2022 मायथाइनि 2 जुलाइ । हरखाब सानज्लायनानै जों कक्राझारनि सरलफारायाव ओरैनो थांनानै नायनायनि बाथ्रा सावरायो। गोबां समफोराव सरलफारानि मुंखौ आं खोनाबोबाय थादोंमोन। सरलफारायाव थानाय भुटान आरो भारत सिमानि सरलफारा दैसायाव गोबां मानसिफोरा बेवहाय लाउखार ओंखाम जानो थाङो। दिसेम्बर आरो जानुवारिनि समाव बेवहाय मोनसे लाउखार ओंखाम जानायनि गेदेर मेला खुंनाय जायो। दाब दाब जायगानि मानसिफोरा बेवहाय थाङो आरो रंजानाय लाहैयो।
सरासनस्रा मोनसे फिसा दैसा थेवबो उदां आरो लांदां जायगा नाथाय नायनो जोबोद समायना। सरलफारानि मुंदांखाखौ आं रादाब बिजों आरो बर’नि भिडिअ सावथुनफोरावनो नुनो मोनदोंमोन। बेखायनो आंबो गावनि मेगनजोंनो सरलफाराखौ खेबसे नायनानै फैनो जोबोद गोसो जाबाय थादोंमोन आरो थिग बे समावनो दिनै हरखाब सरलफारा थांनायनि बाथ्रायाव आंबो गोसो गुदुं जानायसै।
सान्दुं गोसा आरो अखा हाब्लाबो जोङो सरलफारासिम मथर साइकेलजोंनो थांगोन। साद’ सास्निसो मानसि थांगोन जानायलाय मथर साइकेलाबो थोनाय नङा बेखायनो आं नआव फन खालामहरबाय आरो फंबायखौ मथर साइकेल गंसे लाबोहोबाय। मथर साइकेलाव थामजौ रांनि थाव सोनानै आं फंबायखौ नआव दोननानै फैफिनबाय। फुंनि ओंखाम जास्लाबनायानो जायाखिसै, देलायै साजायै फुंनि दाइन रिंगा जि मिनिटसो जाबानो जों सरलफारा फारसे रावना होबाय।
जेब्ला आमगुरि मोनो होनबा आं जोबोद हासुनो ओंखारो, मथर साइकेलखौ लाखिनानै आं हासुनो नागिरो होनबा आंनि उदैया आलौनानै होबाय। उदै आलौनायनि जाहोना जाबाय हराव फानलु गोसा ना बाथोन जादोंमोन। खिनो ओंखारनाय मोननानै आं जोबोद उसुबिदा मोनबाय, थाक थिक आं आमगुरिनि दालाइ दुलाराय बर’ फरायसा आफादनि मावख’आव थांबाय आरो बेवहायनो खिबाय। आं देहाखौ उसुबिदा होजानो गिनानै नसिम गिदिंफिननोसो सानबायमोन आरो बेबादिनो आं थांला होननानै फन हरदोंमोन। बे समाव बिसोर होनबा बभानिफुर मोनहैबाय। जेब्ला आं खिखाङो होनबा देहाखौ आराम मोनफिनबाय आरो गोसो जानानै मथर साइकेलखौ सालायथारनो हमबाय। लामाया जोबोद गाज्रि, जायगा जायगा ना मागुर फिजालायनाय जानजिफा गोथौ। बबेयावबा बिलो, बबेयावबा हाखर आरो बबेबा जायगायाव जामफैजों खुरखाजानाय बोरिबादि जानानै दं। मथर साइकेलखौ बांद्राय गोख्रैयाव सालायबा खुनथेंनानै थैनायनिबो लैखोना दं। लामाया गाज्रिबाबो हानायसेबां गोख्रै सालायदोंमोन आं।
