इमिलि दिकसन

बियो सासे मुंदांखा आमेरिकानि आइजो खन्थाइगिरिमोन। इंराजि थुनलाइनि खन्थाइ मुलुगावाव बिथांआ सासे गेदेमा दैदेनगिरि आरो मख'जाथाव सुबुं। बिथांनि बिहोमाया इंराजि थुनलाइ मुलुगाव गेदेरथार जायनि बिथांखौ मुलुग थुनलाइयावनो सासे जोबोद गेदेमा खन्थाइगिरि होननानै गनायना लादों।

इमिलि इलिजाबेत दिगसननि जोनोमा जादोंमोन 1830 मायथाइनि 10 दिसेम्बरआव आमेरिका जथाय हादोरनि सिङाव थानाय मासासुयेटसनि फिसा जायगा आमहेरेस्टआव आरो रुंसारि जादोंमोन 1886 मायथाइनि 15 मे खालारखालि।

बियो आमहेरेस्ट एकाडेमियाव स्नि बोसोर फरायदोंमोन, बेनि उनाव बियो गावनि नसिम गिदिंबोफिननाय समसिम माउन्ट हलियके पेमेल सेमिनारियावबो फरायदोंमोन। बिथांनि जिउखौरांनिफ्राइ मिथिनाय जायोदि, बिथांआ गोबां समावनो हारसिङैसो थानो गोनां जादोंमोन। बिथांजों गोबांआ मोजां लोगो खालामनानै लादोंमोन आरो बिनि सायाव गोबांआ सोनारदोंमोन। बिथांआ बयखौबो बिमा आरो बिबबादि अननायमोन आरो थैनाय समसिम जुलिबो खालामाखैमोन।

फरायसा समनिफ्राइनो इमिलि दिकसना गोबां लिरदोंमोन आरो गावनि लिरनायफोरखौ लिरथाइ गोनां थामहिनबा बेसेन गोसा खालामनो हादोंमोन। बिथांआ गाव थांनानै थासानदियाव गोबां खन्थाइ लिरदोंमोन बेफोरनि मादाव साफायजानाय खन्थाइफोरा जादों खालिबोल' दों जि। नाथाय बिथांनि खन्थाइनि अनजिमाया जादों गासै से रोजा दाइनजौ। बिथांआ रुंसारि जानायनि उनावसो बिथांनि गोबां खन्थाइफोरा बिजाब महरै साफाय जादोंमोन।

बिथांनि खन्थाइ लिरनाय आदब आरो फोरमायनाया आलादाथार। गावनि समाव बिथांनि खन्थाइ सोरजिफोरा इंराजि थुनलाइ मुलुगाव गोदान दाहार लाबोदोंमोन। बिथांआ गावनि खन्थाइखौ जोबोद गुसुं गुसुं लिरदोंमोन, खन्थाइनि बिमुंआ गुबुनफोरनि रुजुनायाव आलादा, खबामफोरा उदायै खबाम, आरो थाद'नाय सिनफोरखौ गावनि गोसोबादि बाहायदों।

बांसिनै बिथांनि खन्थाइनि आयदायानो जादों थैनाय आरो थैनो रोङैनि सायाव लिरनाय, लोगोफोरनो लाइजाम रोखोमै फोरमायना लिरनाय, दोहोरोम फोथायैनि सायाव बेखेवनाय, समाज आरो जिउमानि सायाव बेखेवना फोरमायना लिरनाय।

दासिमबो इमिलि दिकसननि खन्थाइ सोरजिफोरा मुलुगाव गोबां अनसायनाय मोननो हादों। बेनि अनगायैबो बिथांनि सोरजिफोरनि सायाव फरायथौनो हानायनि खाबुखौ होनो थाखाय फरायसालि, फरायसालिमा आरो मुलुगसोलोंसालिफोराव फरायनां आयदा हिसाबै थिसनना होनाय जादों।

बिथांनि खन्थाइखौ दासिम गोबां रावआव राव सोलायनाय जादों बेफोरनि मादाव दं- फरासि, स्पेनिस, मानदारियान चिना राव, फारसि, कुरदिस, जरजियान आरो रासियानि रावआव सोलायजादों। बेनि अनगायैबो जोंनि भारत हादोरनि गोबां रावआवबो बिथांनि खन्थाइया राव सोलायजानायखौ नुनो मोननाय जादों।