माखासे आंनि खन्थाइ

1.जेंना

मानसिफोरा बुंसोलायो मुलुगाव जायनो उजिफैयो

बिसोरो जायखिजाया जेंनाजों बुगिनो गोनां जायो

बेनिफ्राइ बारग’नायनि जेबो राहा गैया

जेंनानिफ्राइ बारग’नो थाखाय मोनसेल’ राहाया जादों

जेंनाजों जुजिनाय

मानसिफोरबादिनो जेंनाखौनो लोगो मोनफैमारबाय आं

खारखोमानोबो हाया

जुजिनोबो एसेबां बोलो आंनि आखायाव नुवाखिसै आं

जेंनानिफ्राइ बारग’नायनि जेबो राहा गैया

जेंनानिफ्राइ बारग’नो थाखाय मोनसेल’ राहाया जादों

जेंनाजों जुजिनाय

आंनि गोसोआव हाबनानै थाहाबनाय सोदोब

बेखौनो लानानै आंबो जुजिनायखौ नागाराखै

दिनै देरहाया गाबोन देरहागोन

जुजिगासिनो दं आंबो थैहां गरबहां

2.नोंनि सम नोंनि थाखाय बेसेन

जेरावखि थाया जेरावखि सहैया

नों गोजोनै थाहैनो हाथों

बेनो जोबथा लुबैनाय आंनि

बेनो आर'ज अबंलावरि होननाय बयबो फोथायग्रानिसिम

मोजां मोननायाथ' बेसेबां मोजां मोनो आं मा बुंनो

जाय खोमसियाव आं बाथि फोजोंना नोंनि मेगनाव नायदोंमोन

जाय सिरि जाहाबनाय समाव नोंजों रायज्लायदोंमोन बेनो थोजासे

मेगननिफ्राइ थरथिंसे निहिर

आरो आसि बिजौनि थरथिंसे थै सेरेब दिहुननानै

नोंनो दिनथिनो लुबैलिया आं दा

बिखा सिंनि सावगारि बिखा सिङावनो थाथों

आं बेसेबां थिफुद्ला बेखौ आरो दिन्थिनो लुबैलिया

नोंनि सम नोंनि थाखाय बेसेन

आंनि थाखाय आंनि सम

आंजोंनो जुलि जा

एबा सोरबा सासेजोंनो जुलि जाहै

जेबो दुखु मोननाय एबा हेंथा गैया आंहा

जेरावखि थाया जेरावखि सहैया

गोजोनै थाजानो लुबैयो आं नोंखौ

नोंखौदि आं मानो गोजोनै थाजानो लुबैयो

दिनै आं सारिसे बाथ्राजों फिननाय होनि

गोजोनै थाजानो लुबैनायानो आंनि थार मोजां मोननाय

3.गोसोथोखोमानोल' हायो आं नोंखौ

आं नोंखौ मोजां मोनो होनबानो मोजां मोननाय जाया। बिखौ मोजां मोननानै नों बिनि थाखाय मा मावदों, बिनो मा होदों, सानफ्रोमबो नों बिखौ बेसेबां सुखु एबा खुसियाव लाखिदों, बिनि थाखाय नों गावखौ बेसेबां बाउसोमदों आरो हर सान माबादि खोस्थो खालामदों बेसो मोजां मोननाय।

आं नोंनि थाखाय लायेक नङा, आरो बेनि थाखायनो गोसोथोखोमानोल' हायो आं नोंखौ । बेखौबो आं मिथिगौ,  नोंनि थाखाय अबंलावरिया आंखौ सोरजियाखै बेनि सोलाय नोंहा मोजां मोननाय दंखायो। नों बिजोंनो जथेस्थ गोजोनै थानो हायो।

सेनानै लाबोनो हाया आं नोंखौ सोरनिबा बिखा बोखावनानै। खावनानै लाबोनो हाया सोरनिबा बिखाखौ गाराय खालामनानै । नोंनि आखायाव हमना बोनानै बदनाम लानो हायो आं गोसो जायोब्ला, नाथाय नोंनि होस्रिख्रावनायखौ लुबैया। अदेबानि नोंखौ गोसोथोखोमानायनि बदनामा आंहा आगोलनिफ्राइनो दं।

आं नोंखौ गोसोथोखोमायो, आरो बेनो आंनि गोथारसिन मोजां मोननाय । आं नोंखौ जेबो इनाय खालामनो लुबैया। नोंखौ गोजोनै थाजानो लुबैयो बेनो आंनि नोंखौ मोजांमोननाय आरो जोबथा हास्थायनाय ।

4.अखा सिजानानै गाबनो गोसो जायो

थांनाय मोनाबिलिनिफ्राइनो जुब जुब थाद'नाय गैयै अखा। सैमाजों मावजिजोंसो जेन अरलायबाय थादों। नेरलायबाय थादों गावजोंगाव मोखां नायज्लायनानै।

सोरगिदिं दैबाना। आबाद दुब्लियाव जानजिफा हानथुफा गोथौ। नांगोल फालखौ दोन, नांगोल मुथि दोबैनाय दै । गासै आबाद दुब्लियानो दिनै टिटिकाका बिलोमानि महराव गांलाब नुजादों !

