समखौ मोजाङै बाहायनाय

समा जोबोद बेसेन गोसा । सानसेयाव जों समखौ खालि 24 घन्टाल' मोननो हायो। बेनि बांसिन मोननो हाया । बेनिखायनो समखौ मोजां हाबायाव बाहायनानै गावनि जिउनि गोनांथिफोरखौ बुथुमनानै लानो नाजानांगौ।

जेबो मावा लासेनो ओरैनो थानानै गावनि बेसेन गोसा समखौ हगारहरनो नाङा। जाय गावनि बेसेन गोसा समखौ ओरैनो हगारहरबाय थायो बियो जिउआव उनदाहा खालामनो गोनां जायो। बियो थांखांनाय समखौ मोनफिननाय नङा। बेजों लोगोसे बियो उननि समखौबो मोजां हाबायाव बाहायनो रोंनाय नङा।

इंराजियाव बयबो बुंसोलायग्रा मोनसे बाथ्रा दं। बेनो जादों- "Time is like a river. You can't touch the same water twice because the flow that has passed will never pass again. (समा गंसे दैमाबादि। नोंथाङा एखे दैखौनो खेबनै दांनो हाया मानोना जाय दैया बोहैलांबाय बियो माब्लाबाबो उनथिं बोहैफिना।)"

गेदेमा सुबुंफोरा समखौ बयनिख्रुइबो बेसेन गोसासिन होनना बुंदों। समखौ रांजोंबो बायनो हाया मानोना बेनि बेसेना रांनिख्रुइबो बांसिन । गोबां रां खरसा खालामनानैबो जों समखौ बायनो हाया नाथाय समखौ मोजाङै बाहायनानै जों गोबां रां आरजिनो हायो।

बुहुमाव गोबां जाफुंसार जानाय सुबुंफोर दं। बिथांमोनहा गावसोरनि समखौ मोजाङै बाहायनानै गावसोरनि मावनांगौ हाबाफारिफोरखौ मोजाङै मावफुंलांदोंमोन। समजों लोगोसे मावफुंलांनाय बिथांमोननि हाबायानो फिथाइ गोनां हाबायाव गुस्लायनाय लाबोदोंमोन आरो बिथांमोनखौ जाफुंसार खालामनायाव थोजासे मदद होदों।

जायफोर समखौ मोजाङै बाहायनो रोङा बिसोरो जिउआव गोग्लैसोनानै थायो, गोरिब महराव जिउ खुंनो गोनां जायो, जाफुंसार जानाया बिसोरो सिमांनि बेसेबांबा गोजानाव। समखौ मोजाङै बाहायनो रोङै मानसिफोरा जेबो गेदेर खामानि मावनो हाया। बबेखानि बिसोरो जिउआव जेबो हाबा मावालासे थानानै समखौ बारहोहरना इयुन जिउआव जोबोद खस्थ' मोननो गोनां जायो।