फांनै बिफां आरो फालोसे मोख्रा
फांसे जोबोद गेदेर बिफां दंमोन । बे बिफांनि दालाइया गोबां दंथारो । गावजोंगाव बुजिलायनो आरो अनज्लायनो हायोबा फालोसे मोख्राफोरा बेवहाय आराम लानो हानायनि थोजासे खाबु दं । सानसेखालि अरननि गासैबो मोख्राफोरा मोनसे समाव बे बिफांनि दालाइयाव जमा जाफैदोंमोन । बे समावनो मासे मोख्राया बुंदोंमोन, ‘हरखाबै माब्लाबा गिलुबालु मोनसे खैफोद फैनो हागौ । गासै अरनावनो गेदेर दैबाना फैनो हागौ आरो गासैबो बिफांफोरानो दैबानाजों गुलुंनानै गोजावलांनो हागौ । बेनिखायनो नोंसोरो सानफ्रोमबो बे बिफांनि दालाइयाव जमा जाफैजोब । बे बिफांखौ दैबानाया माब्लाबाबो गुलुंहोनो हाया ।’ मोख्राफोरा बयबो फोथायदोंमोन आरो बेबादिनो खालामनो हमदोंमोन ।
साननैसोनि उनाव मासे मोख्राया खाथियावनो थानाय फांसे बिफांनि दालाइयाव थानो हमो । बे बिफांनि दालाइयाबो आराम लानो थाखाय थोजासे । माखासे मोख्राफोराबो बिथांजोंनो लोगो लायो । बिसोरनि गेजेराव मासे दैदेनगिरि मोख्राया बुंबाय, ‘बे बिफांनि रोदाफोरा गोरासिन । दैबाना जायोब्ला बेसो थावरिनानै थानो हागोन । बे बिफांनि दालाइफोरासो जोंनि हारिखौ रैखा खालामनानै लाखिनो हागोन। बेनिखायनो गुबुन बिफांखौ नागारनानै गासैबो मोख्राफोरा बेवहायनो जमा जाफैजोबनांगौ।’
बेबादिनो दैदेनगिरिफोरनि खोथा लानानै मोख्राफोरा सानफ्रोमबो ओरै बारस्लाय हरै बारस्लाय खालामबाय थानायसै। गावजोंगाव बुरखायलायनो हमनायसै । दैदेनगिरिफोरनि अनजिमायाबो बांनो हमबाय। बेबादिनो खोथा गोरोबलायैनि थाखाय गावजोंगाव नांज्लायबाय थानो हमनायसै।
दैदेनगिरिफोरा गावसोरनो हमनो हायासै बबे बिफांनि रोदाफोरा गोरासिन। बबे मोनसेया गावसोरनि हारिखौ रैखा खालामनानै लाखिनो हागोन । दैबाना जायोब्ला आदारनि जेंना जानो हागौ होननानै बिसोरो बिफां सायावनो आदारखौबो सानफा एफा दैखांनानै दोनखानायसै। खायसे सियान मोख्राफोरा गावसोरनि खुगा आरो लानजाइयावमानि खानानै लाखोमानायसै। आदारनि सायावबो बिसोरनि नांज्लाय -खमज्लाय, बोराबलायनाय आरो सोंखारिलायनाया जोबासै।
दैदेनगिरिफोरा गावसोरनो गोसोजों गोसो गिनानै ओरैबा ओरै बारस्लायबाय थानायसै। जेराव थायो बेनो साबसिन, गोरासिन आरो मोख्राफोरखौ रैखाथि होनो हागोन होननानै फोरमायो । नाथाय बारस्लायनायखौ बिसोरो नागारासै ।
माखासे मोख्राफोरा बेबादिनो दालाइ बारस्लायबाय थानायावनो आथिं लेंग्रा जागुलायबाय। बोलो गैयै लोरबां जाबाय। खायसे मेंनाय मोनबाय । गोबां मोख्राफोरानो साननो हमबाय, जायफोर रायजो राजाफोरखौ फोथायहोनो नाजायो बिसोरनो बारस्लायनानै उल्था बाथ्रा बुंफिनोबा रायजो राजाफोरा सोरखौ फोथायबावनो ?
0 Comments