खुसेंग्रा आरो गामियारि बर’ सुबुंफोर
खुसेंग्राया जाथोसि गां गोनां एम्फौ। गोख्रों आरो गावनि आन्था थोंनै गोरा दाबुजों बारनानै खारनो हानाय गोहो बेहा दं। बेनि आथिङा दाबुखौ लाफानानै गासै दाइनथा दं। गां गोनां एम्फौब्लाबो बिरथिं बिरथिं जिउ खुंनाया बिनि आखु नङा। बियो जानजिफा गाहाम गुरै हायाव गुदुं खुरनानै एब्रेना थानानैसो मोजां मोनो। उदां आरो गोरान नाथाय खाथियाव दै मोननो हानाय बेबादि जायगायाव बिसोरो थानो मोजां मोनो।
सरासनस्रायै खुसेंग्राया हाग्रानि जिबिब्लाबो बियो मानसिया आबाद खालामनाय आबाद फोथार, मानसि थाग्रा जायगा आरो बारि बागानफोराव थानानै मोजां मोनो। मानसिनि खायफा बोथोरनि आबाद आरो गांसोफोरखौ जानानै बियो थांनानै थानो मोजां मोनो। बेफोरबादिनि थाखायनो गामियारि मानसिफोरजों खुसेंग्राया खाथिथार सोमोन्दो थायो।
बर’फोराबो गामियाव थाग्रा मोनसे हारि। आबाद दुब्लि आरो बारि बागान खालामनानै जिउ खुंनाया गामियारि बर’फोरनि मोनसे गोजाम हुदा। बेखौ नागारनानै बर’फोरनि थांनानै थानाया गोरलै नङा। आथिखालाव साख्रि आरो बेफार फालांगिनि सायाव सोनारनानै खायसे बर’ सुबुंफोरा नोजोराव थानो लादोंब्लाबो बारि बागान आरो आबादखौ मोजां मोनफ्लेग्रा बर’ सुबुंफोरा गावसोरनि गामिखौ नागारनानै जेरावबो थांनायनि बाथ्राखौनो साननो हाया। बुंनो थाङोब्ला आबादानो बिसोरनि जिउ। आबादानो बिसोरनि थांनानै थानायनि साबसिन राहा लामाल’ नङा बिसोरनि मोननो गैयै सुखु गोजोनबो।
बोथोर सफैनाय लोगो लोगो बर’ सुबुंफोरा बबे आबादखौ मावोब्ला बोथोरजों खाब जागोन बेखौ साननानै लाखायो। बेबादिनो दैज्लां बोथोरनि आबादखौ दैज्लांआव मावो, मेसें बोथोराव बबे आबादा खाब जायो बेखौबो सानै हयैनो मावखायो।
गोलाव बाथ्रा एबा बुंफोरलुफोर होआलासेनो खुसेंग्रानि बाथ्राखौनो बुंदिनि। बर’फोरा आबाद खालामनाय सिबिं, सबाय, देमसि आरो बारिनि मैगंफोर थानाय जायगायाव खुसेंग्राया गुदुं खुरनानै थायो। बेवहायनो बिसोर गावसोरनि गोसोबादि आबाद आरो गांसोफोरखौ अरफायनानै जायो। आबादखौ नोस्थो खालामनायनि थाखाय आबादारिफोरा बिसोरनि सायाव बोराबनाय मोनो। बेबादिनो खुसेंग्रानि खहा खालामफिननायनि बाथ्राखौ सानफ्लाङो।
सुबुं समाजाव खुसेंग्राया खुसेंग्राल’ जानानै थायाखै। गोदो गोदायनिफ्राइनो खुसेंग्राखौबो बर’फोरा आदार हिसाबै बाहायबोदों। माब्लाबा गुदुंनिफ्राइ जावनानै दिहुनदों, माब्लाबा दै लुनानै बिसोरखौ दिहुनदों आरो बाथोन नङाबा फाजाफोर जुथे गोनां एवनानै जादों। खुसेंग्राया जानोबो इनायनो गोथावथार। मेजेम गोनां एम्फौ बेनि खहाबनायखौ गामियारि बर’फोरा बयबो मिथिजोबथारगौ। आथिखालाव हाथाइ गलायावबो फाननाय नुनो मोनो। खायसे मानसिफोरा बेखौनो बायनो सेलायगुलायो आरो मासेयाव से-नै रां होनानै नआव लानानै थाङो।
जेथो दानाव हरा जोबोद खोमसि जायो। गोलोम बोथोर जागायनायनि थाखाय सानाव जोबोद गुदुं जायोब्लाबो हरनि समाव थाबैनो गुसु जायो। गोदान बिफां लाइफांनि बिलाइफोरा गुसु आरो गोथार बार एंगारो। जेब्ला मानसिफोरनि नखराव मोब्लिबनि सोरां जायो बेबादि समावनो मोनाबिलि समाव खुसेंग्राफोरा गावसोरनि गुदुंनिफ्राइ ओंखारनानै बिरथिंबायनो हमो। बे खाबुआवनो मानसिफोरा खुसेंग्राखौ हमनानै बाथोन जानो हमो।
जेथो आरो आसार दानाव जेब्ला जे जे अखा हायो आरो दुब्लियाव दै बाना जायो होनब्ला खुसेंग्राया खैफोदाव गोग्लैनो गोनां जायो। बे समाव दैबानाया खुसेंग्रा गुदुंआव थानो हायै जायो जायनि थाखाय बिसोरो गुदुंनिफ्राइ ओंखारनानै गावसोरखौ रैखा खालामनो थाखाय जेरावनो मेरावनो मानखोनानै थानो गोनां जायो। बे खाबुआवनो गामिनि बर’ सुबुंफोरा खुसेंग्राखौ हमै हमै हान्दिंगायाव हाल्दिंगा बुंजाफा सैनानै नआव लाबोयो आरो जुथेयै जाफैयो।
दैज्लां बोथोर जोबसि जोबसि खुसेंग्राफोरा मोनाबिलि समाव गुदुंनिफ्राइ ओंखारनानै दरखं मोखाङाव गोगोम गाबनो हमो। सोरगिदिं बिसोरो गुबुन मोनसे आलादा रोखोमनि थासारि सोरजिनो नाजायो। ओरैबादि सानफ्लांलायोदि जेन’बा बे बोथोरा खालि खुसेंग्राफोरनि थाखायल’। मोनाबिलि समखौ बिसोरो इनायनो गोगोम आरो आबुं खालामनो नाजायो। बे खाबुआवनो गामियारि बर’ सुबुंफोरा खुसेंग्राखौ खायदा खालामना हमनानै जायो।
खुसेंग्राखौ गोदो गोदायनिफ्राइनो गामियारि बर’ सुबुंफोरा आदार हिसाबै बाहायबोबाय थादों। दिनैसिमबो गामियावनो खुसेंग्राखौ मोननो थाङो नाथाय सुबुं अनजिमाया बांनायनिफ्राइ बांसिननायाव खुसेंग्रानि अनजिमाया खमायलांबाय। खायसे आबादफोरखौ बर’ आबादारिफोरा गोसो होलिया बेनि थाखायनो खुसेंग्राया गावसोरनि जोलै गालांनो थाखाय खाबु मोनाखिसै। दिनैनि समाव आबाद फोथाराव मुलि बाहायनायाबो खुसेंग्रा एम्फौ गोमालांनायनि मोनसे गेदेर जाहोन जानो हागौ। गोसो जायोब्ला गामियारि बर’ सुबुंफोरा गुवार आबाद दुब्लियाव खुसेंग्रानि आबाद खालामनो हायो।
0 Comments