सिफुं जायनि देंखोखौ रावबो मोजां मोनै गैया

सिफुं जायनि देंखोखौ रावबो मोजां मोनै गैया

सिफुंआ मोनसे रोखोमनि औवाजों बानायनाय दामजु। फिसा, गथा आरो आखानथि मोनसे जखानि गोलाव। बेखौ सुफिन होननानैबो बुङो। बर’ खन्थाइगिरि फ्रमद चन्द्र ब्रह्मआ गिबि गिबि सुफिन सोदोबखौ गावनि हायेननि सुफिन मुंनि खन्थाइनि गेजेरजों बाहायग्रोदोंमोन, जाय खन्थाइखौ जों 1940 मायथाइयाव ओंखारनाय हाथर्खि हाला लाइसियाव मोननो हायो।

सिफुंआ बेसादारि हारिमुनि मोनसे बाहागो। बर’फोरा बेखौ औवा बिजौनिफ्राइ बानायो। फारसेजों लामा दोननानै फारसेजों गानथि दोननाय जायो। सोर (लहा) खौ अरखि सावनानै ख्रि ख्रि गरंबा आरो बेनिबो बांसिन गुदुं फलंनाय जायो जायखौ गरं होननानैबो बुङो। बेखौ खुगाजों बार सुनानै आरो गुदुंआव आसि बिलिरनानै देंखो रिंखांहोयो। बेनि देंखोआ खोनासंनो जोबोद रैसुमै- बबेखानि मोजाङै सुनो आरो आखाय बिलिरनो रोङोबा जोबोद गोदै आरो मिलौहाब जायो। थुनलाइगिरिफोरा सिफुंनि देंखोआव जादु दं होननानै बुङो।

गोदो गोदाय बर’ समाजाव सिफुंखौ लाउखारफोरा मोसौ गुमनाय समाव बिफांनि दालायाव गाखोना दामोमोन। खायसे लाउखारफोरा मैसो बिखुंआव गाखोना दामो आरो बिलिफां नङाबा गुबुन उफेरा समफोरावबो बिसोरो सिफुंनि देंखो रोमै रोमै हगारोमोन। फुं आरो मोनाबिलि समफोराव बर’ गामि गामि सिफुंनि देंखो खोनानानो मोननाय जायोमोन। बेनि अनगायैबो गामियाव खेराय, गारजाफोर आरो बैसागु दमासि रंजानाय समफोराव सिफुंखौ दामनाय जाबोदों। खेरायाव दामग्रा सिफुंनि गुदुंआ बाथौ दोहोरोमनि बा सानथौजों सोमोनदो गोनां बेखायनो गरंबा जाथारनांगौ जायो।

आथिखालाव बर’फोरा सिफुंखौ गावनि आंगो बेसादारि हारिमु हिसाबै बेखौ बांसिनै अनसायनाय आरो देंखो बोनायखौ नुनो मोनदों। बर’फोरा सिफुंखौ खुगा मेथाइ रोजाबनाय, ग्रामपनआव मेथाइ रोजाबनाय, सावथुन, फावथिना दिनथिनाय, हाबा-खेराय, बायदि रोखोमै मोसानाय रंजानायफोराव सिफुंखौ बाहायबोदों।

सिफुंजों बागुरुमबा मोसानाय, दाउ थै लोंनाय, खैजिमा फनाय, माइनाव बरायनाय, दाउस्रि देलाइ मोसानाय, मोसाग्लांनाय, बारदैसिख्ला आरो बायदिसिना गोबां रोखोमनि दोरोङारि मोसानायाव देंखो बोनो हागौ।

बर’ समाजाव सिफुंखौ गोदो जेरैबादि मान होबोदोंमोन आथिखालाव बेनि मान-दानदाखौ बांसिनसो नुनो मोननाय जादों। सरासनस्रा सिफुं सुबानो जामबा साननाय, लाउखार, दाहोना आरो दुखुथिया मानसि होननानै साननाय बर’फोरनि गामि ओनसोलाव फोथायनाय दंमोन। बांसिन लाउखार बोराय बैसोनि मानसि आरो दाहोनाफोरासो सिफुं दामनानै सल’ खिनथायोमोन। बेनि अनगायैबो सिफुंखौ बर’ हिनजावफोरा दामनो एबा सुनो हामा होननानै बुङोमोन। जायनि थाखाय बै समाव माहाजोननि फिसाजो आरो रुवाथिफोरा गावसोरनि लाउखार आरो दाहोनाफोरनि सिफुं सुनायखौ खोनासंखोमायोब्लाबो नायखोमायोमोनबो। नाथाय बिसोर बेवहाय माबा मुहिनि थामहिनबा जादु दं होननानै दांनोनो गिनाय मोनोमोन। आथिखालाव बर’फोरनि गेजेराव बर’ सिख्लाफोराबो सिफुंखौ गिनाय आरो लाजिनाय गैयाजासे दामनो हमदोंसै।

दानि सिरां जिल्लानि सिङाव थानाय रौमारि सिफुं हारिमु आफादनि जानानै बिजुलि ब्रह्मआ आइजो महरै बर’फोरनि गेजेराव गिबिसिन सिफुं दामो। थांनाय 2015 मायथाइनि जुलाइ दाननिफ्राइ बिथाङा सुफिन दामनो जुरिजेनो। दासिम बिथाङा गोबां जायगा आरो गेदेर गेदेर जथुम्माफोरावनो गावनि लाजिनाय आरो मोदोम मावनायखौ नागारनानै सिफुं दामबोना सिफुंनि मिलौहाब देंखो रिंहोबोदों। बेनि अनगायैबो बिथाङा गोजान गोजान जायगायाव बादायलायनाय आरो दिन्थिफुंनायनि थाखाय सिफुं दामनो हांख्राइ हरजादों। बेबादिनो बियो सिफुंनि जौगानायखौ लाबोयो आरो बर’ आइजोफोराबोदि सिफुं दामनो हागौ बेनि मोनसे दोहौ लाबोयो। आथिखालाव बर’ ओनसोलनि गोबां सिख्लाफोरखौनो सिफुं दामनायखौ नुनो मोनसै।

सिफुंनि अनसायजानाया गोबांसै होननानै बुंनो हागौ मानोना बै समाव सिफुंखौ बांसिन बांसिनै लाउखार आरो दाहोनाफोरासो दामोमोन। आथिखालाव फरायसालि, कलेज आरो मुलुगसोलोंसालियाव फरायनाय फरायसाफोराबो होंगो-दोंगो साबसिन हामसिन दामनो बादिलायनायखौ नुनो मोनदों।

बेयो जोबोद गोजोनथाव बाथ्रादि दासानदि सिफुंखौ माबोरै आदब आरो सोलोजों मोजाङै दामनो हायो बेनि थाखाय रिंगुदामसा  मुलुगाव जुनियायै सोलोंथाइ होनाय जादों।