लामा सामा अखा हादैनि दैजों जस्लदलांदों। नंखाय बाखाय दालांफोरा अखा हादैनि दाहारजों बायफ्लेलांबाय। दैसा बिलोफोरा दैमा आरो दिपफोरनि महर लादों। गोसोबादिनो जेरै लामा मोनदों ओरैनो दैसाफोरा दुगामारा मोसौ बलदबादि फेख्रायलांदों। हाब्रां मारुं आबाद दुब्लि खुरखालांदों ।

आंना फेन गस्ला सिजोबबाय लोगोफोर ! सानदुंनि माब्ला आखाय बिलिरनाय मोनगोन? फुरा दिनै सानसे साननि मोखां नुगोन होनना आसा गैया !

न' सिंनिफ्राइनो जेरावबो ओंखारलांनो हाया । जुब जुब अखा हानाय आरो बिनि बाज्रुमनायनि सोदोब आरो खना-खनला बोहैनायखौनो खोरखिजों नायहरबाय था। बेबादि समाव अखा सिजानानै गाबनो गोसो जायो !

6.जों रावबो बोरायैआनो मोजां

मानसिया मोननै रोखोमै बोरायो आरो बेखौ बुंगोन- गोसोनि बोरायनाय आरो गुबुन मोनसेया जादों बैसोनि बोरायनाय। बैसोनि बोरायनाया बयनिबो जिउआवनो लासै लासै फैयो नाथाय गोसोनि बोरायनाया हरखाबैनो फैयो। मिथिनानै लानांगौ गुबै सैथोआ बाथ्राया जादों बैसोनि बोरायनाया सासे मानसिखौ जेसेबां बोलो गैयै एबा उदायै खालामो बेनिख्रुइबो बांसिनै गोसोनि बोरायनाया सासे मानसिखौ जेबोखौनो उदायसिनै खालामनो हागौ।

सासे मानसिया जेब्ला खामानि मावनो बायो, अलसिया जायो अब्लानो बिनि गोसोआ बोरायनो हमो। गोसोआ बोरायोबा मानसिया जेबोखौनो उदायै जालाङो।

गोसोआ गोख्रोंब्ला, खामानि मावनो बायाब्ला सासे मानसिखौ बोराय बैसोआबो बिखौ फेजेननो हाया। नाथाय जुदि गोसोआ बोरायो होनबाना बिनि लाइमोन बैसोआबो बिखौ जेबो सोमावनो हानाय नङा।

बेखायनो जों जोंनि गोसोखौ बोरायनो दाहो। जों जोंनि अलसिया आखु, खामानि मावनो बानायखौ नागारनाया मोजां। जों गावखौ जेबो उदायै खालामना दाला।

7.खन्थाइ लिरो नोंसोरनि थाखाय

सोदोबफोरखौ आद्रि खालामजाया

मानोना बेनि थाखायनो जोनोम आंनि

गासै हास्थायनाय आरो लुबैनाय-

देहानि गांनाय उखैनाय

सोरगिदिं आं नुनो मोनो बेनि थाखायनो

सोदोबफोरजों आं खन्थाइ लिरो

नोंसोरनि गासै आंखाल होखारनो

आं मिथिगौ नों दिनै गाबदों

जानो हागौ दिनै गाबाखैबाबो मैया गाबदोंमोन

सोदोबफोरानो आंनो खिन्थाफैयो

आंगो खालामना लाबाय आं बेखायनो सोदोबफोरखौ

बेखायनो सोदोबफोरजों आं खन्थाइ लिरो

नोंसोर बेखौ आंगो खालामनानै ला

मानोना खन्थाइया दा दोंसे लामा जाबाय

दोंसे जिउ जाबाय

गंसे अख्रां जाबाय

दोंसे लैथोमा आरो हाग्राबारि जाबाय

बेयो नोंसोरनि गांनाय उखैनाय जाबाय

8.आरोबाव अखाफोर गोरलै

खनबेसेदि अखाफोर थैलांखो बेनि हिसाब गैलिया। मैयासो उजिदों आरो दिनै थैदों। उजिनाय आरो थैनाय, दाबोरफ्रोमबो रंजानाय आरो गाबनांनाय। सानफ्रोमबो बेनो जुनिया बोथोर, बे मोननैल' जेबो गैया । बेखायनो दानिया आंनि मोखांआव रंजानायबो गैया मिनिनायबो गैया जालांबाय।