आदा बिरजय, आदा भुमसु आरो सार सुबासमोनहा आंखौ रौमारिनि थाव दिफुआवनो नेनानै दंमोन। साफुगुरियाव जों दानदिसे सम ब्रेक फास खालामनायसै। फरता गुरसे, मिसथि थरसे आरो दाउदै आमलेट एवनानै जानायसै। बेनि उनाव आरोबाव मथर साइकेलखौ सालायफिननायसै। आं सालायनाय मथर साइकेला ग्लेमार, बोरायबाय, स्नि बोसोरनि मथरसाइकेल, दजि बारा गोख्रै सालायोबानो गाज्रि रोखोमै बेर बेर होननानै गाबनो हमो। थेवबो खुनुरुखुम दजि होनानैनो कक्राझारनि बिसमुरि मोनफैनायसै। जे लामाजों सरलफारा मोनहैयो सिखोनाजाहार नौनोगोरनि गेटआव जों दानदिसे सम थाद’नायसै, समा होनबा जिसे रिंगा जाबायानो। दै बथल बायनानै लोंनायसै जों, सोरबा सोरबा गय जानायसै, गय जायैनि आं सक्लेट गरसे जानायसै।
बेनिफ्राय आरोबाव सालायनायखौ जागायफिननायसै। समा रावखौबो नेनानै थाया। जिनै रिंगासो समाव जों उल्थापानि मोनफैनायसै। बेनि सिगां गिलुबालु गुदु बेसेबांबा गोलाव हाग्राबारि गारबोबाय। गेजेराव रावनिबो गंसे न’ गैया, सोरनिबा गंसे फामु आरो गलाबो गैया। माबोरैबाफोर मथर साइकेलफोरा थाव जोबोबा थाव मोननाय नङा, मथरा गाज्रि जायोबा गेदेर खैफोदाव गोग्लैनाय जागोन। अरनबारिया एम्फौ एनलाफोरनि गाबनायजों गोमसारजोबनाय। हराव बेवहाय आरोबाव बांसिन गिलुबालु सोदोब खोनानो मोननो हागौ बेनि अनगायैबो बबे समाव मा जुनारा हामला खालामगोन बेखौ बुंनो हाया। सरल थाखोनि बिफांजों ग्रोम ग्रोम बे हाग्राबारिया नैजिदाइन किल’ मिटार गोजान दं 31 नं राजा लामानिफ्राय।
दावगाबाय थानाय लामायाव एसेब्लाबो मैदेर गसंथेजानो गिनाय गोसोआव सोमजिदोंमोन, नाथाय बेबादि जायाखिसै। दाउराइ मासे आरो सनालु मोख्रा फालोसे नुनानै जों गोजोननाय मोनदोंमोन आरो दान्दिसे सम थाद’नानै नायदोंमोन आरो मबाइलजों सावगारि दिखांनो नाजादोंमोन नाथाय हास्लाबाखिसै। मबाइल दिहुनगौमानि दाउराइ गां फुवारनानै बिरलांदोंमोन। लामा ससेयाव सनालु मोख्रायाबो फिनज्राब फिनज्राब बारनानै गोदानाव खारलांनायसै। बेबादिनो फैबाय थानानै उल्थाफानियाव थानाय मन्दिरनि मोखाङाव जों दानदिसे सम थाद’नायसै आरो सावगारि सेबखांनायसै।
फिन आरोबाव मथर साइकेलखौ सालायनानै नं 3 सरलफारा गामियाव जों हाबफैनायसै। जोंनि सिरांनिफ्रायनो खारलांनाय बिरदाव होननाय मानसिया बेवहाय बिसि फिसा लानानै संसार जाफैनाया बारा गोबाव जायाखै। जोबोद खस्थयै संसार जागासिनो दं अरन गेजेराव। जों जेब्ला सहैयो होनबा सोरगिदिं जेरैबो जेंगाव जेंगाव गावरेमा गाबगासिनो दंमोन। सम सम बेवहाय मैदेरनिबो उदखार जाबाय थायो। थांनाय जुन दाननि स्नि खालारखालिसो बिरदावमोननि नखरनिनो सासे सुबुंखौ मासे मैदेरा इनाय बानाय गाथारलांदों।
