आं बुंनो हाया नों आंखौ बावलांखो ना बावाखैब्लाबो खौरां लानो गोसो जानानैनो खौरां लायाखै । ना नोंहा जोबोद मुखुब ना खौरां लानायनि जेबो गोनांथि नङा होनना सानखो?
नों आंखौ आं दासान्दि माबादि थांनानै दं बेनि बागै आंनियाव जेबो खौरां लायाखिसै । आं मिथिया, नों आंखौ माबादि जाजानो लुबैयो । नों आंखौ बे संसाराव थांनानै थाजानो लुबैयो ना थांनानै थाजानो लुबैया बेखौ आं बुंनो हाया।
जानांगौ आंनियाव खौरां लानानै आंनि बागै सोंनो गोसो जायाब्लाबो सोरजोंबा नोङो आंनि बागै रायज्लायो। दासान्दि आं माबोरै दं बेनि बागै लोगोफोरनियाव सोंखोमायो। जानो हागौ नोङो आंनि सोमोन्दै सिरि सिरि मिथिनो लुबैयो, आंनि सुखु आरो दुखुनि बागै नोङो सोरनियावबा सोङोबो जानो हागौ।
नों जेरै आंखौ जेबो खौरां लायाखै, आंबो नोंखौ जेबो खौरां लायाखै। नाथाय आं नों आंखौ खेबसे माबोरै दं होनना खौरां लाहरोबा हामगौ सानो। सम सम मानोबा नोंनि खौरां फैसि फैसि मोनो। नाथाय आंनि साननाय बादि जेबो जायाखैबो जानो हागौ।
गावनि थांनानै थानायनि थाखाय, गावनि जिउनि दावगालांबाय थानाय आरो जौगानायनि थाखाय नोङो जोबोद मुखुब जानांगौ। आं खौरां लाहरोबा दिगदारबो मोननो हागौ बेफोर साननाया सम सम आंनि गोसोआव सौग्रावो बेनि थाखाय आं नोंनिसिम जेबो खौरां लाहराखै।
थारैनो आं नोंखौ मोजाङै थाजानो लुबैयो। जाहाथे नोंनि जिउआव जेबो जेंना दाफैथों बेखौ आं आर'ज खालामो। आं जेरै गावखौ मोजाङै दं होनना सानो बेबनिख्रुइ जाहाथे नोङो साबसिन जानानै थांनानै थायो बेखौ आं लुबैयो।
माब्लाबा आं नोंखौ गाज्रि मोनफ्लांदों बे नोंगौ । नाथाय आं नोंखौ दा जेबो गाज्रि मोना । नोंसो आंखौ गाज्रि मोनबाय नामा? आं सम सम सानफ्लाङो, बियो आंखौ गाज्रि मोनबाय जानांगौ होननानै।
बेबादिनो दासान्दि सानफोरा थांगासिनो दं। ना नों आंखौ खौरां लायो, ना आं नोंखौ खौरां लायो । जों सानैबो गोजान गोजान थायो, गोरलैयै लोगो मोनलायनायनि जेबो खाबु गैया। माब्लाबा सानैजों माबोरैबा लोगो मोनलायनाय समसिम नोङो मोजाङै था आं बेखौ लुबैयो।
0 Comments