हानाय गोहो, नांथाबनाय, मोजां बारहावायाव थानाय, देहायारि आरो गोसोआरि मोजां सावस्रि लाखिनाय, रंजानाय आरो जिरायनायनि समखौ थि बाहायनाय, मोजां सोलोंथाइ लानाय, समाजारि सोमोन्दो, दोहोरोमारि फोथायथि, गावनि आरो सुबुं समाजनि अनगायैबो मुलुगनि दंनायमानि बयनिबो रैखाथिनि बाथ्रा साननो हानाय आरो उदांस्रिखौ मोजाङै बेखेवथि होनो हानायनि गुननि थाखाय।
मुलुगनि जारिमिनाव जोङो देरहासार जानायखौ नुनो मोनो लाइमोन गोहोखौ बाहायनायनि दारैनो। दावहानि देरहासार जानाया सोनारो आखा-फाखा दावहा नांनो गोरों लाइमोन फाइखि हानजानि सायाव। गोदोनि समाव राजा-महाराजाफोरा लाइमोन गोहोखौ बाहायनायनि गेजेरजोंनो गोबां हादोर गाग्लोबदोंमोन बबेखानि गावनि रायजोखौ रैखाथिबो होदोंमोन। महात्मा गान्धीया भारतखौ इंराजफोरनिफ्राइ उदांस्रि खालामनायाव लाइमोन गोहोखौ बाहायदोंमोन। सानसे समाव बर’ हारिया मिरौ-जिरौ जानाय समाव गुरुदेब कालिचरण ब्रह्मआ लाइमोनफोरखौनो बाहायदोंमोन थामहिनबा फोजाखांनानै खामानि मावनो थाखाय थुलुंगा होदोंमोन। दुलाराय बर’ फरायसा आफादआ दिनैसिमबो बर’ लाइमोनफोरखौ लानानैनो हारिनि खामानिखौ मावगासिनो दं। बुंनो थाङोब्ला लाइमोन बर’ सेंग्रा सिख्लाफोरनि थाखायनो बर’ हारिया दिनैनि बे थासारियाव सफैनो हादों। नोजोर होयोब्ला नुनो मोनोदि दिनै जायफोर हादोरखौ जों जोबोद जौगानाय नुनो मोनदों जेरै- आमेरिका जथाइ हादोर, जापान, इंलेण्ड, जार्मानि, फरासि, अस्ट्रलिया बायदि बायदि। गोसोआव फैजोबै बुहुमनि माखासे हादोरफोरा लाइमोन गोहोखौ बाहायनायावनो जौगानाय आरो जौगाफुनायनि बेसेबांबा गोजौ मासि मोनफैनो हादों। भारत हादोराबो दिनैनि समाव बेखौनो उनसङालासेनो थायाखिसै।
बर’ हारिनि बेलायावबो दिनै बर’ हारिखौ फोथांनानै लाखिनायनि सिन्थाखौ लाखिनानै फोजौनांगौनि थाखायबो लाइमोन गोहोखौ साबसिनै बाहायथारनांगौ सम। दैदेनगिरिफोरा हानायमानि बर’ लाइमोनफोरनो सोलोंथाइनि उनावनो गोबां बिथिङाव खामानि मावनो खाबुखौ होनांगोन। बेनि थाखाय दैदेनगिरिफोरानो बिबानखौ लानांगोन। राव-थुनलाइ, हारिमु, गेलेनाय आरो दिनैनि मुगाजों खाबजानाय दारिमिन आरो बिरोंदामिनजों लाइमोनफोरा बाहागोसे जानो हाथारनांगोन। लाइमोनफोराबो गावनो गोसो जानानै मोजां खाबुफोरखौ लानांगौ, हारि आरो समाजनि थाखाय खामानि मावनो गोसो जानांगौ आरो गावनि हारिखौ मोजां मोननानै हानायमानि गावनि सोरजिलु गोहोखौ बाहायनानै आब्रुथिजों हारिखौ सिबिनो थाखाय दावगाबोनांगौ। बांद्राय थामसा खालामनानै, आब्रुथि गैयै आखुजों रंजा-बाजा खालामनानै, जौ लोंनानै आरो फेग्रा मुवा जानानै गावनि हारिखौ सिबिनो ओंखारनायाबो गाहाम जानाय नङा। बेबादि खालामोबा बांसिन दावराव-दावसि आरो हारि सिबिनायनि मुङाव बेले-बेजे सानस्रिफोरासो सोमजिगोन। हारिया अलखदाव गोग्लैगोन। बेनिखायनो हारि मोनसेखौ मोनफ्रोमबो बिथिङाव जौगाहोनो थाखाय हारिनि खामानि मावग्रा सुबुंफोरनियाव गुन गोनां सोलोंथाइजों लोगोसेनो आब्रुथिया थाथारनांगोन। ओरैनो थामसा खालामनाय, मथरसाइकेल लानानै गिदिंथिंनाय, फेग्रा मुवा बेसाद जानानै सम बारहोनाय आरो गावनि जिउखौ फोजोबस्रांनानै लानाय बेफोर आखुखौ जोंनि लाइमोनफोरा नागारनांगौ। बिमा-बिफानियाव रां दाबिनाय, नखर सिलिंखार खालामनाय, गावखौनो सोरखार जालाय दिन्थिनाय, गावखौनो हगारसारनानै हारि आरो समाजनि मान हानि खालामनाय, अलसिया बेफोरबादि आखुफोरखौ जोंनि बर’ सेंग्रा-सिख्लाफोरा नागारनांसिगौ। साफ्रोमबो हारिनि थांनानै थानाय, जौगानाय आरो सुखु-गोजोनै थानायनि बाथ्राखौ साननो हानाय आब्रुथि गोनां जानांसिगौ। जोंनियाव मोनसे गोहो दं, लाइमोन गोहो, बेखौ जों हारि आरो समाजनि गाहामनि थाखाय मोजाङै बाहायनांगौ। बे गोहोखौ निसा बेसाद जानाय, हर आरो सान मथरसाइकेल सालायथिंनाय आरो उन्दुनानै थानायाव बाहायोब्ला गेदेर खहा जागोन। फारसेथिं बेखौ हारि जौगानायनि थाखाय मोजाङै बाहायोब्ला गावनि आरो इयुन जोलैफोरनि थाखायनो जोबोद गेदेर मुलाम्फा आरो देरहासारनाय फैगोन।
0 Comments