हानिफ्राय हाजोनि थिखिनिसिम आरो हाजो सानिफ्राय गाहायसिम

हानिफ्राय हाजोनि थिखिनिसिम आरो हाजो सानिफ्राय गाहायसिम

उन्दै समाव जोंनि गामिनिफ्राय साहाजों थानाय हिमालय हाजोमाखौ नुहरबाय थायोमोन। बबेखानि दासिमबो नुहरो। फुं आरो बेलासि समाव जेब्ला दुब्लियाव गसंनानै नायहरोबा गोजाननि हाजोखौ नायनो जोबोद समायना नुयोमोन। दलर गसंनानै नायहरोब्ला जोबोद गोजोननाय मोनो। माब्लाबा हाजोखौ खाथियावनोथार नुहरो नाथाय जेसेबांनो दावगालाङो गोजान दंबावथारो होनना मोन्दाङो।

उन्दै समावनो जोंनि खाथियावनो थानाय मावरिया हाजोखौ गाखोनो मोनदोंमोन। मावरिया हाजोआ जोंनि गामिनि बांद्राय गोजान जाया खालि बा आरो द’ किल’ मिटारसो गोजानाव दं। मावरिया हाजो गुदियावनो भुटान रायजोनिफ्राय बोहैबोनाय थाख्लाय दैसा। बे दैसानिफ्रायनो बान्दो थेनानै गामियाव माइ गायनो थाखाय दंगजों दै लाबोयो। बेबादिनो आमटेकानि गोबांथार गामिनि मानसिफोरा गावजोंगाव खौसेथिनि गेजेरजों बे हाबा मावबोदों। बान्दोनि मुङा जादों थाख्लाय बान्दो। दैज्लां बोथोराव गामिनि मानसिफोरा बेजों गोथौ मोनसे सोमोन्दो लाखियो।

जों उन्दै समाव जोंनि गामिनि साहाजों गोबां हाग्राबारि दंसोगारोमोन। बैफोर हाग्रायाव हाग्रानि जुनारफोरा गिदिंथिंबायनानै आदार जायोमोन। हाग्राबारि सेर सेर गामिनि आबादारिफोरा खायसे आबाद मावोमोन आरो बेफोरखौबो हाग्रानि जुनारफोरा जाफैयोमोन। माब्लाबा हादाननि मानसि आरो हाग्रानि जुनारफोरनि गेजेराव मोगा-मोगि जायोमोन। हाग्राबारियाव सम सम गामिनि मानसिफोरा मैहुर खालामनो थाङोमोन। हाग्रानि मै, अमा, मोदै, सेसा आरो सियालफोरखौ गावनानै लाबोयोमोन।

उन्दै समाव बाथुल लानानै जों हाग्राबारियाव दाउसिन गावनो थाङोमोन। माब्लाबा गामिनि लोगोफोरजों हाग्रायाव सेसा, नेवलाइ आरो एनजर गावनो थाङोमोन। बेबादिनो माब्लाबा माब्लाबा हाग्रा गेजेर गेजेर थांनानै हाजो मावरियायाव सहैयोमोन। हाजो मावरियाखौ खाथियाव गसंनानै नायबाबो नायखनो हायामोन। नायनानै हाजोआ माबोरै सोमजिखो बेखौ सानोमोन। हाजोनि थिखिनियाव नायहरनानै जेरैखिजाया बेखौ गाखोनो गोसो जायोमोन।

हाजो मावरियानि गाहायाव गसंनानै दैसानिफ्राय अन्थाइ खनखांना लानानै गोजौआव खुबैहरोमोन। लोगोफोरनि गेजेराव सोर बांसिन गोजौ खुबैदावनो हायो बेनि थाखाय जोंनि गेजेराव बादायलायनाय जायोमोन।

मावरिया हाजोखौ गाखोनानै जोबोद गोजोननाय मोनोमोन। मावरिया सायाव गाखोनो थाखाय गोबां खोस्थो खालामनो गोनां जायोमोन। जेसेबांनो गोजौआव थाङो एसेबांनो मेंनाय आरो गाखोनो बानाय सोमजियोमोन। थेवबो मोनसे जुनिया गोसो आरो गोजोननाय लानानै गाखोनो जुजिथाबोमोन। हाजो सायाव गाखोनानै जोबोद गोजोननाय मोनोमोन।

गुरुदेब कालिचरण ब्रह्म एकाडेमियाव लोगो फोरोंगिरि महरै हाबा मावनाय समाव 2022 मायथाइयाव सुर्यपाहार हाजो दावबायनो थांदोंमोन। साबासो फरायसाफोरखौ लानानै बै सानखालि आं सुर्यपाहार हाजोखौ गाखोदोंमोन। 2024 मायथाइयाव आं गोरायुं जानाय समाव आं फरायसाफोरखौ दावबायनो थाखाय लानानै थांदोंमोन। बै सानखालि फरायसाफोरा गाखोदोंमोन नाथाय आं गाखोआखिसै। हाजो गाखोनाया जोबोद खोस्थो, गोजौआव गाखोनानै गाहायाव फैफिनोबा मेंगोन बेखौल आं साननानै थादोंमोन।

बाउखुंग्रि हाजोखौ आं दासिम खेबथाम गाखोखांबाय। गिबि खेबाव आं 2021 मायथाइयाव गाखोदोंमोन। ऩैथियाव 2023 मायथाइयाव आरो जोबथारनायाव 2026 मायथाइयाव गाखोदोंमोन। हाजो गाखोनायाव थारैनो जोबोद खोस्थो जायो। हाजोखौ गाखोफुंनो थाखाय गावनि मेंनाय, बानाय आरो सानाय गासैखौबो सहायथारनांगौ जायो। बेबादिनो साहस आको गोसो जानायखौ बांसिन खालामनानै लाथारनांगौ।

जेब्ला हाजो थिखिनियाव सहैयो होमब्ला गाहायाव थानाय मिथिंगायारि नुथायफोरखौ नायहरनो हायो। गोजौनिफ्राय गाहायाव थानाय सावगारिफोरखौ नायहरनानै जुनिया मिथिंगायारि महरखौ नुनो मोनो। गोजानाव गोसारनानै थानाय बिफां-लाइफां, गामि आरो हायेनखौ जोबोद समायना नुहरो।

हाजो थिखिनियाव सहैनानै गाहायाव ओंखारबोफिननो थारैनो गोसो जाया। हाजोनि थिखिनियाव थाबाय थानानै मोनसे जुनिया गोजोननायखौ लानो गोसो जायो। जेब्ला गोजौ हाजोनिफ्राय गाहाय फारसे ओंखारबोयो अब्ला गावखौ रेजें मोनो। माबा मोनसे हाजोनि थिखिनियाव थाबोनाय बादि मोनो।

थारैनो जोंनि जिउनि दावबायनाया बेबादिनो, गोजौआव सफैखानानै जों गाहायाव थांफिननो माब्लाबाबो गोसो जाया। जों जेराव दं बेनिख्रुइबो बांसिन गोजौसिनावसो थांनो गोसो जायो। जुदि गाहायाव फैफिननो गोनां जायो होमब्ला गावनि मोदोमनि लिरथाइखौ रेजें मोनो। जोंनि मावनांगौ बिबानफोरा खमायो आरो बेनि थाखाय माबा मोनसे गेदेर बिबान गोमानाय बादि मोन्दाङो।