मासे देवानि साम'लादाय
मोनसे जायगायाव मासे साम'लादाय दंमोन। बेयो जोबोद देवानिथारमोन। गाव गोसो जायोबानो बियो गोजान गोजान जायगायाव थाबायनानै थाङोमोन। मोनसेबो जोलुर बादायलायनाय, खाबादि बादायलायनाय गेलेनाय आरो केक्रेट बादायलायनाय गेलेनाय बारग'थारामोन।
सानसेखालि साम'लादाया साननायसै- "आंथ' गोबां जायगा नायबायलै, गोबां गेलेनाय बादायलायनाय नुबाय आं। नाथाय दासिमबो राजा आरो रानिया गावसोरनि सनानि बिसिनायाव हराव माबादि उन्दुयो बेखौसो नुआखिसै। बे खेबाव राजा-रानिया माबादि उन्दुयो बेखौनो नायनांगौ जाबाय।"
गावनि साननाय बादिनो सानसेखालि साम'लादाया राजानि राजमहल फारसे दावगालांनायसै। राजमहलाव सहैयोबा बियो नुबायदि दरखंआवनो सानै सानथ्रिफोरा जोबोद सांग्राङै बेंनानै दं। बिसोरो गावखौ हाबनो होखानाय नङा होननानै साननायसै साम'लादाया बेनिखायनो बियो सिरि सिरि इनजुरजों मानखोनानै नायखोमानायानो साबसिन जासिगोन साननायसै।
राजाहा सानै जोबोद मावथि बान्दिफोर दंमोनलाय। बिसोरो सानफ्रोमबो फुं, बेलासि आरो मोनाबिलि इन्जुराव नांनाय मैलाफोरखौ फुगारस्राङो। जेब्ला बान्दिफोरा इन्जुरखौ सुनो होननानै फैयो होनबा साम'लादायखौ मानखोबाय थानाय नुनो मोननायसै। सासे बान्दिया बुंनायसै- "ए साम'लादाया सिखाव खावनो फैदों। थां बिखौ माबार राजानो खिन्थाहै।" सासे बान्दिया गोख्रैनो खारलांनानै राजानो खिनथाहैबाय।
राजाया साम'लादायनि सायाव सिखाव दाय होनायसै आरो सानथ्रिफोरखौ दिरुंजों खानानै गरायजों बुद्रुनानै साजा होनो बिथोन होनायसै। सानथ्रिफोराबो बिखौ गरायाव खानानै बुद्रुनो हमनायसै। साम'लादाया गाबख्रावबाबो आगोर मोनाखिसै। बेबादिनो साम'लादायनि बिखुङा दुलुजोबनायसै।
0 Comments