समबारि ! नों आंनो गोदो लाइजामाव बुंहरनायानो थिगमोन । गावनो बुंनाय बाथ्रा, नोंसो बावलांखोना माखो? नाथाय आं दाबो गोसोआव लाखिदों । नोङो बुंदोंमोन, माब्ला उजिफैयो अखाफोरखौ लामा नायनांगौ गैया । बेयो सम बादिनो फैयो, आगानसेबो फेलें जानाय नङा ।

अखाफोराथ' दं दिनैबो आंनि बेसेबांबा आंगो जानानै ।  दाबोरसे सोरांनि थाखाय जिंगा गैथवा आंहा । नाथाय बेनि सोरांजों दिनैनि हरखौ आं माबोरै बिदाय होगोन एबा मा इयुन जोलैनि थाखाय मा सोरजिगोन बेवहायसो हाफा-मुवा आं।

बिखा गेजेराव अखाफोर थोबसे गोबा लानानै गावखौनो ओरैबादि नाङो, जेन'बा आं सासे आबादारि खुबैहां खुबैयाहां आखायाव आथुमसे माइज्लि लानानै गसंनानै दं  दलर दुब्लि गेजेराव ।

9.आंनि बुंनांगौ बाथ्राखौनो गावसो बुंजोबो

सानसेखालि सिमांआव नुदोंमोन आं बि सिख्लाखौ। फैदोंमोन गावनि गोसोबादि, गोसोबादिनो थांफिनदों। बिनि थांफिननाय समनिफ्राइनो आं बिखौ नुफिनाखिसै।

आंसो थांदोंमोन, ना बियो गावसो फैदोंमोन बेखौ आं मिथिगौ। बियो मानो फैदोंमोन आरो मानो थांफिनदोंमोन बेखौबो आं मिथिगौ। नोंसोरनि सिगांआव आं बुंनो सानो, नाथाय आंनि बाथ्राखौनो गावसो बुंजोबो। नंगौ आंनि गोसो सिंनि खना-खनलानि गासैखौबो बियो खावना लांजोबबाय।

मानोना बिनि फंफ्रोमबो बाथ्रायावनो आं हाबनानै दं। बियो बाथ्रा बुङा आंसो बुङो। आंनि राव आरो गोसो मोदोम- बिजों थांफादों। लांफादों बियो आंनि गोसो गोरबो गासैखौबो बोखानानै।

आंखौ दुब्ला गोथै खालामना गालांनानै आंनि गोथांखौ लानानै थादों बियो।

दासानदि बिनि बाथ्राया बेसेन दं। आंनि बाथ्राफोरा से फैसानिबो बेसेन गैया जालांदों। जेखियानो जाया, नों मिथिगौ आंथ' गोथैखासै। गोबां सानाय आलौनायजों गाबख्रावनायनि उनाव गुबुन सानाय आरो आलौनाय गैला आंनि गोसोआव। बेवहायनो गोजोननाय दं आंहाबो।

10.आंनि बुंनांगौ बाथ्राखौनो गावसो बुंजोबो

सानसेखालि सिमांआव नुदोंमोन आं बि सिख्लाखौ। फैदोंमोन गावनि गोसोबादि, गोसोबादिनो थांफिनदों। बिनि थांफिननाय समनिफ्राइनो आं बिखौ नुफिनाखिसै।

आंसो थांदोंमोन, ना बियो गावसो फैदोंमोन बेखौ आं मिथिगौ। बियो मानो फैदोंमोन आरो मानो थांफिनदोंमोन बेखौबो आं मिथिगौ। नोंसोरनि सिगांआव आं बुंनो सानो, नाथाय आंनि बाथ्राखौनो गावसो बुंजोबो। नंगौ आंनि गोसो सिंनि खना-खनलानि गासैखौबो बियो खावना लांजोबबाय।

मानोना बिनि फंफ्रोमबो बाथ्रायावनो आं हाबनानै दं। बियो बाथ्रा बुङा आंसो बुङो। आंनि राव आरो गोसो मोदोम- बिजों थांफादों। लांफादों बियो आंनि गोसो गोरबो गासैखौबो बोखानानै।

