मासे दाउराइनि सल'

बोसोरारि जोबथा आनजाद जोबनायनि उनाव रैसुमै आरो सोगोमस्रांमोनहा नआव हस्टेलनिफ्राय फैदोंमोन । बे समावनो बिफाया बिसोरखौ मानास माहारियारि हाग्रामाखौ दिन्थिनो होनना सानदोंमोन। बेबादिनो सानसेखालि मोजां सान नायनानै बिसोरो मानास माहारियारि हाग्रामाखौ दावबायनो ओंखारनायसै।

रैसुमैमोनहा मानास माहारियारि हाग्रामाखौ दावबायनो थाखाय गंसे जिप साफारि लादोंमोन। लोगोसे बिसोरजों सासे फरेस्टार थांफादोंमोन ‌। अरन गेजेरनि लामाजों थांबाय थानायावनो बिसोरो लामा गेजेराव मासे दाउराइखौ गां फुवारनानै थानाय नुनो मोनबाय । बयबो बिखौ नायनानै जोबोद गोजोननाय मोनबाय। रैसुमै बिफाया दाउराइखौ सावगारि सेबखांनानै लानो हमबाय।

रैसुमैया बिफाखौ बुंबाय, "आफा बे दाउराइखौ हमनानै लांनो मोनगोनना मोना?"

बिफाया फिननाय होफिनबाय, "गां गोनां दाउराइखौ माबोरै हमनो हानांगौ जाखो?"

रैसुमैया सोंफिनबाय, "गावनानै लांनो मोनगोनना मोना आफा?"

बिफाया फिननाय होफिनबाय, "माबोरै गावनानै लांनो मोननो? नै जोंजों फुलिस फैफानायखौ नुवाखै?"

गावसोरजों थांफानाय फरेस्टारखौ नायनानै रैसुमैया सिरि थादोंमोन। थेवब्लाबो बियो बिफाखौ नायनानै बुंदोंमोन, "आफा दाउराइखौ हाथाइयाव बायनानै मोनगोनना मोना? जोंहाबो बेबादि दाउराइ मासे बायदिनि।"

बिफाया सिरि थादोंमोन। बयबो दाउराइखौ नायनानै गोजोननाय मोनदोंमोन। दान्दिसे उनाव दाउराइया गावनि गांखंखौ थख्रबनानै लासै लासै थाबायनानै हाग्रायाव हाबहैदोंमोन। बिसोरो आरोबाव दावबायनो आवगायलांबाय थादोंमोन।