दाउस्रिफोरनि सल'

फांसे गय बिफाङाव मासे दाउस्रिया बासा लादोंमोन । दाउस्रिया बेवहायनो बिदै दैनानै गावनि माब्रै फिसाफोरखौ फेदेरदोंमोन। दाउस्रि फिसाया बिरग'लांनायनि सिगांनो गय फिथाइफोरा मोननो हमबायमोन । गय बागाननि बिगोमाया गावनि नखराव रांखान्थिनि जेंना जानायाव सासे गय बेफारिनो बिफांनि गय फिथाइफोरखौ फानहरदोंमोन।

गय बेफारिया अखानायैनो गय फिथाइखौ हाननानै लांनो फैदोंमोन । गय फिथाइ खाग्राफोरा फिथाइखौ औवा दानदाजों खादोंमोन। बे समावनो दाउस्रि फिसाफोरा हायाव गोग्लैबोदोंमोन आरो गावसोरनि जिउखौ अबथिरा नागारनो गोनां जादोंमोन।

दाउस्रि बिमाया गावनि फिसाफोर थैनायखौ नुनानै जोबोद दुखु जादोंमोन। दाउस्रि बिमायाल' नङा, गय खाग्रा मानसिफोराबो दुखु जादोंमोन।