आंखौ दुब्ला गोथै खालामना गालांनानै आंनि गोथांखौ लानानै थादों बियो।

दासानदि बिनि बाथ्राया बेसेन दं। आंनि बाथ्राफोरा से फैसानिबो बेसेन गैया जालांदों। जेखियानो जाया, नों मिथिगौ आंथ' गोथैखासै। गोबां सानाय आलौनायजों गाबख्रावनायनि उनाव गुबुन सानाय आरो आलौनाय गैला आंनि गोसोआव। बेवहायनो गोजोननाय दं आंहाबो।

11.जेनबाय थायो आं गावजोंनो

आंबो मिथिगौ अखोरांआ बेसे फैलाव

बेसे गुवार

बेखौ गोबानो हानाय गावनि बिखाखौसो

फुवारना लारोङासै आं

अननांगौ बयखौबो

गावनिनो आंगो साननानै लानांगौ

नाथाय मानसिफोरनि मोखांआव नायनानै

गोबां साननानै

गावजों रुजुनानै

समखौ आं आद्रियै हलायहरगासिनो

मानसिनि गुण आरो बदनामनि सायाव

बिसार खालामनानै

दाय हमनानै

साजा होनानै

समखौ आं आद्रियै हलायहरगासिनो दं

बयखौबो आंगो साननानै

दैमाबादि बोहैनो हायाखै हर आरो सान

सुदेम बार आरो अखा जानानै

रैसुमै मेथाइ जानानै

रावखौबो गोजोन होनो हायाखै आं

आखाय आथिं गोसो थासेयावबो

रावनोबो अननाय आरो बानथा होनो हायाखै आं

आं गावनि मुगैनाय आरो बोराबनाय

गावनि दुगानानै लानायजोंनो

मोनफ्रोम सम आरो थासारियाव गासिननानै दोनजादों

जेनबाय थायो आं गावजोंनो

12.बेबादिनो जालांबाय थादों

सिफ्लेजानाय गलाब बिबारनि फाइलिफोरा नखोरां सानिफ्राइ गोग्लैबोयो। बोलो गोरा मैदेरफोरा हा जोनानै गोमसार होयो, आरो मैदेरनिनो जेन मेथाइ खननानै मोनसे रंजानाय। फोथार बेयो जेननाय आरो देरहानायनि।

मोनजानाय मोनलोंनायनि बाथ्रा जोबनो गैया। गांनाय उखैनायनि बाथ्रा बुङाब्लाबो जासिगोन।

उखैनाय दं अरनाव। मुलुगखौनो सोलास्लिबनानै हांगार खालामनायनि हाबिला दं बिहा। लुबैनाय दं दैमानावबो। गासैखौबो लोमसावनानै फोजावलांनो गावनि आंगो खालामनानै।

दावहा फोथारनि उखुन्दै सिङाव आनदायनानै दं आङो। रावखौबो नुहराखै। हाथिरनि मोदाननाय गोथै सहनि सोलाय।

रजे ! दिनै नोंनिफ्राइ आं मा लुबैयो आंनि हालोदखौ नायनानै नों मिथिगौथ'? मिथिगौबा दे बुं।

13.ओंथि गोनां सिरि थानाय

जिउआ जोबोद ओंथि गोनां, बेखौ आं बुजियो। बेखौ नोंथाङाबो बुजिनो नांगोन, मानोना ओंथिजोंसो थांनानै थायो जोंनि जिउ।

जेसेबां दिनफोरा थांबाय, सना जानानैनो थांबाय। जेसेबां सम दंबावो गासैबो सना जानानैनो दं। आंहा जेबो लस जायाखै आं सानो।

दुखु फैदों, आं गाज्रि मोनाखै। सुखु फैदों बेखौबो आं गाज्रि मोनाखै। जेसेबां थांदों गाहामैनो थांदों। जेसेबां फैदों गाहामैनो फैदों।

माब्लाबा गाबनायजों, माब्लाबा जोबोद दुखु-दाहाजों आंनि समफोरा बारलांदों आं नाथाय गाज्रि बुङाखै। गोबां सम आरो थासारियावनो आं सिरि थादों।

आं मिथिगौ, फैगोन मोनसे सना बिदिन्था, सनानि सम। जेबो बुङालाबासे आं सिरियै नेनानै थादों। आं मिथिगौ, ओंथि गोनां सिरि थानाया ओंथि गैयै सोदोब बाहायनायनिख्रुइ साबसिन।