माबोरै दं जों सुखु दुखुनि खौरां लादोंमोन, नखरनि सोरगिदिं मा आबाद मावदों, दैखरा माबादि, नआव माबोरै थायो जों नायदोंमोन। सावगारिबो दिखांनानै लादोंमोन जों। ननि सोरगिदिं जानो आनथा थारुन मैगं, थाइलिर बिफां, गायजेननाय सफारि बिफां, खुसेर, थाइजौ, गय बिफां, बानलु बेफोरबादिखौ आं नुनो मोनदोंमोन। हादान जानायलाय हाया जोबोद हासार गोनां। जोबोद थौलेयावनो दैखौ खुरनानै मोनो। गामियाव गंसे गेग्रेबग्रेब बाथौ मन्दिर दं। दासिम फरायनो थाखाय खाथियाव फरायसालि गैया। फरायनो गोसोब्ला गथ’फोरा उल्थाफानियाव थांनानै सोलोंथाइखौ लाहैनो गोनां जागोन। दासान्दि फरायसालियाबो बन्द जानानै दं, बिमा बिफाया जेबो खामानि दिहुननानै होनो हायैनि जावोनाव हादाननि गथ’फोरा मा खालामनानै थानो जायो, हादाननि गथ’फोरखौ ननि सेरावनो थानाय थाइगिर दैसायाव ना बोनबाय थानाय नुबोदोंमोन।
बेनिफ्राय थोंजोङै जों सरलफारा लाउखार ओंखाम जाग्रा जायगासिम दावखोनो हमो, नाथाय बेनि सिगां आं थामजौ रांनि थाव सोदेरबावनो गोनां जादोंमोन मानोना आं थाव जोबजानो गिदोंमोन। ससे लामायाव जों अखा लोगो मोननायसै थेवबो जों सालायबाय थानायसै आरो ससे लामायावनो अखा गैयै मोननायसै। आमटेकानिफ्रायनो खारलांनाय आदा सदानि नखराव जों दान्दिसे सम हाबहैदोंमोन। बिथांनि नआ सरलफारा थांबाय थानाय लामा सेरावनो, न’ खाथियावनो गराय बाजार मुंनि हाथाइयाबो दं। सेरावनो गोदानै बानायनाय जोलुर गेलेग्रा फोथार। नै रिंगायाव जों सरलफारा हाथाइखौ मोनफैयो। बांसिन मानसियानो बेवहाय नेपालि हारिनि। लोंग्रा गुसु, जाग्रा मेथाय बेफोरखौ लानानै जों नै रिंगा नैजि मिनिट समाव सरलफारानि लाउखार ओंखाम जाग्रा जायगाखौ मोनफैयो। जोबोद समायनायै दैसाया गंगार हाजोनिफ्राय जोंनि आसाम रायजोजों रा रा बोहैलांगासिनो दं।
सरलफारा हाथाइनिफ्राय लाबोनाय मेरिन्दा, फ्रुथि, फेबसि बायदिखौ जों लोङो आरो मेथायखौ जायो। बेनि थासारि, समायना, बेरायफैग्रा आरो लाउखार ओंखाम जाफैग्राफोरनि बागै सावरायलायो। लाउखार ओंखाम जाग्रा जायगानि मोनसे कमिटिया जोंनि नैजौ बाजि रां लाखिदोंमोन हाबनो मोननायनि कमिसन हिसाबै। बे जायगायाव दिनैबो गोबां जायगानिफ्राय लाउखार ओंखाम जाफैनायखौ नुनो मोनदों। जाय लामाजों फैनानै जों लाउखार ओंखाम जाग्रा जायगासिम सफैदों बेफोर जायगाया बुंनो थाङोबा नेपालीफोरनिजोब। बेसेबांबा ग्रोम ग्रोम गय बागान, समायना आरो मैला गैयै थासारि। साहाजों एसे थांबावबानो गंगार हाजो। दैसा सेराव गसंनानै नायहरनानै आं जोबोद समायना नुहरदोंनोन आरो जोबोद गोजोननाय मोनदोंमोन। दानदिसे सम दैसा सेराव गसंनानै आरो दैसायाव हाबनानै सावगारि सेबखाङो। बेनिफ्राय दान्दिसे समनि उनाव गिदिंना फैफिनो।
