जोंनि आबौ मासे मैदेर आरो अजगर जिबौ
सानसेखालि आबौवा जानजियाव सिखा थुंग्रि आरो फाफ्लियाव बेसेबांबा गिलिर सिलाइ गादा बाननानै हाग्राबारियाव मैहुर खालामनो दावगालांनायसै। हाग्राबारियाव आबौवा गिलुबालु मासे मैदेरनि गाबख्रावनाय खोनानो मोनदोंमोन। फांसे बेसेबांबा गेदेर बिफाङा लोलो लोहो मावग्लुंगासिनो दं। अख्रां सायाव बिरै बिरै दाउसिन-दाउलाफोरा गाबस्रावगासिनो दं।
मा जाखो हरखाब सानख’नो हायाखैमोन आबौवा। मा जामारदों थांगोनखि थाङा आबौवा जानजियाव खानाय बेसेबांबा गोबौ गावनि थुंग्रिखौ आखायाव लानानै खाथिनिफ्राइ खाथिसिनाव बियो दावगालांबाय थानायसै। खाथियाव सहैनानैसो बियो रोखा जानायसैदि बेसेबांबा गेदेर मासे अजगर जिबौवा मासे मैदेरखौ जानजियाव फानफ्रबनानै बिफांआव बोबथागासिनो दं।
गावनि गासै दंनायमानि बोलोखौ बाहायनानै मैदेरा बारगनो नाजाबाय थादों। फारसेथिं गावनि देहा मोदोम लावहाबलायनाय अजगर जिबौवाबो मैदेरखौ बोबथानो नाजाबाय थादों। बिबो बोलो होदों, बिबो बोलो बाहायदों। बेबादियावनो बिफांआ लोहो लोहो मावग्लुंगासिनो दं।
सोरखौ मा खालामनो जानानै आबौवा अजगर जिबौखौनो थबस्र’ दानसनायसै। लोगो लोगो दानस जानाय जिबौवा बाब्राबबायनो हमनायसै। जायगाया थैजों जाहाबजोबनायसै। होनबासो अजगर जिबौजों मस्रायजाबाय थानाय मैदेरा रैखा मोननायसै। गावखौबो दानथारजानो गिनानै मैदेरा आबौखौ गुगुरुब खुलुमदोंमोननो। आबौवाबो बिखौ जेबो खालामाखिसै।
गावनि लोहो लोहो मावनाय मोदोमखौ लानानै मैदेरा लेंग्रा लेंग्रा थाबायनानै हाग्राबारियाव हाबहैदोंमोन। आबौवा थै गसरलायनाय गावनि जोनो जोनो थुंग्रिखौ लानानै नायहरबाय थादोंमोन। अख्रांआव बिरथिंबाय थानाय दाउसिन-दाउलाफोरा सिरि थादोंमोन आरो बहाबा बहाबा बिरलांनानै अख्रांखौ लांदां खालामदोंमोन।
0 Comments