सासे सेंग्रा आरो मासे बेमानि सल'

सासे सेंग्रा आरो मासे बेमानि सल’

मोनसे गामियाव सासे सेंग्रा दंमोन। बियो उन्दै समनिफ्रायनो जोबोद अलसियामोन। नआव जेबो खामानि मावामोन। बिमा आरो बिफायानो बिखौ जेबो खामानि मावहोखायामोन बेनिखायनो बियो जेबो खामानिखौनो मावनो रोङै जालांनायसै। जेबो खामानि मावाबाबो नाथाय बियो जोबोद साब-सिखोन थानो मोजां मोनोमोन। गस्ला आरो लंफेना मैला नाङोब्लानो बियो गानामोन। न’ सिङाव मैला थायोब्लानो बियो हाबनो बायोमोन। गासैबो खामानिखौनो बिनि बिमा आरो सानै बिनानावफोरा मावनानै होजोबोमोन। सानै बिनानावफोरा बिखौ हानायमानि मदद खालामोमोन। बिसोर न’-बांखौ जेब्लाबो साब-सिखोन लाखियोमोन। बिनानावफोरा बिदानि फेन-गस्ला गासैखौबो मैला नांबानो सुनानै होयोमोन।

बे सेंग्राया मोनसे समाव मेट्रिक आनजादखौ उथ्रिगारनायसै। बिमा आरो बिफाया बिखौ जेबो मावनो रोङैखायनो लजिं दोनालासेनो हस्टेलावनो दोननानै कलेजखौ फरायहोनो सानदोंमोन। नाथाय बे सेंग्राया हस्टेलाव थायालासेनो लजिं थानानै फरायनो थाखाय थांखि लादोंमोन। बियो गाव हारसिंनो ओंखाम संनानै जानो, थुरसि-लथा सुनो, गावनि फेन-गस्लाखौ गावनो सुनानै लानो आरो गाव उन्दुग्राखौ गावनो फोसाबनानै लानो थाखाय थांखि लादोंमोन। गोदान जुजिनाय गोसोजों बियो गावनि गोजौ सोलोंथाइखौ लानो थाखाय थांखि लादोंमोन।

बिमा आरो बिफाया गिदोंमोन, बियो माबोरै सोलिगोन, खुनुबेला बियो खामानि मावफेराखै, ओंखाम संफेराखै, आलु दरसेखौ माब्लाबाबो खावनै खालामफेराखै, गाव जानाय थुरसि-लथा खालाय दैफोन गारफेराखै सुफेराखै, बियो माबोरै सोलिगोन बेफोर गासैखौबो साननानै। नाथाय बिसोरो फिसाज्लाखौ बुजायनोबो हायासै। बिसाज्लाखौ बिसोरो गोजानाव लजिं दोननानै नआव फैफिननायसै।

बि सेंग्राया गाव हारसिंनो मैगं हाबाय, थुरसि सुबाय, ओंखाम संबाय, गावनि फेन गस्ला गाव हारसिंनो सुबाय, गावनि न’खौ गाव हारसिंनो फोसाबबाय। हारसिंनो कलेजाव थांबाय, हारसिंनो कलेजनिफ्राय लजिङाव फैफिनबाय। बेबादिनो सानसे, साननै, सानथाम, सानब्रैसो बारग’लांबाय।

उखुम मुदायावनो मासे बेमा दंमोन। बेमाया सानसेखालि बे सेंग्राखौ एदावनो होननानै साननायसै। बेबादिनो बेमाया सानसेखालि हर गेजेराव सेंग्रानि फेन-गस्ला दोननाय आलोनायाव खुन्दुं सोंफबजोबनानै दोननायसै।

अखानायै सेंग्राया बेमा दोंखौ बुस्रिस्रांनानै गावनि फेन-गस्लाखौ गाननायसै।

हर गेजेराव आरोबाव बेमाया सिगांनि बादिनो खुन्दुं सोंफबनानै दोनबावनायसै। अखानायै सेंग्राया बेमा दोंखौ बुस्रिस्रांनानै गावनि फेन-गस्लाखौ गाननायसै।

बेबादिनो बेमाया आरोबाव हर गेजेराव खुन्दुं सोंफबनानै दोनबावनायसै। अखानायै बेमा दोंखौ नुनानै सेंग्राया जोबोद रागा जोंनायसै। गावनि फेन-गस्लायाव सानफ्रोमबो खुन्दुं सोंनायखौ नुनानै बियो बेमानि सायाव रागा जोंनायसै नाथाया बियो जेबो खालामाखिसै।

हर गेजेराव आरोबाव बेमाया सिगांनिबादिनो खुन्दुं सोंफिननो हमनायसै। अखानायै सेंग्राया बेमाखौ जोबोद रागा जोंनायसै। बियो नायथिं-नायथा खालामनानै मासे बेमाखौ उखुमाव बाबथाबनानै थानाय नुनो मोननायसै। बेमाया बिनि फारसे नायहरगासिनो दंमोन। बियो बेमाखौ सावथारनो होननानै गंसे लावथियाव सि खाथुबनानै बेवहाय थाव लगायनानै अर फोजोंनायसै। बेमाया मिथिखाबायदि सेंग्राया गावखौ माबा मोनसे खालामसिगोन, बेनिखायनो बारगनायनि राहाखौ लानांसिगोन।

बेमाया खारनायसै, नाथाय सेंग्राया बेमाखौ सावथारनो होसोनायसै। बेमाया माबोरै खारोबा बारगगोन बेखौ साननानै खारथिंबायनो हमनायसै। बेवहायनो सेंग्राया आखायाव लानाय अरआ न’नि उखुमाव खामनो हमनायसै। बेमाया न’ सिंनिफ्राय बारननानै बायजोआव खारलांनायसै।

बेमाखौ सेंग्राया जेरैखिजाया सावथारगोन होननानै होसोलांनायसै आरो बायजोआव बियो बेमाखौ सावथारनायसै। बे समावनो बियो उनथिं नायहरफिननानै न’खौ ब्लाव ब्लाव खामनाय नुहरदोंमोन। बेबादिनो नआ अर सालाइनि महर लादोंमोन। दान्दिसेनि उनावनो गासैबो हांगारनि महर लादोंमोन।

खाथि-खालानि मानसिफोरा न’ खामबाय होननानै दावराव-दावसि खालामदोंमोन। मानसिफोरा दावराव-दावसि खालामनानै जोंब्लावनाय अरनि खाथियाव खारबोदोंमोन। दान्दिसेनि उनाव सहरनिफ्राय गंसे अर खोमोरग्रा फैदोंमोन नाथाय बेनि सिगांनो न’जों लोगोसे न’नि सिङाव थानाय गासैबो मुवा-बेसादफोरानो सेव हांगार जालांजोबनायसै।

गावनि न’आ सेव हांगार जाबाय होननानै बिगोमाया दोबोद दुखु जादोंमोन। न’ सावग्रा सेंग्रानि बिमा आरो बिफानिफ्राय बिसोरो नोगोद रां दाबि खालामनानै लादोंमोन। सेंग्रानि बिमा आरो बिफाया दुखु जादोंमोन आरो लजिं दोननाय फिसाज्लाखौ न’सिम लानानै फैफिनदोंमोन।