सानसुनि ओंखाम जानाया आदा सदानावनो जायो। बुंनो थाङोब्ला दिनै जों बिथांनि आलासिबादियानो। बेलासि समाव जों माखासे हादानखौ नायहैबावो, जोबोद अरन गेजेरावनो न’ लुनानै दं। जोबोद खस्थयै संसार जादों। कक्राझारल’ नङा, सिरां जिल्ला, गवालफारा, बिजनि, नागालेण्ड बायदि गोजान गोजान जायगानि मानसिफोराबो बेवहाय दंफैयो। फामु जानायबादि न’, उखुमा फलिटिन आरो दंफांजों लुनानै लादों। न’नि सोरगिदिं थारुन, खुमब्रा, हाइजें, बानलु, था सिमलि, थाइबें बायदिसिना आबाद मावदों। सानफ्रोमबो हरावनो बबेजोंबा नङा बबेजोंबा मैदेरा फालो फालो फैयो। सासे मानसिया खिन्थानाय बादिब्ला दाखालि साननैसो सिगाङावसो गावनि न’नि सेरजों ब्रैजिथानिबो बांसिन मैदेरा फालोयै फैदोंमोन।
ब्रै रिंगा ब्रैजिबा मिनिट समाव जों गिदिंफिननायसै। बेसेबा गुदु आरो गेदेर सरलफाराखौ बारबोनानै जों द’ रिंगा ब्रैजिबा मिनिट समाव राजा लामायाव सफैफिननायसै। साना आरो फैसालियाव गैलिया, दोबैलांबाय। राजा लामायाव जोब्ला माब्ला मथरनि लाइट जोंनाय। दान्दिसे थाद’नानै थोंजों बङाइगाव फैबाय आरो साफागुरियाव दानदिसे सम थाद’बाय आरो गुसु खालामना दोननाय फेबसि लोंबाय। दानदिसे जिरायबावनायनि बाथ्रा जों सावरायदोंमोन, नाथाय सहराव गोजोन सुदेम बार मोनैलाय मिथिंगानि बार जानाया साबसिन जागोन होननानै जों हाग्रामा दालां सेरावनो दानदिसे जिरायनो होननायसै। बेबादिनो फैबाय थानानै जेब्ला जों हाग्रामा दालांखौ बारबोयो होनबा दानदिसे सम नैजि मिनिटसो जिरायनायसै समा होनबा दाइन रिंगा बाजिबा रिंगा जाबाय। आइ दैसानिफ्राय जोबोद गुसु सुदेम बार बारबोदोंमोन, दैसाया सोदोब होनानै बोहैलांगासिनो दं, जिरायबाय थानो गोसो जादोंमोन, नाथाय दान्दिसे समनि उनावनो जों दोरोदफिननायसै।
जि रिंगासो समाव जों फरायसालिनि हस्टेल मोनफैफिनबाय। दुगैयै लोबै हरनि ओंखामखौ जानायसै। सानसेमानि बेसेबा गोजान मथर साइकेल सालायनाय , बेनि अनगायैबो बेसेबांबा हाखर-हाला गाज्रि लामायाव सालायनाय मोदोमा साख्रुब जोबथारदोंमोन। आमटेकानिफ्राय साफागुरिसिम थांनाय लामाया जेरैबादि गाज्रि बेबादिनो सरलफारा थांनाय लामायाबो गाज्रि जानानैनो दं। लामानि थाखायनो बहाबा थांगौ नंबाबो थांनो बाहरफिननाय मोनो। सरलफारायाव थांनाया लामाया गाज्रि होनना मिथिनानैनो आंबो थांनो बाहरनाय मोनदोंमोन थेवबो आं नुयैलाय फारसेथिं आं गोदान जायगा दावबायनो मोजां मोनग्रा मानसि बेखायनो थांथारनानै सरलफारानि बागै एसेब्लाबो नुनायजों लोगोसे मिथिबोनायसै आं।
0 Comments